الموضوع: خطوط تليفون فايبر اونو ( مش بيشتغل عليها الانترنت)

يا جماعه . ما سوف يتم تركيبه يسمي ( Out Door Onu Unit) . و دي وحده تقوم بعمل السنترال بل هي سنترال فعلا بس خارجي في الشارع , و يتم اللجوء لهذا الحل في حاله حدوث سرقات متكرره للكابلات النحاسيه نتيجه سيرها لمسافات طويله من مبني السنترال الرئيسي للمشتركين .
يعني ببساطه لو في مشتركين بعيد عن السنترال الرئيسي , في بلد نائيه مثلا او منطقه جديده بعيد و مخدومه من هذا السنترال لان عدد المشتركين قليل و لا يمكن من الناحيه الاقتصاديه انشاء مبني سنترال كامل متكامل عشان يخدم الف او الفين مشترك , و بناء علي ذلك الكابل النحاسي هيمشي مسافه كبيره في طرق مهجوره و غير مؤمنه مما يجعله عرضه للسرقه من قبل مافيا سرقه الكابلات من معدومي الضمير لانه بيبقي نحاس بالغ النقاوه و بيستخدم لغش الذهب , ولم تفلح الوسائل التقليديه لمنع سرقه الكوابل لاسباب يطول شرحها ؟ فما الحل اذا؟؟؟
الحل في وحدات الاونو و هي ببساطه عباره عن سنترال الكتروني بسعه قصوي 2000 مشترك و يتم وضعه في المنطقه البعيده دي نفسها يعني يكون في وسط الاماكن المأهوله بالسكان ( مؤمن) و يوضع فوق قاعده خرسانيه زي محول الكهرباء بالضبط , و يتم نقل كوابل النحاس الخاصه بالمشتركين و ربطها بهذا السنترال الصغير , اللي في نفس الوقت سيتم ربطه بمبني السنترال العمومي ( البعيد) بواسطه كابل فيبر ( Optical Fiber ) . يعني المسار الطويل اللي كان رابطك بالسنترال العمومي بالنحاس و كان بيتسرق استبدل بكابل زجاجي يسير فيه الضوء بدلا من الكهرباء و بالتالي لن يكون مطمع للصوص لانه هيسرق زجاج . و المشترك مش هيحس باي تغيير الا من تغيير رقم تليفونه فقط يعني الكابل الخاص به سوف يظل كما هو ومش هيتغير .المشكله بالنسبه لموضوع الانترنت و خاصه خدمه Adsl اللي كلنا نعتبر مشتركين فيها و لا غني عنها هل سوف تتأثر ؟ الاجابه ده يتوقف علي نوع وحده الاونو اللي سوف يتم تركيبها منها ما يدعم هذه الخدمه ومنها لا يدعمها . و انا من رايي ان الساده مشتركي الخدمه يستفسروا بهدوء من مدير السنترال لانه في وقت نقل الخدمه او انقطاعها بيكون في حاله طواريء 24 ساعه خاصه في المناطق الحيويه , و يعرفوا ايه اللي هيتم في الموضوع ده . و ابقوا طمنونا و شكرا

ربنا معاكم ويبعد عننا الفيبر ده