طريق الموت الزعفران/ الكريمات

**waelwael** · 30-03-2009 07:49 PM

بما إنى مخطط للتوجه بالسياره لمدينه الغردقه فى القريب إن شاء الله إرجو من الساده الذين مروا على ذلك الطريق الذى لا تخلو الصحف إسبوعيا عن حادثه بشعه عليه إخرها السياح الروس الأسبوع الماضى ومع الأخذ فى الأعتبار إنى لم إسير عليه قبل ذلك إرجو النصيحه من إصحاب الخبره علما بأنى من محافظه بورسعيد ولكم الأجر والثواب

نقل لدليل الطرق بمعرفتى

مشرف المنتدى العام

**mshamy** · 30-03-2009 09:05 PM

لو حتسافر من بورسعيد يبقى طريقك للغردقة كالأتي

بورسعيد - إسماعيلية ( المسافة 80 كيلو) السرعة 100 كم /س
الإسماعيلية - السويس (المسافة 80 كيلو) السرعة 90 كم/ س
السويس- العين السخنة (المسافة 60 كيلو) السرعة 90 كم/س
العين السخنة - الزعفرانة (المسافة 70 كيلو) السرعة 90 كم/ س و الطريق شديد الخطورة لوجود كثير من المنحنيات
الزعفرانة - رأس غارب (المسافة 120 كيلو) السرعة 110 كم/س
رأس غارب- الغردقة ( المسافة 140 كيلو) السرعة 110 كم/س

السرعة داخل الغردقة 60 كم /س

رحلة سعيدة إن شاء الله

**waelwael** · 30-03-2009 09:40 PM

إبن بلد صحيح شكرا لك جزيلا

**M.Osama** · 30-03-2009 09:50 PM

العين السخنة - الزعفرانة (المسافة 70 كيلو) السرعة 90 كم/ س و الطريق شديد الخطورة لوجود كثير من المنحنيات

شديد الخطوره جدا جدا جدا ومنصحكش تزود السرعه فيه عن 70 كيلو ومتحاولش تتخطي اللي قدامك اطلاقا فمنحنيات لان الطريق فردي يعني الناس جايه فوشك ومتسافرش عليه بالليل لان معليهوش اي نوع من انواع الاضاءه

**akram2025** · 30-03-2009 10:26 PM

بما إني عايش قي الغردقة فأولا أنصحك بعدم السفر ليلا و محاولة السفر في ضوء النهار من أول الطريق لآخره
الوصلة الأولي من القطامية للعين السخنة لو هتسافر من القاهرة ممتازة و السرعة القصوى فيها 120 كم و بما إن الوصلة مريحة و منحنياتها قليله جدا و الطريق عريض فده سبب قوي إنك تركز كويس في الطريق علشان ما تنعسش أو العربية تسرح منك بسبب الاسترخاء قي الطريق المريح ده... وفي اول الطريق طبعا الكارتة بخمسة جنيه للملاكي... غالبا بيكون في رادارقبل نهاية الطرق ب 15 أو 20 كم
بعد كده الوصلة التانية من العين السختة للزعفرانة و دي أصعب ما في الطريق بسبب المنحنيات الخطرة و السرعة لا تزيد عن 90كم بس أنصحك بقيادة هادئة جدا و ضع في إعتبارك إن في أي منحنى ممكن تلاقي عربيةة بتتخطى عربية تانية و داخلين عليك و ده بيحصل كتير بسبب غباوة بعض السائقين عشان كده خليك دائما قي الطرف الأيمن من الطريق... و أوعى تسرح مع البحر أو الشاليهات الجديدة و بورتو السخنة حتى لا تفقد تركيزك في القيادة.. يصراحة المناظر روعة بس إنت ممكن تقف في بورتو السخنة تشرب قهوة في أي كافيه من الجداد اللي هناك و تتمتع بالهدوء و المنظر الخلاب.
بعد كده وصلة الزعفرانة-رأس غارب و دي الطريق فيها برضه مريح و السرعة 110 كم حتى الغردقة
أخر وصلة هي رأس غارب الغردقة مرورا بالجونة وبرضه وصله حلوة و مريحة بس بتحس إنها طويلة جدا لأنها أخر وصله و بالفعل أطول وصلة!! حوالي 140 كم متهيألي
و نصيحة أخيرة التركيز في القيادة أهم شئ... و توصل بالسلامة
يا رب أكون قدرت أديك معلومات مفيدة

**Samir Elshahawy** · 31-03-2009 01:39 AM

أهم حاجة فعلا هي طريق السخنة/الزعفرانة
طول الوصلة حوالي 70 كم لكن بما انك ستقود عليها لأول مرة أنصحك بالاتي:
1- تجنب القيادة الليلية بهذه الوصلة
2- الألتزام بالسرعة المقررة (90 كم/ساعة)
3- الحذر بالمنحنيات ( 60 كم/ساعة)
4- عدم تخطي السيارات التي أمامك الا عند الضرورة القصوي مع مراعاة أن تكون كاشف الطريق بشكل جيد جدا
5- أحذر من سيارات النقل التي تعبر الطريق بالعرض في مناطق الانشاءات بالقري الجديدة
6- أحذر من العمال الذين يقطعون الطريق بالعرض
7- أثناء ذهابك الي الغردقة هناك مجموعة من المطبات و الحفر علي اليمين بعد بورتو السخنة فأحذرها

أما بعد الزعفرانة فأحذر من الرادار قبل رأس غارب بحوالي 15 كم
و عند رأس شقير هناك رادار صباحا
و عند جبل الزيت رادار ليلا
و قبل مدخل الغردقة بحوالي 30 كم رادار أخر

و ربنا يسلم لك طريقك و تستمتع بالغردقة

**ussamalh** · 05-04-2009 09:42 AM

وللعلم برده نصيح من اخ انا كنت لسه ماشى على الطريق قريب جدا

فول العربية لو عاوز 92 من موبيل الى عند الزعفرانه لان مفيش غير 92 نضيف الا فى الغردقة و جنبها الريست بتاع صحارى الريست النضيف لو انت مش هتريح فى بوروتو السخنه .
و حاجه كمان بعد ما تخلص الملفات بتاعت الزعفرانه و لسه الطريق مفرد برضه قبل الكمين بتاع الزعفرانه فى الاتجاه الى رايح الغردقة فيه حفره محترمه و كل النقل بيتجنبها فتلاقى النقل فوشك عشان يفادى الحفرة .
وربنا يسلم طريقنا جميعا و نتمالك اجازة سعيدة ان شاء الله

**ahmed_h_g** · 23-04-2009 12:02 AM

المشاركة الأصلية كتبت بواسطة M.Osama

شديد الخطوره جدا جدا جدا ومنصحكش تزود السرعه فيه عن 70 كيلو ومتحاولش تتخطي اللي قدامك اطلاقا فمنحنيات لان الطريق فردي يعني الناس جايه فوشك ومتسافرش عليه بالليل لان معليهوش اي نوع من انواع الاضاءه

مش أخطر من طريق الأسماعيليه أنا من رأس غارب وكل أسبوع عليه والحمد لله طريق جميل .