عمود الكامه اتكسر مرتين في خلال اسبوع ؟؟؟

**khaladsaef** · 23-03-2009 09:36 AM

صباح الخير يا جماعة ، في مشكلة بس في عربية واحد قريبي ، هي لانوس 1 2000 ، كان من كام شهر عامل عمرة للموتور ، وبعدين كان صوت العربية لسه عالي ، المهم غير رشاشات وجاب شوية حاجات تانية ومشي شوية لكن عمود الكامة اتكسر ، المهم جاب من الحرفيين الجزء اللي فوق بعمود الكامة بحوالي 600 جنيه وركبة ، وامبارح وهو ماشي العربية وقفت ، جاب ميكيانيكي اكا كشف علي العربية لقي ان عمود الكامه اتكسر تاني ؟؟؟؟؟؟ يا تري ايه السبب في الموضوع ده وهو المفروض يعمل ايه ؟؟؟؟؟

**MMamdouh** · 23-03-2009 10:13 AM

موضوع غريب... فى المرتين العامود اتكسر فى نفس المكان؟؟

ممكن يكون فية مشكلة فى البلوك نفسة بتسبب اعوجاج فى بيت الكامة لما يركب و بيحمل على العامود... او انسداد فى مجرى الزيت بتاع كراسى عامود الكامة بيسبب احتكاك و حرارة و بالتالى العامود بينكسر

او ممكن خطاء فى رباط الوش نفسة بس كدة يبقى صعب يتكسر مرتين فى نفس الحتة

MMamdouh

**MMamdouh** · 23-03-2009 11:04 AM

قللى الاول اذا كان فى المرتين اتكسر فى نفس الحتة ولا لا

و لو فيه صور يبقى 100 100

MMamdouh

**samirayad** · 24-03-2009 12:22 AM

لا وكمان ممكن تكون طلمبة الزيت ضعيفه.....أو المصفه مسدوده داخل الكرتير والزيت اللى بيطلع لتزييت كراسى عمود الكامه ضعيف جدا ....وعلشان كده الكامه بتقفش على طول (علشان معدل التزييت قليل)........وفى الغالب الكسر حيكون من جهة البوبينا (علشان الزيت بيروح من جهة الكاتينه الأول لتزييت أول كرسى ).......وأنا أعتقد أن مصفة طلمبة الزيت مسدوده بنسبه كبيره (وده الأحتمال الأرجح ).........

**samirayad** · 24-03-2009 12:32 AM

ممكن يكون فية مشكلة فى البلوك نفسة بتسبب اعوجاج فى بيت الكامة لما يركب و بيحمل على العامود

تيجى أزاى دى

**mohsen** · 24-03-2009 10:19 AM

لو سمحتوا
طيب ماهو لو فى انسداد فى مجارى الزيت او المصفى او طرمبة الزيت ضعيفة كانت لمبة الزيت هتشبر والراجل كان هياخد باله على طول

**samirayad** · 24-03-2009 10:56 AM

أولا ممكن تكون لمبة تحذير الزيت مش شغاله أساسا........وممكن تنور لحظى وساعة اللخمه مايخدش باله (تحذير لحظى....لأن سدد المصفه برضه ممكن يكون على السريع وتلدع الكراسى بتاعة الكامه ).....دا غير أن فيه ضغط معين وبيكون قليل جدا اللى اللمبه عنده ممكن تنور......وبيكاد يقترب من 1 بار على الأكثر وبيسمى ضغط تحزيرى وممكن قبله يحصل المراد......أما ضغط أى دايرة تزييت عادى بيكون فى الحدود من 3- 5 بار....ودى حدود أمان ضغط زيت التزييت........وممكن لو جينا ناحية الطلبمبه برضه تكون ضغطها نزل الى 2 بار(وهنا برضه اللمبه مش حتنور )....ولكن الضغط ردىء وغير كافى للمنطقه العلويه..................

**khaladsaef** · 24-03-2009 11:33 AM

الف شكر يا أستاذ علي مشاركة حضرتك ، انا اتصلت بصاحب العربية دلوقتي وقالي انها اتكسرت في نفس المكان برده ، اما بالنسبة لموضوع الزيت فبيقول ان في زيت كان موجود علي العمود ؟؟؟؟
بصراحة الراجل صوته حزين جدا ومش عارف يعمل ايه؟؟؟