الموضوع: هل جربت مراكز الخدمة المعتمدة قبل كدة ؟ ادخل للاستفادة

انا سنه 2000 كان عندى اكسنت 1500 موديل 2000 وجربت اتعامل مع نبيل الشيخ اللى النزههالجديده اللى دلوقتى بقى اوتوميشو
كانوا ناس محترمه جدا جدا لدرجه بعد مخلص الضمان زعلت انى هاسيبهم بس معرفش اخبرهم ايه دلوقتى
ايميها كان يتحايل عليك ويفضل يعصر فيك علشان تفتكر ان العربيه فيها حاجه والا لا
وتقول عليها علشان يزبطها

السلام عليكم، محدش رد على الموضوع دة مع انة مهم جدا لاننا كانا بنعانى من مركز ابورواش و قليوب من طول انتظار و زحمة و شغل بلا ضمير ، حد جرب مراكز تانية يفيدنا و انا سمعت ان فية مراكز بتخليك تقف مع العربية وقت الصيانة

المشاركة الأصلية كتبت بواسطة MEMES

السلام عليكم ورحمه الله و بركاته
انا اولا احب اشكر حضرتك على الموضوع ده لاهميته
و احب اعتذر لكل اخوانى الهيونداويه عموما والجيتزاويه خصوصا على تغيبى فتره طويله عن احلى منتدى سيارات فى العالم العربى .
انا العربيه عامله معايا 5500 كيلو يعنى عملت صيانتين 1000 و 5000 وحكيلكم عن الاتنين
ال1000 حجزتها عند 850 و اخد ميعاد فى ابو رواش بعدها بتلات ايامو روحت فى الساعه المظبوطه وبالرقم اللى اخذته من الاوبريتور ودخلت لزقولى استيكر برقم تانى على المرايا قلت معلش
طبعا زحمه جدا كانك فى سوق الجمعه وكنت واخد معايا مراتى و مسافر فرحان ب اول صيانه
المهم وقفت نص ساعه والعمليه اخر تهريج ولا مشيين بارقام ولا حجه وكل ما انده على مهندس من بتوع الاستقبال (الاستهبال )يطنش وفين لما واحد اتكرم وقالى باقى على رقمك 3 ارقام وشويه لائيتهم بياخدوا عربيات بعدى ب 10 ارقام واتنرفزت وروحت للمهندس اكلمه فرد بشخيط
(اتكلم براحه انت هنا جاى عشان نعملك خدمه )
ايوه بالنص
(اتكلم براحه انت هنا جاى عشان نعملك خدمه )
منتهى قله الادب وقله الذوق وبعد ما استوعبت الصدمه اخذت العربيه و جريت اطلع من البوابه جالى بسرعه مهندس قال انه مدير الاستقبال ومعلش و ما يقصدش والمهم لانى كنت جاى من السفر(السويس )
و سالنى فى مشاكل فى العربيه فى حاجه مضيئاك منها؟
قلتله ايوه عيبها الوحيد انها من عندكم
المهم ربط العفشه وغير زيت 5000 و فلتر واستلمت بعد انتظار 4 ساعااات ودفعت 139 جنيه
وعملت شكوى واتصلت بالمهندس عاطف وانا اسف انى اقولكم الردود كلها ( تسجيد X تثبيت )

فى صيانه ال 5000 وانا طبعا ناوى ماروحش مراكز غبور تانى (وديه نصيحتى للكل )
ٍسألت عن تكاليفها فى غبور طلعت 130 مصنعيه غير الزيت والفلتر
قلت اسأل فى مركز الخدمه المعتمد اللى فى السويس وهو (مركز الغالى)
التكاليف 140 مصنعيه غير الزيت والفلتر
وحجزت وروحت فى نفس اليوم الساعه 11 الظهر
وياااااااااه على حلاوه الاستقبال والادب والاخلاق
دخلت قابلتنى انسه محترمه (استقبال بجد) واخدت البيانات والرخصه
و جه صاحب المركز ومعاه الفنى وربطوا بلاستيك لحمايه الدركسيون و الفتيس و دواسات للارضيه والازم كله
(على فكره كلهم لابسين يونيفورم لهيونداى يحسسك انك فى FORMULA1)
و جرب معاى العربيه وقالى ان الدبرياج عالى حاجه بسيطه (و دىه حقيقه )
وظبطه وربط العفشه وسألنى ان كنت عايز اعمل اى حاجه تانى
على فكره المركز رغم انه صغير لكنه قمه فى النظافه و الشياكه ومكان الانتظار مريح جدا
وكنت كل شويه ابص على العربيه وهى بتتعامل احلى معامله
وبعد ساعه وربع سلمولى العربيه واستـاذنى انه يحط استيكر لزيت شل و استيكر للمركز قلتله ده يبقى لى الشرف ودفعت المصنعيه المتفق عليها وثمن الزيت والفلتر فقط وروحت وانا فى قمه الزئططه
اسف للاطاله والحكم لكم

شكرا يا باشا على مشاركتك الجااااااااامدة و التعبيرات الحلوة اللى فيها.. و فعلا غبور ده زباله و مشغلين شوية زبالين لازم يكون بايظ,, و انا قررت معملش عنده صيانة بس هعمل ايه اجيلك السويس
الف مبروك على الصيانة و انك لقيت مركز محترم تأتمنه

المشاركة الأصلية كتبت بواسطة MEMES

تنور السويس يا باشا
ونعزمك على تتفرج علينا واحنا بناكل احلى طبق جمبرى :k31:

لأ لو كده يبقى لازم اجى اتفرج على الجمبرى فى الطبق
انا اعرف ناس كتيير من السويس بس عمرى ما نزلت السويس كبلد غير مصيف فى السريع.

المشاركة الأصلية كتبت بواسطة mezo_88

انا يوم السبت القادم رايح اعمل صيانة ال 10000 فى ابوغالى العبور و إن شاء الله هقول انطباعاتى عنه

ان شاء الله يكون كويس و يا ريت تنقلنا تجربتك يا باشا علشان نستفيد و لو كويس انا ممكن اروحة فى ال 5000 كم,, انا وصلت 2800 كم و الحمد لله العربية لسه بنعومتها و حلاوتها الحمد لله.