نيسان صانى بعد 6000 كيلومتر، لا زلت منبسط منها
حاليا انا مابين ال 6 آلاف وال 7 ألاف كيلومتر
سحب العربية اتحسن عن الأول والموتور بيزداد نعومة مع الوقت
الجير الأوتوماتيك حلو اوى ولا توجد اية ملحوظات من اى نوع عليه
فرق استهلاك البنزين مع او بدون التكييف واضح جدا، يعنى بدون تكييف بتقفل معايا 200 جوة البلد، لكن مع التكييف لو عملت 170 -180يبقى مصلحة
الثبات من احلى مميزاتها، بتمشى على 140 بنفس احساس ال100 فى العربيات التانية، ولما بتتعود عليها ومتخافش من قراءة عداد السرعة بتاخد بيها غزر على 140 كأنك ماشى 80 على عربية تانية
العفشة ماسكة نفسها كويس جدا لكن ناشفة ، يعنى بتحس ان العربية بتتشال وتتهبد مع كل مطب لكن جامدة ومتينة وقطعة واحدة
العربية لما يكون راكب فيها 4 افراد الشكمان بيحك فى المطبات العالية، لكن بشكل غير مقلق لأن الحك ده بييجى فى العلبة الوسطى للشكمان اللى هى فى الآخر صناعة مصرى وسهل استبدالها الى جانب انها اصلا مش بتتآثر بالحك لانها مثبة على وصلات كاوتش بتيخليها تعلى وتوطى
الفرش البيج محتاج حسوكة فى الإستعمال نظرا لسهولة اتساخة( انا لما بكون لابس قميص نص كم بخاف اريح دراعى على الشباك لحسن جلد الباب يعلم من العرق، ولما يكون راكب معاية حد بقول له شيل إيدك من على الباب !!!!!!!!!!!!!!!!!!!!
اللى مضايقنى فى العربية حاجة واحدة، انى مش بفتح الكبوت خالص، مش بلاقى اى داعى لفتح الكبوت ، يعنى انا ايام العربية الشاهين كت موسوس-برغم ان السيارة الشاهين كانت ممتازة، لكن الوسوسة كان سببها الأساسى ان العربية قليلة فى عيون ناس كتير لا تعرف عنها سوى شكلها الخارجى وبناء عليه حكموا عليها انها سيارة سيئة، وده كان سبب انى كنت بخاف عليها جدا واى تغير فى اى حاجة او اى صوت غريب او ذبذبة مش طبيعية افتح الكبوت وافك واركب واظبط- لكن فى النيسان انا مش شايف اى لزوم لفتح الكبوت نهائيا، لدرجة انى اكتشفت انهم فى التوكيل غسلوا الموتور بعد ما كنت عملت الصيانة بشهر تقريبا لما واحد زميلى كان عايز يتفرج على الموتور بتاعها ففتحت الكبوت وفجئت ان الموتور اتغسل من قبلها بشهر فى الصيانة
الصاج زى كل اليابانى، صاج مرن لكنه خفيف، يعنى الخبطات الضعيفة متعلمش فيه خالص ، لكن طبعا خبطة جامدة شوية بتعلم فيه
Re: نيسان صانى بعد 6000 كيلومتر، لا زلت منبسط منها
اقتباس:
المشاركة الأصلية كتبت بواسطة sab3aawy
ولما يكون راكب معاية حد بقول له شيل إيدك من على الباب !!!!!!!!!!!!!!!!!!!!
طيب ما تشيل معاك بتوع من اللى الموظفين زمان كانوا بيلبسوها فى دراعهم :lol: :lol: :lol:
معلش يا ابو السباع القافية حكمت