(( رابطة الاسطورة فيات 131 ))

**michohat** · 22-05-2010 12:05 AM

الحمد لله يا جماعه النهارده عرفت اهرب من الشغل شوية واخيرا اخدت يوم جمعه اجازة وقولت لازم مش اضيعه على الفاضي فقولت لازم اهتم شوية بالعربية فكان عندى عوامه البنزين شغاله (بس مش بتعلم صح ) مع ان الكهربائي كان مركب واحده جديده وكنت رحت للكهربائي تانى علشان يضبطها وفكها و ركبها تانى وبرضه نفس النتيجه المهم قولت لازم احط حد للموضوع ده بنفسي (يعنى بصفتى خبير نووي ههههه) نزلت بعد الجمعه فكيت العوامه ورفعتها فى الهوا جنب العوامه القديمه و فحصتهم مع بعض و بنظرة ثاقبة ( مقتبسها من ادهم صبري) عرفت فين العله اتاري العوامه الجديده تصميمها مش زي العوامه القديمه العوامه الجديده نفس طول العوامه القديمه اه والعلبه بتاعتها مكتوب عليها بالعربي انها تركي ( اقطع دراعى انها صينى) و انها لفيات 131 بس فيه اختلافين جوهيرين بينهم هما الاتنين
اول اختلاف ان اماكن اخرام المسامير اللى بتستخدم لتثبيت العوامه فى التنك مختلفة عن اماكن الاخرام فى العوامه القديمه ( اختلاف مش باين قوى ولكنه مع الاختلاف التاني يأكد ان الناس اللى بيصنعوا دول ناس ولاد حلال )
ثانى اختلاف هوا فى تكسيحه العوامه نفسها و اتجاهات لوى الماسورة اللى فيها مختلفة تماما عن العوامه القديمه ( ربنا يرحمنا من الصينى والغش والغشاشين)

وبجمع الاختلافين مع بعض نشوف ان بتسقيط العوامه الجديده فى التنك و ادخال اخرام العوامه فى مسامير التنك فان اتجاه العوامه هنا جوه التنك يكون مختلف عن مكان القديمه ان سقطناها مكانها و كمان اختلاف اتجاهات لويات ماسورة العوامه فكده نلاقى ان بالونه العوامه بتخبط فى جدران التنك ومش واخده راحتها فى الصعود او النزول وعلشان كده القراءة ثابته عندى

فكان الحل انى كسحت ماسورة العوامه الجديده وخليت اتجاهات ثنى الماسورة اشبه بالماسورة فى العوامه القديمه وظبط حركه البالونه واتاكدت ان مفيش حاجه من اللى عملته واقفة فى سكتها وهيا طالعه او نازله و توكلت على الله وركبت العوامه
والحمد لله اشتغلت وقرأت بس مديه قراءة زياده شوية و رحت فولت العداد رفع معايا وكله تمام الحمد لله مستنى لسه بقى لما امشي بيها والبنزين يقل من التنك واشوفها هتفضل شغاله ولا ايه

موضوع العوامه ده رحت فيه ل 2 كهربائية والاتنين مش كانوا ملاحظين العيب ده وكانوا بيقولوا ان المكبس هوا اللى بايظ

الحل ده لجأت له بعد ان دورت عند بتوع قطع الغيار عن عوامه تكون ايطالي او محترمه وبنت ناس ومش لاقيت واحد بس قال لى ونصحنى وقال كل اللى فى المحافظة صينى مهما اتغيرت العلبه

الجزء ده خد وقت معايا لحد الساعه 3 كده قولت اكمل بقى رحت طالع على البنزينه اغسل العربية غسلتها ورجعت البيت وناوي اديها وش شمع لقيت العربية مجيرة ( الواد مش شطفها كويس ) وكمان لقيت الطبه اللى فوق عصايه الفيتيس اللى محفور عليها النقلات مكسورة و متفتته لميت اللى قدرت عليه منها بغرض انى اشوف اعمل فيها ايه لانى كنت سئلت قبل كده عليها لانها كانت مشروخه عندى وكان الراجل قالى لى انها مش بتتباع لوحدها و بتشتري عصايه الفيتيس و قال لى انها ب 75 جنيه فطبعا هشترى العصايه علشان حته الفبره ده المهم ربنا كريم و عرفت اجمع تقريبا كل القطع اللى وقعت و خدتها البيت و لزقتهم فى بعض تانى و قوتها من الخلف بقطعه منديل و نقطت عليها امير فبقت ماسكه كويس وركبتها
نرجع بقى لانى لقيت العربية مجيرة رحت طالع جايب جردلين وماسك العربية غسيل تانى خلصت الغسيل و نشفتها و اديتها وش الشمع التمام الحمد لله خلص قبل المغرب ما يدخل بفتره كبيرة و استغليت فتره الشمع ينشف فى انى ارتب الشنطه والصالون ( وانا بكتب دلوقت افتكرت انى نسيت ارتب درج التابلوة)
و خلصت الموضوع كله الساعه 5 او 6 و نيمتها فى الجراج وادينى معاكم اهه بعد ما ارتحت شوية

الا بالحق عاوز اخد رأيكم فى المكان اللى ألزق فيه استيكر المنتدى ان شاء الله هلزقه على الزجاج الخلفى بس محتار فى المكان اللى احطه فيه مش عاوزه يعاكسنى فى المرايه ولا يشاكس رجال المرور
انا ميال لانى احطه فى اسفل الزجاج من اليسار ورا مسند الرأس بتاع الكنبه علشان مش يضايقنى فى المرايه

و برضه شايف ناس لازقة الاستيكرات فى منتصف اسفل الزجاج

وشفت ناس تانيه لازقينه فى منتصف اعلى الزجاج

ايه رايكم ؟

**lord777** · 22-05-2010 09:34 PM

بالمناسبة لسه قارىء هذا الموضوع حالا بالصدفة بعد ما عربيتى اتغسلت ب 1/2 ساعة شوف الصدف كلهل غسيل ههههههههه و بعد ما قرات موضوع الاخ مجدى

يعتنى معظم مالكى السيارات بغسل سياراتهم لجعلها دائما براقة وذات منظر جذاب، وعادةً ما يلجأ أغلبهم إلى محطات الخدمة من أجل تنفيذ هذا الأمر الذى يعتبرونه شاقا ومتعبا، ولكن هناك بعض الخطوات التى يمكن اتباعها ليصبح غسل سيارتك أكثر سهولة وربما ممتعاً.

فى البداية، يجب مراعاة أن تكون السيارة باردة بعيداً عن حرارة وضوء الشمس المباشرين، بالإضافة إلى وجودها فى مكان محمى من الغبار، كما يجب استخدام ماء نظيف مع اختيار نوع جيد من الصابون، ويفضل الشامبوهات التى تعطى رغوة وفيرة، حيث إن تلك الشامبوهات متوفرة فى معظم محطات البنزين.

من جهة أخرى، يجب الابتعاد عن استخدام صابون غسل الأوانى أو الصابون السائل عند غسل السيارة، لأن تكرار الغسل بهذه الأنواع يؤثر على جودة طلاء السيارة ويجعله عرضة للخدش عند التعرض لأقل احتكاك.

وعند بداية عملية الغسل، تكون البداية برش السيارة بالماء النظيف ثم استخدام قطعة إسفنج مخصصة لغسل السيارة بعد وضعها فى الماء ووضع الصابون المخصص للغسل عليها، ثم يتم تنظيف السيارة من الأعلى أى بسقف السيارة أولا ونزولا الى أسفل.

بعد ذلك، يفضل وجود قطعتين من القماش الخاص المستخرج من جلد الحيوانات، حيث يتم استخدام القطعة الأولى لتجفيف السيارة، والثانية لتلميعها، ولا بد أن تجفف السيارة تماماً من الماء، خاصة فى الأماكن التى يصعب الوصول إليها مباشرة، وذلك باستخدام قطعة من القماش تقوم بامتصاص الماء من تلك الأماكن، وبعد انتهاء عملية الغسل يفضل قيادة السيارة فى الهواء لمسافة محدودة حتى يتم التخلص من أى بقايا للماء يمكن أن تؤدى إلى صدأ هيكل السيارة.

**lord777** · 22-05-2010 09:55 PM

على فكرة انا استخدمت فى الغسيل شامبو للتنظيف و التشميع قرات عنه فى هذا المنتدى اسمه رابيدو و اشتريته من كارفور ب 4.5 جنيه ويوضع 50 ملى على جردل ماء بعد ازالة الاوساخ عن السيارة وشطف السيارة بالشامبو ثم ماء نظيف و تنشيف
العبوة 250 ملى

**lord777** · 22-05-2010 09:59 PM

الاخ مجدى رجاء شرح ما هو المستخدم لسيارتك من الشمع
اسمه
طريقة الاستخدام
هل اول مرة تستخدمه و لا من زمان
ثمنه
اماكن البيع

**lord777** · 22-05-2010 10:13 PM

صورت لكم الشامبو المستخدم فى الغسيل و هو هاااايل

**sansan** · 23-05-2010 12:59 AM

- اسم العضو /احمد الخطيب
2- مهنة العضو / مامور ضرائب
3- سن العضو /29
4- مكان اقامة العضو / قنا - نجع حمادي
5- سنة صنع السيارة 131 (ان وجد ) عدد السيسي/ مو 1977 - 1600 cc
6- صورة للسيارة
7- سبب امتلاك سيارة 131 (ان وجد )/ علشان قطع الغيار متوفرة جدا
8- هل توجد سيارت اخرى (ان وجد )/ لا ربنا يكرم
9- الحالة العامة للسيارة فيات 131 ( ان وجد )/ الحمد لله اصيلة

اولا السلام عليكم ثانيا انا معيا فيات 131 مو 77 موتور ثمانينات 1600 cc عندي العربية علي التاني اخره 40 و الموتور يصرخ والثالث اخره 70 والموتور يزعقك والرابع اخره 100 والخامس اخره 110 وبعدين شكرا كدا اخر الاسبراتير علي الاخر ارجو من اي احد يملك 131 ان يقولي علي سرعاته علي الفتيس علشان اعرف هو كده كل ال 131 ولا انا وبس علشان اظبطها ولا اغيرها وشكرا وبارك الله فيكم

**michohat** · 23-05-2010 02:07 AM

بستخدم رابيدو فى غسيل السيارة مع ملاحظة ان الرغاوى قلت المرة دى عن قبل كده ( كنت شاري الزجاجه القديمه من حوالى سنه ) وبشتريه من كارفور
بالنسبه للشمع مش فاكر نوعه ايه الحقيقه هصورة و ان شاء الله انزل صورته وكنت شاريه من بنزينه وطنيه والاعضاء بتقول ان فى انواع تانيه مشهورة (راجع الروابط المرفقة)
هوا فى الاول غسلت العربية برابيدو و سبته على العربية شوية زى ما الاخ توت عنخ امون ما بيقول فى موضوعه http://www.nilemotors.net/Nile/17905-a.html
وبعد كده شطفتها
(قبل كده كنت بستخدم كميات مياه كبيرة للغسيل والتشطيف ولكنى المره دى استعملت جردلين مياه فقط واحد للغسيل والثانى للشطف لانى اتعلمت طريقة من اللى بيغسلوا العربيات فى الشارع وهيا انك ترش العربية بالميه بايدك من الجردل بدل ما تصب عليها الميه يعنى اكنك بتترشها ميه وانت اللى بتتحكم فى كميه المياه و قوه اندفاعها و المنطقة اللى عاوز توصل ليها الميه وانا كنت بركز على السقف علشان اعلى نقطه والميه نازله بتاخد اللى فى طريقها معاها بس لسه عاوز اوصل لدرجه الاجاده انى اغسل العربية بجردل واحد بس زى ما اللى بيغسلوا فى الشارع بيعملوها نص صابون ولما يخلصوا يحطوا النص الثانى مياه )
ونشفتها كويس بعد كده عملتها ب بولش عادى الرخيص اللى بيتباع مع الكومبوند وسبته شوية لحد ما جير ( زى طبقة صابون مجيرة كده ) البولش استخدمت معاه قطن مع انى اظن انه يدي نتائج افضل ان استخدمت قطعه اسفنج ولكنها مش كانت متاحه عندى وقتها بدئت وزعت البولش بالقطنه و ادهك بيها سطح الصاج وكل شوية اغير القطنه وازود البولش وبعد البولش عملت الشمع وكان بنفس طريقة البولش بس الشمع بيجي ومعاه اسفنجه به فوزعته على سطح العربية مكان مكان و سبته شوية لحد ما شكله جير و شيلته بالفوطه بس اعمل حسابك بعد اللى اتعمل ده ان دراعاتك وجسمك هتوجعك بعدها لفتره

اتعلمت اللى عملته ده من مواضيع موجوده فى المنتدى هنا قام بشرحها شرحاً وافى الاعضاء
من هذه المواضيع والتى انصح بقرائتها للتحضير للتنفيذ

http://www.nilemotors.net/Nile/17905-a.html
http://www.nilemotors.net/Nile/23055-a.html
http://www.nilemotors.net/Nile/95922-a.html

بس النتيجه مرضية وجميله لدرجه ان الغطا وانا بحدفه وانا بغطى العربية بيتزحلق من عليها
و البولش مش عملت بيه الصاج بس عملت بيه النواكل و كنت عاوز ادخل على الازاز كمان بس قولت اخليها فى وقت تانى اكون منظف الازاز كويس
وبعد كده لمعت جسم المرايا باستخدام اسبراي wd -40
ولازم فى الاخر انك تحس فى الصالون ان العربية اتغسلت فطبعا قبل ما تغسل بره المفروض تكون منظف جوه وبعد الغسيل لو تحب انك تلمع التابلوه واى فيبر او جلد جوه بزيت البرافين (بيتباع فى الصيدليات الزجاجه تقريبا ب 4 جنيه بالكتير ) كام نقطه زيت برافين على القنطه ولمع وعيش احساس النظافة واللمعان و جرش العربية و افتح المعطر وقفل العربية وسيبها لحد الصبح (المهم لما تلمع بالزيت الحاجات المتلمعه ما يوصلش ليها تراب الا بعد الزيت ما يروح شوية)
لو حته القطنه اللى فيها برافين لسه معاك ممكن تمشي بيها على الجلد والفيبر الخارجي اللى فى الابواب وممكن الاكصدامات ( ده فى حاله انك بتقفل عليها الجراج علشان مش يوصل تراب للزيت )
دى طريقة غسلتى للعربية لما اكون رايق او اكون عاوز اسلى نفسى واغير من حالتى النفسية

طبعا ما تنساش مع ده كله انك تكون مشغل حاجه تسليك لان الموضوع ده بياخد له 3 - 4 ساعات

مفيش حد قال رأيه اعلق الاستيكر في انهى مكان فى الازاز الخلفى

**michohat** · 23-05-2010 02:13 AM

المشاركة الأصلية كتبت بواسطة sansan

- اسم العضو /احمد الخطيب
2- مهنة العضو / مامور ضرائب
3- سن العضو /29
4- مكان اقامة العضو / قنا - نجع حمادي
5- سنة صنع السيارة 131 (ان وجد ) عدد السيسي/ مو 1977 - 1600 cc
6- صورة للسيارة
7- سبب امتلاك سيارة 131 (ان وجد )/ علشان قطع الغيار متوفرة جدا
8- هل توجد سيارت اخرى (ان وجد )/ لا ربنا يكرم
9- الحالة العامة للسيارة فيات 131 ( ان وجد )/ الحمد لله اصيلة

اولا السلام عليكم ثانيا انا معيا فيات 131 مو 77 موتور ثمانينات 1600 cc عندي العربية علي التاني اخره 40 و الموتور يصرخ والثالث اخره 70 والموتور يزعقك والرابع اخره 100 والخامس اخره 110 وبعدين شكرا كدا اخر الاسبراتير علي الاخر ارجو من اي احد يملك 131 ان يقولي علي سرعاته علي الفتيس علشان اعرف هو كده كل ال 131 ولا انا وبس علشان اظبطها ولا اغيرها وشكرا وبارك الله فيكم

مرحبا بك يا استاذ احمد نورت الرابطه
بالنسبه لسرعات النقل مش لاحظتها فى عربيتى الحقيقة لانى مش حاولت اجيب اخر الغيار دايما بنقل ليها قبل ما صوتها يعلى
ان شاء الله ندور على المعلومات دى على الانترنت ونشوف النتيجه ايه

**michohat** · 23-05-2010 02:20 AM

اسف نسيت اقول ان ثمن الشمع كان لا يزيد عن 30 جنيه و دى المره الثانيه اللى استخدم فيها العلبه لانها مش خلصت من المره الاولى وفاضل فيها كمان اظن يكفى مرتين كمان

**michohat** · 23-05-2010 02:34 AM

الموقع ده فيه جدول اعتقد انه زمنى يوضح النقلات فى الفيتس ال 4 غيار وال 5 غيار

http://www.mirafiori.com/faq/..........1transswap.htm

للأسف مش عارف ادرج فى المشاركه الجدول

لقيت معلومه كمان عن زيت الفيتيس مكتوب انه sae 15w/40
وان الفيتس ال 4 غيار بياخد 1.35 لتر زيت
والفيتس ال 5 غيار بياخد 1.80 لتر زيت
ده اللى عرفت اوصل له لحد دلوقتى

الموضوع: (( رابطة الاسطورة فيات 131 ))

LinkBack

أدوات الموضوع

عرض

-

-

-

-

LinkBacks (?)

â€«ط±ط§ط¨ط·ط© ط§ظ„ط§ط³ط·ظˆط±ط© ظپظٹط§طھ131 | Facebookâ€¬

â€«ط±ط§ط¨ط·ط© ط§ظ„ط§ط³ط·ظˆط±ط© ظپظٹط§طھ131 | Facebookâ€¬

المواضيع المتشابهه

رابطة الوحش فيات لينيا

رابطة مالكى الاسطورة لوجان بالاسكندرية

رابطة فيات فلوريدا

احتفال(( رابطة الاسطورة فيات 131)) بالسنويةالاولى

كتالوج الاسطورة فيات 131 الاصلى

الكلمات الدلالية لهذا الموضوع

المفضلات

المفضلات

ضوابط المشاركة