مش عايزين نضلمها برضه يا رجالة رغم إنه ماتش مثير للأعصاب .
فاضلنا خمس ماتشات هم علي الترتيب :
الجزائر في الجزائر
رواندا في القاهرة
رواندا في رواندا
زامبيا في زامبيا
الجزائر في القاهرة
و التصفيات هتخلص في نوفمبر و عليكم خير يعني المشوار لسة طويل و فيه وقت كبير لتدارك الأخطاء الكتير اللي كانت إنهاردة .
أهم الأشياء اللي بنعاني منها في الوقت الحالي :
1) نحاول نفك السحر اللي عامله متعب لشحاتة ! يا جماعة متعب لعيب كبير بس مستواه بقاله سنة و أكتر سئ للغاية لا يصلح حتي للعب في الأهلي أو الزمالك .. و هو صحيح محترف بس في الدوري السعودي يعني! بصراحة انا مش عارف هو ليه في المنتخب و في التشكيلة الأساسية كمان !
2) المنتخب مفيهوش ظهير أيسر! دي مصيبة يا جماعة .. و طبعاَ مينفعش نموت لاعب زي بركات في المكان ده .. لا إستفدنا من مهاراته في اليمين ولا أخدنا لعب ظهير أيسر كويس !
3) التغييرات تبقي بحساب .. إحنا أخر عشر دقائق كان عندنا إتنين مصابين و مفيش تغييرات .
4) البدء بأقوي تشكيلة من الأول و بلاش نحوش اللعيبة !
رغم الماتش الكئيب .. كان فيه نقتطين إيجابيتيين :
1) عمرو زكي طالع من الماتش متشلفط .. متعور في وشه و مصاب في رجله .. و أول ما الماتش خلص قام واقع عالأرض و خرج من الملعب و لحد الأوتوبيس متشال لأن مش قادر يمشي و يبدو إنه إصابته شديدة .. مقاتل حقيقي خالفه التوفيق .
2) أحمد حسن غالباَ جاله مزق في الأربطة و كان بيعرج بس كمل الماتش عشان منكملش ناقصين لاعب ، لو كان شحاتة ساب هاني سعيد في الملعب و خلا التغيير ده و احمد حسن إتصاب قام منزل حسني عبد ربه مكانه .. كنا إستفدنا بالتغيير و بمجهود حسني في نفس الوقت و شكل الملعب إتغير .. بس عامة اللي حصل حصل، و أحمد حسن إصابته جامدة علي فكرة .
و بالمناسبة مش مصر بس اللي في موقف صعب .
الكاميرون في موقف صعب بعد ما خسرت من توجو .
المغرب في موقف صعب بعد ما خسرت من الجابون و في المغرب كمان.
نيجيريا في موقف صعب بعد ما إتعادلت مع موزمبيق و بعد ما تونس فازت في نفس المجموعة .
الجزائر أيضاَ في موقف صعب ! لأنها إتعادلت مع أسهل فريق في المجموعة .. و هتستضيف أصعب فريق في المجموعة في الماتش الجي.
و لسة مشوار كأس العالم طويل .. ده ماتش من 6 .
المفضلات