كنت قرأت من أحد الزملاء هنا في المنتدى إن الفطيم أوقف حجز الهوندا سيفيك
أحب أعرف حضراتكم إن حجزها مفتوح ولو حجزت دلوقتي هاتستلم في 25 /12 2007 وهاتكون موديل 2007 لأن موديل 2008 هاينزل في يناير 2008 والحجز بـ 30000 جنيه ...هذا الكلام على عهدة مدير المبيعات بمعرض الفطيم (الوكيل) الموجود في الأوتوستراد، حيث أنني زرت هذا المعرض بغرض تفحص كلا من السيتي 1300 والسيفيك
بالنسبة للسيتي (أنا بفكر في شرائها جدياً) اللي كان موجود منها المانيوال ومفيش أوتوماتيك (وطبعاً
أنا عايز أوتوماتيك) قاللي هاتحجز بـ 10 آلف وتستلم في شهر أكتوبر (كتير شوية) لكن لو مانيوال ممكن أستلم الأيام دي على حسب اللون
المهم العربية الانطباع العام عنها إنها جذابة جداً شكلاً (خارجياً وداخلياً) رحبة بشكل كبير ومريح والكنبة الخلفية تتسع لثلاثة أشخاص كبار، خامات فرشها أكثر من ممتازة،
لم يعجبني فيها زراير الكاسيت بتاعها حسيت إنهم بلاستيك ردئ، وشكل العدادات بالنسبة لي جديد
وطبعاً الشنطة واسعة جداً بس عيبها إن مسند الكنبة الخلفي حتة واحدة (مش تلت وتلتين) على عكس السيتي 1500
طبعاً السيفيك غنية عن التعريف ومش هاقدر أتكلم عليها لأنها فعلاً عربية ممتازة
المهم قعدت مع الراجل حوالي ساعة واتكلمنا في حاجات كتيرة جداً ومنها الهورس باور بتاع السيفيك اللي هو أكدلي إنه 140 مش 125 ومصر على هذا إصرار رهيب وقال أتحدي إن حد يثبت إنها 125 وقال إنهم (الفطيم) بهذه السيارة فهم يقدمون أعلى هورس باور في السوق المصرية في هذه الفئة
وامتدح الإلنترا كبديل أرخص للسيارات الياباني وفضلها بشكل كبير عن اللانسر التي ذم فيها جداً وقال إنها سيارة رديئة بكل المقاييس ولكن السوق المصري هو اللي ادلها النجاح دا على عكس حقيقتها
من ناحية تانية أثنى على عربيات تويوتا جداً وخصوصاً الياريس فسألته طيب ترجحلي السيتي ولا الياريس قال الاتنين زي بعض بس أنا بفضل شكل الياريس (مسألة أذواق) ولما قال كده حسيت من كلامه الصدق لأن قال على عربية منافسة إنها أفضل شكلاً من العربية بتاعته، المفاجأة بقى أن هو نفسه راكب ياريس !!!
بس قال إن العربية اقتصادية بشكل كبير وأقسم على هذا وقال إن السيتي الـ 1300 الأوتوماتيك بتعمل 400 كم في الصفيحة والمانيوال أعلى من كده
سألته عن قطع الغيار ، قال إنها غالية شوية بس معمرة جداً فتذكرت إن كان أحد الأخوه هنا قال على طقم البوجيهات إنه بيتغير بـ 500 جنيه فسألته عن الكلام دا فقال إنهم بـ 425 جنيه ومش هايتغيروا غير على 100 ألف كم وهم 8 بوحيهات وليست مثل البوجيهات العادية المعروفة لنا.
واتكلمنا في بعض الموضوعات الأخرى هو الحقيقة راجل لذيذ وعجبني فيه إنه بيتكلم بموضوعية وصدق ملموسين
حبيت أنقل مادار في هذه الزيارة لحضراتكم للعلم
شكراً