محمد
انا مقلتش انك انت او غيرك ممن شاركو في الموضوع ده محل انتقادي
انا بنتقد اللي بيسوقو بسرعه عاليه جدا جوه البلد
انا فعلا لا املك محاسبتهم المفروض الحكومه هي اللي تعمل كده
لكن كام مره و انت سايق عادي ييجي واحد زي الطلقه وراك و انت مش عارف اساسا توسعلو ازاي ماهو الشمال فاضي و انت ماسك اليمين !!!
كام مره و انت بتعدي شارع في امان الله تلاقي عربيه سايقها عربجي بياخد غرز علي سرعات عاليه و انت واقف مش عارف هيفاديك ازاي؟
انا مره هديت و انا سايق علشان اسره مكونه من اب و ام و 3 اطفال صغيرين يعدو قام واحد غبي انتهزها فرصه ياكل مني غرزه عارف ايه اللي حصل؟
الاب اترزع علي الكبوت بتاع صاحبنا ده و الام و الاطفال صريخ و انهيار و الاب علي الارض غرقان في دمه مبينطقش
الموقف ده مش هنساه ابدا
في موقف تاني عند شارع الطيران كان واحد بيجري و يغرز فخبط عربيه المهم طلع بيجري بعربيته من الراجل اللي خبطه و هو بيجري بقي فعص اتنين في تقاطع!!
فلما الاقي واحد ملوش لازمه في الدنيا بيجري في الشارع بحاول اوقفه (البسه في الرصيف كلمه قلتها زي ما بنقول البسه في الحيط كده) مش معني كده اني بحاول اخليه يعمل حادثه
محمد
انا شرحت فوق قصدي من البسه في الرصيف و اظنك فهمتني كده
لكن اعذرني اللي بيسوق بسرعه جوه البلد ده تفتكر ايه اللي بيفكر فيه؟
انه يوصل بدري مثلا؟
ما ينزل قبل معاده بفتره كافيه
و كده كده و انت ماشي في اي شارع و لقيت واحد بيجري و مشيت انت عادي هتحصله في اقرب اشاره او تقاطع جرب الموضوع ده و انت تلاحظ ان كده كده مهما ان جري مش هيلحق حاجه لان الطريق اساسا مش فاضي
انا مع القانون في النقطه دي ان اللي بيجري جوه البلد و خبط واحد بيبقي قتل عمد لأن بسرعته دي عمرها ما يكون قتل خطأ
ده اسمه استهتار بأرواح المشاه و الراكبين
احمد باشا
و الله واحشني قوي و علي فكره انا بقيت في عياده جنبك و نفسي تشرفني فيها
انا مش بقول ان السرعات البطيئه هي الامان في السواقه لكن السواقه العاقله و الحرص من اخطاء الغير هم انسب الوسائل لتجنب الحوادث
اما موضوع التلبيس في الرصيف فأنا وضحته فوق
و بالنسبه لبقيه الناس فأنا لا اتمني الشر لحد ابدا و ربنا يكفينا شر الحوادث و شر الطريق