إكشف على أي سيارة مستعملة قبل ما تشتري كويس ومتصدقش كلام حد

إكشف على أي سيارة مستعملة قبل ما تشتريها كويس ومتصدقش حد
حتى لو قالك العربية فابريكة وحلف ألف يمين
ولازم يبصلك عليها سمكري ناصح :D وميكانيكي فالح :D

السبب أني كنت من مدة بدور على جولف 2 موديل 90
ولفيت الدنيا
وفي يوم في سوق السيارات بمدينة نصر لقيت واحدة لونها أبيض ونضيفة جداً
سألت صاحبها قالي العربية فابريكة ومفيهاش أي مشاكل وقال الدواخل فبريكة
قلتله بكام قالي 39 ألف المهم إتفقنا على 37 ألف
قلتله يلا نطلع من السوق وأوديك البيت وأديك فلوسك
المهم جه في بالي أوريها لواحد معرفة بيبيع قطع جولف إستيراد رحت طالع عليه
وقفت وندهتله وسألته (بص في العربية ومدققش وقال العربية دي راكبلها نص أمامي)!!!
صاحب العربية زعل وقال عربيتي إتهانت ومشي؟

بعد مدة قابلت الراجل بتاع قطع غيار المستعمل فقالي
أنا ما قلبتش في الشاسيه ولا حاجة لأن المشكلة إن الراجل اللي كان بيبعلك العربية زبوني وواخد النص القدماني من عندي بعد ما عمل حادثة فظيعة إتعالج منها أربع شهور!!!!!!!!!!!

فاحذروا أيها الأحبة من الغشاشين والكذابين وما أكثرهم في هذا الزمان

لا حول و لا قوة إلا بالله
بس يا تري كام واحد فينا لما بيجي يبيع عربيته بيقول الحقيقة و كام واحد بيكدب و يقول ده بيع و شرا
أنا شخصيا باهرب من الموقف ده و ابيعها لتاجر أو ميكانيكي

حسبي الله و نعم الوكيل في الناس الغشاشه دي.
يعني ما فكرش في لحظه في عقاب ربنا لما يبيع حاجه معيوبه زي دي و الضرر اللي ممكن يجي علي المشتري بعد كده.
شكرا للنصيحه :)

فكرتني بالذي مضي
انا بقي كنت رايح مع واحد معرفه بس مش اوي وداني لمعرض وقالي ايه رايك في العربيه دي (128)ها حلوه؟
بصيت كده وقلتله دي داقه في القايم قالي برافو عليك قلتله والله وانا الي مستامنك يعني لو كانت معموله بنضافه شويه كنت لبستني فيها
وقال ايه معرفه
:( :( :( :( :( :( :( :( :( :( :(

قبل ما اشترى عربيتى كنت ها أقع وقعة زى دى
واحد معرفة جارى عمل لى البحر طحينة فى عربية كورولا 93
العربية فابريكة من جوه و معظم بره و صاحبها رافعها مش عارف كام سنة و مسافر عشان كده هايبيعها و كلام من ده
المهم كلمت ابن خالى و هو خبير قديم فى السيارات و كل العيلة لازم ترجع ليه قبل شراء أى سيارة مستعملة بس للأسف كان مش فاضى
انا افتكرت ان العربية لقطة و قلت بلاش تأخير بس برضه الحرص واجب
طلبت من الراجل نروح على بنزينة موبيل الهرم عشان فيها ناس كويسين نكشف على العربية ووافق
أول ما دخلنا الفنى قال له ادخل هنا نقيس كبس الموتور رفض وقال البطارية بايظه و كش ها تدور العربية
طب احنا جايين ليه
قال اكشف على العفشة أهم حاجة والباقى بعدين
الراجل اللى ماسك المحطة ما عجبوش و حس ان صاحب العربية بيستهبل
فقال انا مش ها أكشف على حاجة و حاجة لأ صلح العربية و تعالى و روحنا على أساس نتقابل تانى يوم
كلمت ابن خالى قال كده مش تمام و اطلب من الراجل تكشف فى التوكيل
و فعلا كلتمه و قلت له نروح التوكيل ( و كان قريب منه) قال السكة زحمة و انا ما أعرفش الحتة دى
و لما قرصت عليه تخيلوا قال ايه
التوكيل بيطلع القطط الفاطسة و بيوقع العربيات و رفض
قلت له مع السلامة و كويس لحد كده

لا حول ولا قوة الا بالله

:shock: الناس دية معندهاش ضمير

حسبى الله ونعم الوكيل
وفيها ايه لما يقول انها فيها عيب كذا وعملها كذا وكذا
حتنزل كام الف لكن الفلوس اللى حتيجة منها ربنا حيباركله فيها ومش جاية من كذب وغش
والله المستعان

اقتباس:

---

و لما قرصت عليه تخيلوا قال ايه
التوكيل بيطلع القطط الفاطسة و بيوقع العربيات و رفض
قلت له مع السلامة و كويس لحد كده

---

ما هو صاحب العربية ليه وجهة نظر برده ، الله أعلم العربية فيها أيه
بس مش منطقي إنك تكشف علي عربية موديل 93 في التوكيل يقولك فيها كذا وكذا من الحاجات اللي طبيعي تكون في عربية من سنة 1993و طبعا ساعتها هتنزل في سعرها عن سعر السوق
بس أنا لو مكانه أقولك العربية اهه أعمل اللي انتا عايزه و أنا طالب كذا لو عاجبك

لما جيت ابيع عربيتى كان واقف معايا واحد صاحبى تاجر وانتقدنى لما قلت للراجل الى بيشترى ان الفتيس فيه صوت ونة!!!
الراجل خد العربية وصاحبى راح معاه ولف على الصنايعية بتوعه وفرجهم على العربية ورجعلى وخلصنا والحمدلله, والحمدلله لما جيت اشترى الدايو ربنا وفقنى لعربية ممتازة فى الحالة وما تتخيرش عن الى قبلها, انت لما بتعامل ربنا صدقنى ربنا مش هيوقعك فى حاجة وحشة وهيكرمك ان شاء الله ومن غير لف ودوران الامانة جزء لا يتجزء من الاخلاق والايمان.

اقتباس:

---

بس مش منطقي إنك تكشف علي عربية موديل 93 في التوكيل يقولك فيها كذا وكذا من الحاجات اللي طبيعي تكون في عربية من سنة 1993و طبعا ساعتها هتنزل في سعرها عن سعر السوق

---

لما قال لى ان التوكيل ها يوقع العربية انا قلت له انى عارف انها عربيه مستعملة و عمرها اكتر من 10 سنين
و فى حاجات طبعا أقبلها (الحاجات اللى مش تعيب العربية) بس هو كان عايز يكروت و كمان رفض يرجع لنفس البنزينة
ربنا يهدى الجميع
و على فكرة انا لما جيت ابيع العربية القديمة كنت عامل جدول صيانة و كاتب كل اللى اتعمل فى العربية و كمان كاتب كل الحاجات اللى عايزة تتعمل و العيوب اللى فى العربية و سلمت كل ده للمشترى حتى هو نفسه ضحك وقال لى هو فى حد يعمل كده انت مش عايز تبيع واللا ايه
و ما أظنش ان اللى عملته ده فيه حاجة أكتر من الواجب وديننا بيقول لازم أقول على عيب السلعة قبل ما اتمم البيع و ألا يبقى باطل و الله أعلم

لا حول ولا قوة الا بالله

انا اضحك عليا فى حاجات بسيطة زى الكاوتش الى قالى علية جديد و لقيتة فية شنمبر من جوة و مش شغال تيبولس و كمان التكييف قالى شغال كويس و انا ما جربتوش و طلع فية خمس اخرام فى السربنتينة و عايز يتلحم و يتشحن و الكاسيت طلع بيقطع و بس غير انة بايع لى غالى شوية عن السوق عشان مغير العفشة كلها.
المهم انى ما دققتش فى حاجة غير العفشة و الماتور و الشاسية و الحاجات المهمة و سيبت الحاجات الصغيرة و ما تخيلتش انة يكدب فيها ربنا يسمحة هو كدة نصب عليا فى حوالى 500 جنية
بس هو مش مبلغ كبير فا انا مش زعلان بس نصيحة اكشف على كل صغيرة و كبيرة بنفسك و اسال على السعر كويس فى السوق قبل ما تشترى عشان الضمير فعلا قل

كلام سليم 100%

انا البوهيجي بتاعي بقاله 3 ايام شغال في عربية اوبل كانت عامله حادثة ع الطريق والعتب والقايم الي في النص ضايعين وراحت لسمكري حمار معرفش يظبطهم اتفرجوا عليهم دلوقتي :vctry:
فابريكةةةةةةةةةةةةة حتى الزنب عملها مش اسمها زنب بردو :shyy:

لازم تاخد بالك كويس اوى اوى اوىىىىىىىىىىىىى

لا حول ولا قوة الا بالله

يعنى خلاص الكدب بقى هو الاساس
ربنا يحفظنا من الناس ده ويباركلهم

منه لله الحمد لله ان حضرتك مخدتهاش...........

اقتباس:

---

المشاركة الأصلية كتبت بواسطة Ahmed Anwer

بس يا تري كام واحد فينا لما بيجي يبيع عربيته بيقول الحقيقة و كام واحد بيكدب و يقول ده بيع و شرا

---

من أجمل ما قيل بصراحة .... الله ينور عليك ...لازم نكون صرحاء مع نفسنا أولا ...

الجديد جديد ومن الوكيل مش من معرض طالما معاك
ماروتى جديده ولا لانسر مستعمله وفيها مشكله
كمان لا تثق فى السمكرى والميكانيكى وهاقول ليه
كان عندى اكسيل والاكسيل مشهوره بشرخ فى الركبه اليمين لو مغيرتش المساعدين بانتظام ولما جيت ابيعها رحت بيها السوق وكانت العربيه عليها طلب جامد لانها كانت نظيفه فقام واحد طلع ساكن جنبى وقاللى خلاص هاشترى يلا نطلع نجرب واحنا فى الطريق شرحتله كل حاجه اتعملت فى العربيه وفضل يرغى لغايه ما وصلنا عند بيته وقاللى هاجيب الفلوس واجيلك البيت وطبعا عارفين ايه اللى حصل...ماشوفتوش تانى
تانى يوم اتصل بيا واحد شافها فى السوق واخد تليفونى قلتله هات معاك حد يقلب العربيه ويقلك لو فيها حاجه يااما نطلع على بنزينه ونفحصها
وفعلا جاب معاه سمكرى وقعد يقلب العربيه حته حته ونزل فى تمنها بتاع 1500 جنيه وانا وافقت وبعد كده واحنا رايحين اعمله توكيل بدأ السمكرى يساومنى على حلاوته زى ما بيقول يااما يقول للمشترى على الشرخ ده وانه يعيب العربيه قمت قلت للمشترى على الشرخ ده لانى مش مخبيه فقام السمكرى لقى البيعه وعمولته هاتروح قاله كل الاكسيل كده وهاتهولى وانا اعملهولك عندى ومحدش هايعرف انه اتعمل
ايه رايكم بقى؟؟

اقتباس:

---

المشاركة الأصلية كتبت بواسطة أشرف فتحى

الجديد جديد ومن الوكيل مش من معرض طالما معاك
ماروتى جديده ولا لانسر مستعمله وفيها مشكله
كمان لا تثق فى السمكرى والميكانيكى وهاقول ليه
كان عندى اكسيل والاكسيل مشهوره بشرخ فى الركبه اليمين لو مغيرتش المساعدين بانتظام ولما جيت ابيعها رحت بيها السوق وكانت العربيه عليها طلب جامد لانها كانت نظيفه فقام واحد طلع ساكن جنبى وقاللى خلاص هاشترى يلا نطلع نجرب واحنا فى الطريق شرحتله كل حاجه اتعملت فى العربيه وفضل يرغى لغايه ما وصلنا عند بيته وقاللى هاجيب الفلوس واجيلك البيت وطبعا عارفين ايه اللى حصل...ماشوفتوش تانى
تانى يوم اتصل بيا واحد شافها فى السوق واخد تليفونى قلتله هات معاك حد يقلب العربيه ويقلك لو فيها حاجه يااما نطلع على بنزينه ونفحصها
وفعلا جاب معاه سمكرى وقعد يقلب العربيه حته حته ونزل فى تمنها بتاع 1500 جنيه وانا وافقت وبعد كده واحنا رايحين اعمله توكيل بدأ السمكرى يساومنى على حلاوته زى ما بيقول يااما يقول للمشترى على الشرخ ده وانه يعيب العربيه قمت قلت للمشترى على الشرخ ده لانى مش مخبيه فقام السمكرى لقى البيعه وعمولته هاتروح قاله كل الاكسيل كده وهاتهولى وانا اعملهولك عندى ومحدش هايعرف انه اتعمل
ايه رايكم بقى؟؟

---

الله ينور عليك...

الأمانة فى التعامل من أخلاق الإسلام ..

افادكم الله وربنا يوقف لنا ولاد الحلال
انه وليُ ذلك والقادر عليه

احمد ربنا انك روحت لبتاع قطع الغيار ده هو اللى لحقك

كما تدين تدان
اكيد هتبيع واكيد هتشترى
راعى ربنا وانته بتبيع ربنا يوفقك وانته بتشترى
حتى الى بيقول انا هشترى زيرو مش مستعمل
فى اعضاء هنا كتير قاللوا ان فى عربيات زيرو كتير فيها مشاكل

في ناس بتستحل الحلفان الحرام في البيع
وربنا يهدي الجميع العمليه مش شطاره كله هيرجعلك تاني

اقتباس:

---

المشاركة الأصلية كتبت بواسطة ahmed1981

إكشف على أي سيارة مستعملة قبل ما تشتريها كويس ومتصدقش حد
حتى لو قالك العربية فابريكة وحلف ألف يمين
ولازم يبصلك عليها سمكري ناصح :D وميكانيكي فالح :D

السبب أني كنت من مدة بدور على جولف 2 موديل 90
ولفيت الدنيا
وفي يوم في سوق السيارات بمدينة نصر لقيت واحدة لونها أبيض ونضيفة جداً
سألت صاحبها قالي العربية فابريكة ومفيهاش أي مشاكل وقال الدواخل فبريكة
قلتله بكام قالي 39 ألف المهم إتفقنا على 37 ألف
قلتله يلا نطلع من السوق وأوديك البيت وأديك فلوسك
المهم جه في بالي أوريها لواحد معرفة بيبيع قطع جولف إستيراد رحت طالع عليه
وقفت وندهتله وسألته (بص في العربية ومدققش وقال العربية دي راكبلها نص أمامي)!!!
صاحب العربية زعل وقال عربيتي إتهانت ومشي؟

بعد مدة قابلت الراجل بتاع قطع غيار المستعمل فقالي
أنا ما قلبتش في الشاسيه ولا حاجة لأن المشكلة إن الراجل اللي كان بيبعلك العربية زبوني وواخد النص القدماني من عندي بعد ما عمل حادثة فظيعة إتعالج منها أربع شهور!!!!!!!!!!!

فاحذروا أيها الأحبة من الغشاشين والكذابين وما أكثرهم في هذا الزمان

---

100 % بس هو السؤال هو الموضوع دا يفرق في ايه غير السعر طبعا يعني انا حفرض مثلا ان الراجل كان مجمعها على ايده مش طالما بتدي نفس الوطائف بنفس الكفائة او حتى اقل بشوية باعتبار عامل الاستعمال و الزمن و كده يعني يبقى OK ولا ايه رايكم

اقتباس:

---

المشاركة الأصلية كتبت بواسطة eg_falcon

100 % بس هو السؤال هو الموضوع دا يفرق في ايه غير السعر طبعا يعني انا حفرض مثلا ان الراجل كان مجمعها على ايده مش طالما بتدي نفس الوطائف بنفس الكفائة او حتى اقل بشوية باعتبار عامل الاستعمال و الزمن و كده يعني يبقى OK ولا ايه رايكم

---

أكيد بتفرق
لأنه من رابع المستحيلات أن يقوم السمكري بلحام جزء كامل في الشاسيه بدقة عالية تعيد السيارة لأصلها
وبالتالي ينتج عن عدم الدقة إختلال في توازن السيارة
ممكن تاكل كوتش أو تحدف مع السرعة
لذلك لابد أن يظهر عيب سيارته عند البيع
أنا سألته هل هي فبريكة
قال فابريكة الفابريكة
وطلع كذاب
والحمد لله الذي نجاني منه