ياريت يا جماعة حد يقولي اجيب منين طاره الدريسكيون و الايرباج لانسر بومه 2008 - 1600 سي سي لان ف التوكيل سألت سعرها 7000 جنيه .. جزاكم الله خيرا ان شاء الله
عرض للطباعة
ياريت يا جماعة حد يقولي اجيب منين طاره الدريسكيون و الايرباج لانسر بومه 2008 - 1600 سي سي لان ف التوكيل سألت سعرها 7000 جنيه .. جزاكم الله خيرا ان شاء الله
مش عارف ليه الايرباج دايماً غاليه قوي كده...؟؟؟
تسمع نصيحتى شيل الاير باج واقفل الطارة حتلاقى لمبه الابرباج منورة اطفيها على الجهاز فى الشركة او فى اى مكان وكبر دماغك
الحمد لله انا عربيتى 1600 مانوال 2006وكيل مصريه فول أوبشن و فيها فرامل ABS كمان و مافيهااااااش اير باج)!!!!!!!!!! عشان جايبنها من الجيش و الجيش كان لاغى أوبشن الاير باج فى الدفعات اللى بيجيبها وكل اخواتها اللى مش من الجيش و بنفس المواصفات فيها اير باج.... بس انا ابتديت احس انها ميزه.......
الغي الايرباج بس شد الحزام يا باشا
ملخص الأير باج فى جملة صغيرة
" أوبشن ملهوش قيمة غير فى الحوادث المتينة "
أنا عندى لمبة الأير باج بتنور وتطفى والموضوع ده مضايقنى جدا بس للأسف مش فاضى أروح التوكيل وخايف أروح يقولى رقم هولامى .
المفروض ان اللمبة دي اوتوماتيك بتبتدي تنور في اي عربية بعد فترة معينة عشان تروح تكشف على الايرباج فقط زي الصيانة الدورية ابقة روح اكشف وخليه يشيلهالك كمبيوتر
كتير اوى كده على الايرباج وبعدين الاعمار بيد الله العربيات بقالها 100 سنة بتنزل من غير ايرباج ولغاية دلوقتى فى عربيات بتنزل من غيرها المهم تتوكل على الله وان شاء الله ربنا يحفظنا جميعا
كله بامر الله. بس لابد من الأخذ بالاسباب. العربيات بقالها 100 سنه بتتعمل من غير ايرباج.. و كمان كانت بتتعمل من غير حزام!!
اظن دلوقتي بنشوف ناس بتطلع سليمه من حوادث -بأذن الله طبعا- مش ممكن كنا نتخيل ان ممكن حد يطلع منها سليم بسبب عوامل الامان في السيارات اللي مكانتش موجوده قبل كده.
انا مش فاهم الناس اللي بتقول علي الإيرباج ملهاش لازمة و شيلها و الكلام ده؟!!!
دي نعمة ربنا أنعم علينا بيها...نقوم إحنا نيجي نرفض النعمة ؟؟؟
كويسين إحنا قوي أما غبور و أمثاله ينزلوا العربيات فاضية و بدون أي وسائل أمان نقوم نزعق و نشتم و نقول عليهم حرامية و مش بيهتموا بأمان الناس....ليهم حق يشيلوا الحاجات دي طالما الناس خايفة علي فلوسها أكتر من حياتها!
الكلام ده مش مضبوط قوى لأن الإير باج ساعات بتكون هى السبب فى الوفاه لأنها بتفتح زى القنبله عن طريق انفجار بيحصل بداخلها والكلام ده مكتوب فى الكتالوج بتاع العربيه و ياريت تشوفه بنفسك و مكتوب فى الكتالوج انك متقربش منها لأنها فى مراحلها الأولى و هى بتفتح خطيره جدا و بيقولك ترجع الكرسى لورا على قد ما تقدر و لازم تربط الحزام لأنك لو مش ربطه هتقرب من الدركسيون جدا أثناء الفرمله الجامده قبل حدوث الحادث و لو الاير باج فتحت و انت فى هذا الوضع غالبا بتؤدى للوفاه....
و من ضمن المحاذير انك ما تحطش حاجه فى فمك و انت سايق زى البايب مثلا أو سجاره بفلتر أو قلم أو اى حاجه و كمان لو فيه اير باج للراكب الأمامى ممنوع تحط أى حاجه على التابلوه عشان لو الاير باج فتحت هتطير و تعور اى حد و كمان متقعدش طفل صغير على حجر شخص قاعد جنب السواق و ممنوع توقفه أمامك فى الدواسه و كل شويه بيؤكد فى الكتالوج ان ربط الحزام هو الحمايه الأساسيه و الاير باج حمايه مكمله فقط و ربما تكون مضره فى حاله عدم الالتزام بالتعليمات و طريقه التعامل معاها....... و أخيرا أنا مش بقلل من أهميتها و إلا ما كانوش عملوها و لكن الدنيا مش ورديه قوى كده للى عنده اير باج فى عربيته ده غير سعرها الغالى زى ما صاحب الموضوع بيشتكى وممكن حد يطلع من عربيه ما فيهاش اير باج سليم فى حادثه جامده وواحد تانى لأ فى عربيه فيها اير باج لأن ربنا هو الحارس.
أعرف ناس بيشيلوا فيوز الاير باج مخصوص عشان يلغوها و ما تشتغلش أبدا.