إلى محبي وأصحاب الألنترا2007...تقييم الأداء فى الطريق السريع

الحقيقة .. دى أول مرة فى حياتى أسافر شرم الشيخ سايق ... يعني عادة بسافر يأما بالطيارة ... يا أما بالسوبر جيت ... المهم ... أتفقت مع المدام ... ومع واحد صديقى أن أحنا نأخد الأجازه مع بعض ... ونسافر مع بعض ... كل واحد ياخد عائلته ويسافر بعربيته ... وطبعاً ... ده شئ أنا قصدته ... علشان يبقى فى معايا حد على الطريق وخاصة أنها المرة الأولى اللي هسافر فيها سايق ... والحمد الله أتفاقنا وحجزنا ... وكله تمام ... وكان التحرك يوم السبت 01/09/2007 فى الصباح الباكر ... وكانت هذه ملاحظاتى :

1- العربية تم تفويل التنك بالكامل ... قبل التحرك ... وكانت المسافة تقريباً ... 500 كم والحقيقة اللمبة نورت مع الوصول بالظبط يعنى ال 50 لتر بتوع تفويل التنك تقريباً مشوني ال 500 كم يعنى ... أستهلاك الوقود لسة عالي على الطوالي ...تقريباً 200 كم فى الصفيحة ... بس اتكييف شغال على أعلى درجة ... لأن درجة الحرارة على الطريق كانت 40 درجة مئويه ...

2- المفاجاءة كانت بقى أن العربية ما شاء الله على أداءها على الطريق الطوالي منتهى الثبات ... ومنتهى الأنسيابية ... تخيلوا يا أخوانا أنا جيبت بالعربية 200 كم / ساعة وفضلت مثبت السرعة شوية ... وكان معدل المشي مش بيقل عن 180 كم / ساعة والملفات كنت باخدها على 160 كم / ساعة ... وكانت العربية فى منتهى الثبات ... وهو ده اللى عجابني ... أن العربية ثابته فى الطوالي وثابته فى المنحنيات ...
http://www3.0zz0.com/2007/09/08/20/84612821.jpg
3- الطريق إلى شرم الشيخ نضيف ... ما عدا بعض الأجزاء البسيطة ... اللى بها بعض العيوب فى الأسفلت بس يعيبه ... قلة الأستراحات بعد راس سدر ... يعنى كل الأستراحات تقريباً ... فى رأس سدر ... وبعد كده أنتا والصحراء ...

4- أثناء الرجوع ... طبعاً ... الهواء كان فى وش العربية ... فبالعافية ... العربية جابت 160 كم / ساعة ... بس برضة أداء جيد على الطريق ... علشان ولا عربية من الماشيين معايا على الطريق ... عرفة تصد قدام الهواء اللي فى مواجهة العربية ( يعنى من الأخر كنت بعدى من كل العربيات ) ...

بكده يبقى أنا مدين بالأعتذار ... لبعض الأخوة اللى انا شككت قبل كده فى وصولهم للسرعات العالية دى ... بص صدقوني ... وبجد ... أخر حاجة كنت أتخيلها أنى أنا ( أقصد يعنى بشخصيتى ) أعرف أجيب السرعة دى ... والعربية كان عندها أستعداد تكمل ... بس شئ فى عقلي الباطن كان بيرفض .. على الفكرة الصورة اللى أنا حاطيتها فوق دي ... أنا اللى مصورها وأنا سايق ... يعنى ماسك التليفون بأيد ... وبالأيد التانيه الدركسيون ... علشان الثبات ...

تحياتي للجميع ...

م / حسام منير

ماشى يا باشا عقبالنا لما نوصل ل200 بس بتقول استهلاك البنزين عالى يا راجل حرام عليك ماشى على 200 و بدور على استهلاك بنزين ده انت اساسا المفروض تحطلها يورانيوم مش بنزين :D :D :D

تمااام يا باشا بس بلاش السرعات دية كتيير :D

اقتباس:

---

المشاركة الأصلية كتبت بواسطة Hossam Mounir

تخيلوا يا أخوانا أنا جيبت بالعربية 200 كم / ساعة وفضلت مثبت السرعة شوية ... وكان معدل المشي مش بيقل عن 180 كم / ساعة والملفات كنت باخدها على 160 كم / ساعة ...
م / حسام منير

---

الواحد مش عارف يعمل ايه مع الشقاوه دي

يا جماعة صدقونى الموضوع ماكنش فى بالي خالص ... والشقاوة دى مش نابعة مني ... دى العربية ... لا بجد دى العربية اللي سحبها مش طبيعي وال Stability ... بتاعها عالي ... علشان كدة أنا ماشي على 180 وحاسس أنها 120 ... صدقوني أنا كان بمنتهى السهولة ... أقدر أقفل العداد ... بس ضميرى كان واجعني ... علشان معايا المدام والبنت ... صحيح هما كانوا نايميين ... بس برضة أنا ضميرى صاحي ... جبت 200 وبس ... :mrgreen: :mrgreen: :mrgreen:

على العموم أهي عدت على خير ... والحمد لله ... ربنا سترها ... وبعد كدة الواحد ربنا يهديه ... ويمشي على مهلة ...

تحياتى للجميع ...

م / حسام منير

الف حمد الله علي السلامه يا حسام باشا.
بس ي راجل استهلاك بنزين ايه اللي عالي دا
موتور 1600 و ماشي اقل حاجه 160 و مشغل التكييف .عاوز الاستهلاك يقل عن كده ايه بقي :)
بس نصيحه بلاش السرعات العاليه و المدام و الاموره راكبين معاك :)

اقتباس:

---

وكان معدل المشي مش بيقل عن 180 كم / ساعة والملفات كنت باخدها على 160 كم / ساعة

---

ومش عاوز معدل الأستهلاك للبنزين يبقى عالي يا راجل

أولا مبروك الرجوع بالسلامة و لكن لاداعي لسير بالسرعة ده في مصر وتذكر دائما العائلة
ثانيا مع السرعة دة إستهلاك البنزين جيد جدا و أنا في الأجازة رحت مرسي مطروح من الشروق و المسافة تقريبا 540 كيلو علي سرعة من 100 إلي 120 و كان مؤشر البنزين أقل من النصف بقليل ولكن أعتقد إن التنك 55 لتر
ثالثا أنا أصبحت إلنتراوي بعد شراء إلنترا في مسقط و هذا لتأكدي من جودة العربية في مصر و الفرق الشاسع بينها و بين اللانسر ما قبل 2008 الشكل الجديد

حسام باشا حمدالله على السلامة
انا برضه اختبرت اداء العربية اثناء سفري المفاجي بس للاسف اعلى سرعة وصلتلها العربية 180
كنت متغاظ قوي خاصة انها ثابتة ومش بتعوم زي اللي بيشككو في ثباتها وكان قاعد جنبي واحد صاحبي معاه جولف وقاللي ما شاء الله العربية ثابتة يا كريم والجنوط ال 15 عاملة شغل
لانها قبل ماغير الجنوط كانت علة 150 كويس اكتر من كدة تقلق
قعدت في المقابلة (اللي انت ما جيتهاش وزعلان منك) اسال سبعاوي قاللي حلو قوي انك وصلت لكدة خاصة ان عربيتة تقيلة وموتورها 1300 ومشغل التكييف ومعدي نص الحمولة يعني كدة زي الفل

حمدا لله على سلامتك يا حسام
وشكراً على الموضوع دا (تكملة كويسة للي بالي بالك !!!!!)
إوعى تفكر إني كنت هاقول حاجة من اللي انت كنت قايلي ماقولهاش !!! :wink: :lol: :lol: ..ياخبر اسود إيه اللي أنا باقوله دا ..كفاية قبل ماأبخ أكتر من كده :lol: :lol: :lol:

ألف حمدلله على السلامه يا هندسه

اقتباس:

---

بكده يبقى أنا مدين بالأعتذار ... لبعض الأخوة اللى انا شككت قبل كده فى وصولهم للسرعات العالية دى

---

أفهم من كده أنك ماكنتش مصدقني لما قلت أني رحت شرم الشيخ على سرعة 180كم أغلب الوقت ؟
ماشي ماشي
أديك جربت الطريق وعرفت انك ممكن تمشي فيه على سرعة أكبر كمان من الـ180كم

=============================================

أنا هانتهز الفرصه عشان اقول للأعضاء على موقفك معايا وأنت في شرم

يا جماعه الباشمهندس "حسام" وهو في أجازة وفي أخر الدنيا بيفكر في نايل موتورز وفي أعضاء نايل موتورز

عارفين المهندس "حسام منير" عمل معايا أيه وهو في أجازه ومع أسرته ومفضي دماغه من الدنيا كلها ؟

أتصل بي عشان يسألني أنا عاوز أيه من غبور فرع شرم الشيخ ؟ تخيلوا ؟
وهو سألني السؤال ده لأن في موضوع فتحه قبل كده أخونا "محمد فاضل" بيقول فيه أن أسعار غبور شرم الشيخ تقريبا كده نص الأسعار المعلنه
http://www.nilemotors.net/Forum/viewtopic.php?t=6536

المهم أنا أنتهزت الفرصه وقلت للباش مهندس حسام على شوية حاجات تيجي بألف جنيه (جشع وأستغلال بعيد عنكمhttp://www4.0zz0.com/2007/09/09/15/25469932.gif) ولو أني كنت مكسوف من الراجلhttp://www4.0zz0.com/2007/09/09/15/49847402.gif لكن بقى العشم لما بيقتلني مع حد ببقى عشمان برخامه بعيد عنكم

المهم الراجل أتصل بيا من عند غبور وقاللي أن العرض ده فعلا موجود ولكن هايبتدي أول شهر أكتوبر وخلاني أكلم المهندس "وليد" من التوكيل عشان أتأكد منه أن العرض ده فعلا هايبقى موجود وطلع أن العرض ده هايكون موجود في كل فروع غبور مش في شرم الشيخ بس

وطبعا مش هاقول رايي في جدعنة الباشمهندس "حسام منير" ولا في كرم أخلاقه ولا على الكسوف إللي أنا مكسوفه من كتر الطلبات إللي أنا طلبتها http://www4.0zz0.com/2007/09/09/15/59771240.gif

أشكركم جميعاً ... أخواتي ... على مشاعركم ...الحلوة دى ...

الحقيقة فعلاً ... العربية كانت ساحبه مع نفسها ... وصدقوني تاني تقفيل العداد كان في متناول يدى ... أنا حاسس أن العربية كانت ممكن تقول أكثر من كدة ...

أحسن معدل لأستهلاك البنزين بيكون على سرعة من 90 إلى 120 كم / ساعة ... وهو ده ال Optimum ... اللي بيتحسب عليه الأستهلك ... بس ما كنتش متخيل أن السرعات العاليه بتاكل أوى كدة ...

أستاذ حازم خضر ... وأستاذ أبو عبد الله ... أشكركم على مشاركتكم ... وسؤالكم

أستاذ ... صلاح أنا عارف أن التنك 55 لتر بس ال 5 لتر الأخيرة دى هيا اللي اللمبة بتنور .. لما التنك يبقى ما فيش فيه غيرهم ... وألف مبروك يا صاحب الألنتراتيين ...

باشمهندس كريم ... والله يا عم ... أنا مش قد زعلك ده ... خالص ... بس انا شرحتلك الموضوع قبل كدة ... ثم أنا قمت من شرم يوم الجمعة على الساعة 1:30 ظهراً ... ووصلت القاهرة ... خلصان خالص ... حوالي الساعة 6:00 مساءاً ... منهم نصف ساعة راحة فى الرست ... وفعلاً انا مع باشمهندس سبعاوى أنه حلو أوى أن العربية 1300cc وفعلاً تقيله ... وجابت 180 كم / ساعة ... وبعدين خليي بالك حالة الطريق ... والرياح ... ونوع الأسفلت ... وحمولة العربية ... كل ده أكيد بيفرق فى السرعة ...

أستاذ وائل عطية ... أنا بقى خليني ساكت ... ...

بص يا باشمهندس ... هاني ... أنا مش كنت مشكك فى حد ... وربنا يعلم ... لا أنت ولا غيرك ... أنا كنت مشكك فى الطرق اللي فى مصر اللي ممكن تسمحلي ... أجيب السرعات دى ... وذى ما أنا ذكرت فى المشاركة بتاعتي ... دى اول مرة اطلع شرم سايق ... فبالتالي ... أول مرة اجرب الطريق من ناحية اني أكون السائق ...

أما اللى انا عملته ... معاك ... أنا متأكد من شئ ... ان لو أنت اللى كنت فى نفس الموقف كنت هاتعمل كده سواء معايا أو مع أى عضو أخر ... يعنى من الأخر أروح فين أنا يا عم هاني ... فى جدعنتك ...

بس دى يا جماعة فرصه برضة ...أقولكم على شئ ... ويا ريت ما حدش يفهمني غلط ...لازم الواحد يكون مؤهل قبل ما يقرر يسوق على سرعات عالية ...و أنا بقول كدة علشان ما حدش من أخواتنا الأصغر سناً يسخن ويقرر يطلع ... علشان يجرب ...
الحمد لله انا ما عملتش كدة غير لما كنت مشيك على العربية قبل ما أطلع ... وطبعاً أنتم عارفيين أن العربية لسة جديدة بشوكها ... عاملة يا دوب 6000 كم ... وبعدين أنا حافظ العربية وصاممها ... الأبعاد ... والفرامل ... وأنا من النوع المتيقظ ... جداً فى السواقه ... وبرضة أحب اؤكد أن السواقه ملهاش كبير يا خوانا ... وانا بذكر نفسي بالكلام ده قبل أي حد ... هو بس ستر ربنا ... ولكن ساعة القدر بيعمى البصر ...

وأنا راجع ... بعد ما عديت النفق ... ودخلت طريق السويس ... خلاص بقى العمليه هديت طريق السويس أتاجهين صحيح ... بس زحمة شوية وأتوبيسات ... ونقل وتريلات ...المهم ماشي على اليمين تريلا محملة حديد تسليح ... وعربية مرسيدس 200 موديل التسعينات ... ناحية الشمال ... والراجل معاه عيلته والعربيه محملة على الأخر ... ماشي على 100 كم / ساعة ... وصاحبكم راجع 160 والعربية سخنانه ... أديله نور ... مش عايز يدينى الطريق ... نور تاني مافيش فايده ... طيب ... كلاكس ... ولا هو هنا ... رحت لمحة فى المراية اليمين ... وواخد يمينى ... وساحب جامد ما بينه وما بين التريلا يعنى أنا فى النصف ... وخلاص عديت بس من غشمه راح لا مسني من وراء من عند نهاية الرفرف الشمال ... هو ده اللى عايز أقوله ... ملهاش كبير ... وقدر الله ... وما شاء فعل ... طبعاً ... خدت خربوش محترم ... وخط لون أسود بتاع الأكصدام بتاعه ... يلا ربنا يسامحه لو كان قاصد ...

تحياتى للجميع ...

م / حسام منير

الحمد للـ لله أن ربنا ستر لان الخبطه دي في مؤخرة السياره بالزاويه دي لو جامده شوية كانت لا قدر الله أتسببت في أنقلاب السياره
صدقني لأني انقلبت مرتين بعربيتن بنفس المشهد ده بالظبط

خبطه من الجانب في مؤخرة السياره بسرعه عاليه بتخللي السياره تلف وتنقلب

الحمد للـ لله انها جت سليمه

دي هوانداي النترا 2007 حاجة تانية خالص

اااااكيد يا باشا دى الانترا ما شاء الله حاجة تانية وانا بحب العربية دى جداااااا وهيا من احسن العربياااااات فى فئتهاااا

وكويس ان انتا بنفسك اللى جبت ال 200 علشان تصدق انها بتيجى بسهولة وفى اى طريق كمااااان

وربنا يباركلك فيهااا ويكفيك شرهاااا