-
صباح الخير
صباح الخير عليكم وكل سنه وانتوا طيبين ، ان شاء الله رمضان يبقى سعيد عليكوا كلكوا.
انا نشرت امبارح اعلان عن بيع سيارتى 127 ، والحقيقه ان العربيه زى الفل معايا بس لايخفى عليكوا ان اى عربيه مستعمله لازم من وقت للتانى يبقى ليها زيارات للميكانيكى وانا بنت والحقيقه انى خبرتى برضه على قدى فى موضوع العربيات ده مع انى بحبها جدا والميكانيكيه انتوا عارفينهم اول مابيشوفوا بنت وكمان معلوماتها على قدها خلاص الموضوع انتهى ، انا عايزه اقولكوا انى صرفت على العربيه بتاعتى حوالى 3000 جنيه هما صحيح فرقوا جدا فى العربيه بس احساسى بيقولى ان الفلوس ديه كان ممكن تعمل اكتر من اللى عملته بس الحمد لله على كل حاجه ، اللى انا عايزه اسال عليه دلوقتى لو اخدت رايكوا فى هل ماابيعهاش واصرف عليها تانى بتوجيه منكوا ايه اللى اعمله ، ولا ابيعها واخلص من وجع الدماغ ومشاوير الميكانيكيه . الحقيقه انا كنت هاخد فلوسها احطها مقدم فى ماروتى ، بس صعبان عليا المشوار اللى مشيتوا معاها انا تقريبا عملت منها عربيه وبقت زى القمر على اد امكانياتى ، ياريت تفيدونى برايكوا . انا شايفه ان ماشاء الله فى خبرا فيكوا وبتراعوا ضميركوا فى اللى بتقولوه . شكرا :roll:
-
صباح الخير.. علشان اراعي ضميري هقولك بيعيها وهاتي ماروتي زيرو او حتي مستعمل من موديل 2000 لما بعدة افضل 1000 مرة من الـ127 اللي فات عليها على الاقل 20 سنة فمدام هتصرفي يبقي تجيبي حاجة احدث افضل "بس لو مستعمل تكشفي على العربية في بنزينة او عند ميكاميكي ثقة "ثقة" " او لو هتشتري زيرو يبقى احسن 100 مرة وهتريحي دماغك خالص من وجع القلب "مع اني مش بحب الاقساط".
وربنا يهديكي للي فية الخير ان شاء الله.
-
انا كان مع والدتى عربية 127 و رغم العشرة لكن انا زهقت كل شوية واخد والدتى للميكانيكى او الكهربائى، و اخير اقنعتها راحت بعتها و حاليا هى ناوية تجيب سوزوكى التو ، فراى بيعيها احسن و ادفعى مقدم فى عربية جديدة و اذكر ان الشاريد كان فى تقسيط من التوكيل نفسه
-
ميرسى على الاهتمام
ميرسى ا/ نادر ، ا / مينا على اهتمامكوا ، توكلنا على الله انا هبيعها انشاء الله هنزل اعلان فى الوسيط الجمعه اللى جايه . وربنا يقدم اللى فيه الخير ، تفتكروا اروح بيها سوق السيارات اللى فى مدينه نصر؟ ولا بلاش بيقولولى ان المكان هيبقى مليان سماسره وهيخسفوا بيها الارض . :(
-
حيث كون حضرتك بنت ومش حمل بهدلة الميكانيكية والمستوى المهني والاخلاقى المتدني لاصحاب المهن والحرفيين فرايى لراحة دماغك وبيعى 127 وهاتى عربية زيرو على الاقل هتقعدى فترة علاقتك بالعربية كلها مجرد الصيانة الدورية
-
ايوة السوق مليان تجار بس وممكن يبزظوا اي بيعة لو كنت متساهلة معاهم، لو انت تقدري تقفي لهم يبقي السوق افضل لانة اكبر مكان تقدري تعرضي فية العربية والمشترين هناك كتير، او ممكن اعلان في الوسيط او تسيبي العربية في معرض تتباع ويخدوا فيها في حدود 250 جنية تبقي تضيفيهم لسعر العربية قبل البيع.
-
بصراحة انا نفسى مكنتش هاعرف اتعامل مع التجار فى السوق احنا بعينها عن طريق الميكانيكى ، و طبع اعلان فى الوسيط كويس و هيجيب ناس كتير او زى ا/ نادر ما قال عن طريق معرض
-
ميرسى ليكوا كلكوا ياجماعه وربنا يسهلها انشاء الله ولو عندكوا حد ابقوا قولولى :)
-
لو انت ساكنة فى حتى مزدحمة ممكن و العربية مركونة تبقى معلقة عليها ورقة للبيع و الطريقة دى تجيب ناس كثير ان شاء الله بدون ما تحتاجى تنزلى السوق
-
علقى اعلان على العربية بيعمل شغل جامد
وطبعا اعملى اعلان فى الوسيط
وربنا يوفقك
Content Relevant URLs by
vBSEO 3.6.0 PL2