الى اهالى المنصورة الكرام... بدء تطبيق حبس المواطنين

**Lion_Heart** · 26-03-2009 09:45 PM

للاسف اللى بنحسه ان القوانين دى عملينها مخصوص عشان يعاقبوا الناس و ياخدوا فلوسهم و ليس لحل المشاكل المرورية التى لن تحلها هذه القوانين........
حسبنا الله و نعم الوكيل .

**Drift_Lover** · 26-03-2009 10:36 PM

تصدقوا بالله انا كان نفسي حد يشي غليلي ويديني فرصه اتكلم عن التخلف في تنظيم المرور في المنصورة...

المشكلة اني مش لاقي أي سبب منطقي للتحويلات اللي حصت في الجلاء والترعه ومنطقة استاد الجامعه...
قبل كده الواحد كان عارف هو رايح فين وجاي منين...
دلوقتي حتي لو انا ماشي صح... بابقي قلقان لاكون ماشي مخالف...

لا حول ولا قوة الا بالله
لا حول ولا قوة الا بالله
لا حول ولا قوة الا بالله
لا حول ولا قوة الا بالله
لا حول ولا قوة الا بالله
لا حول ولا قوة الا بالله
لا حول ولا قوة الا بالله
لا حول ولا قوة الا بالله

**Drift_Lover** · 27-03-2009 01:27 PM

كله كوم بقي والفتحه المقابله لآخر شارع مستشفي الطوارئ دي كوم تاني
( مستشفي الطوارئ - بوابة الجلاء - استاد الجامعه - خارج البلد علي الدائري)
كان في فتحه مقابله للشارع للي عاوز يرجع سندوب... وكان قبلها مطب علشان اللي جاي من سندوب... شالوا المطب وقفلوا الفتحه.
طيب افرضوا اني خارج من البلد وعاوز الف وارجع لطريق سندوب...
لازم اكمل لحد كوبري الجامعه والف من تحته وارجع...

ايه ده.
الناس دي بتفكر ازااااااااااااااااااااي ؟؟؟؟
هما عاوزين يحسسونا انهم موجودين وخلاص... ده عدم الاحساس بوجودهم نعمه.
انا نفسي حد يديني سبب واحد منطقي لالغاء اليوتيرن ده.
سبب واحد.

**M.Osman** · 27-03-2009 03:46 PM

بصراحة المنصورة اصبحت سيرك ... و انا زعلان اوي اوي من الكلام الفارغ اللي بشوفه كل يوم

**Drift_Lover** · 27-03-2009 05:42 PM

انا اول ما التعديلات دي اتعملت... من حوالي 4 شهور. لاقيت عسكري واقف في الجلاء. في التقاطع اللي قبل البغل... وتايه بين العربيات...

ركنت العربيه. ورجعت سألت العسكري.
قولت له: هو في حاجه في البلد (تشريفه مثلآ) ولا التغييرات دي ليه.
قاللي : لأ يا استاذ دي حتفضل كده علي طول.
قلت له: طيب وايه الجديد... وكان ماله الأول.
قاللي : أسأل لي وأسأل لك... انا عبد المأمور.

حتي عساكر المرور مش فاهمين حاجه. واقفين بيحولوا الطريق. لكن ليه ماحدش فاهم

**shock** · 27-03-2009 07:42 PM

يا جماعة المرور في المنصورة يشد يومين
وينام اسبوعين بقالي يومين مش شايف مرور
دي مش جديدة هما بيلموا في كام يوم ويريحوا
لحد ما يخلصوا وينزلوا يلموا تاني دي النظام

**mohamed_hamdi** · 29-03-2009 01:29 AM

يا جماعة معاكوا حق ان التعديلات في منطقة جيهان و اداب و الجامعة مش منطقية بس قبل انتقاد قرار التحويلات دي لازم نعرف نقاط مهمة :
1- التخطيط المروري الأخير عامله دكاترة في هندسة المنصورة مش بتوع المرور يعني المفروض انهم ناس دارسة و فاهمة بتعمل ايه.
2- حد فيكم فكر في السيولة المرورية اللي تحققت بعد التعديلات دي بنسبة كبيرة طبعا و ليس 100 %.
3- حد فكر كده بهدوء البديل كان ايه للتعديلات الحالية للوصول للسيولة المطلوبة. ببساطة ده كان الحل الوحيد.

التعديلات الأخيرة أنا شايفها الحل الوحيد للزحام الرهيب في منطقة الجامعة بس كان ينقصه حاجتين :
1- رصف كامل للشوارع الجانبية الواصلة بين اداب و جيهان لأنها بمثابة ال return و الربط لاكتمال المنظومة لأن عدم رصفها هو سبب هروب الناس منها و بالتالي التفكير في الهروب في الاتجاه العكسي.
2- فرض احترام اتجاهات السير على الناس لأن نسبة كبيرة كانت مصرة تمشي مخالف في شارع اداب و جيهان بعد التعديلات الجديدة و ده اللي بيحصل اليومين دول.

يا جماعة خلينا نتناقش بهدوء و زي مابننتقد عدم اكتراث المرور و عدم تواجد الظباط غير عند كوبري طلخا فقط و يوم الخميس بالليل عند نادي جزيرة الورد ، لازم برضه نشيد بالايجابيات اللي بتتعمل لتحقيق سيولة في مدينة شبه مقفولة زي المنصورة كلها شارعين المشاية و البحرهما اللي عليهم العين علشان الزيارات الرسمية للمنصورة و باقي الشوارع كمالة.

أنا نصف اقامتي اسبوعيا بالمنصورة لأني من أبنائها و النصف التاني بالقاهرة لظروف العمل و أنا شايف ان جمهورية مصر العربية كلها زي بعض من حيث المرور- مافيش اختلاف في المنظومة العشوائية للمرور.

خالص احترامي للجميع.

محمد