أمى تسلم عليكم وتقول عندكم .... طماطم....

**Terrible_DaRsH** · 01-04-2009 05:36 PM

والله نفسي اولع فى جيرانى واشوفهم والعين كده :)

دى عالم زى الزفت عايزة الحرق و الله ..

هخبط عليهم واقولهم امى بتسلم عليكم وبتقولكم اشوف فيكم يوم :(

**aif** · 01-04-2009 05:41 PM

المشاركة الأصلية كتبت بواسطة الطنطاوي

في هذا الزمن الشقة مقابل الشقة ولا يعرف أحدهما إسم الأخر

كم منا يعرف جيرانه في العمارة ويعرف ظروفهم

ربنا ينجينا

وفي الأخر نقول

النبي وصى على الجار الأربيعين مش السابع

زمان كنت ساكن في الزيتون .... البيت 12 شقة منهم واحدة مكتب الشئون الاجتماعية وال 11 الباقي شقق سكان
كنت عارف جيراني كلهم بدون استثناء ... والجيران اللي في معظم العمارات المجاورة .... وكنت اعرف اقاربهم و اصدقاءهم و كل كبيرة وصغيرة عنهم
حتى موظفين مكتب الشئون الاجتماعية كنا عارفينهم .... وكانو يبعتو لأي جار ياخدو من عنده مياه ساقعه ....
.....
انا دلوقتي ساكن في عمارة بها حوالي 50 شقة من 12 سنة ... طبعا اعرف كتير جدا معرفة بسيطة ... سلام وتحية وخلاص
لكن اللي اعرفه بجد ويعتبر جار بحق الكلمة .... واحد بس

**husseinodeba** · 01-04-2009 10:18 PM

يا جماعه دى مشكله المدن اما فى الارياف الوضع يختلف
روحو كده الارياف ....هتلاقو الكلام ده موجود واكتر
يعنى مثلا الناس هناك عارفين بعض كلهم ... لو رحت اى قريه وسالت انا عايز اروح بيت فلان ابن الحج فلان هيوصفولك البيت لوبعيد ..ولو المسافه صغيره هتلقيهم بعتو معاك عيل صغير يوصلك لحد البيت
وطول ما انت قاعد تلاقى ناس غريبه داخله تسلم عليك من الجيران وجيران الجيران ..ماانت اذا كنت ضيف على واحد فى البلد تبقى ضيف على البلد كلها
فيه حاجه تانى ....
فى المدينه تلاقى كل واحد دخل بيته وبسرعه قفل الباب .... انا للاسف بعمل كده
بس فى القرى تلاقى دايما باب البيت مفتوح .. والناس رايحه جايه تسلم على بعض وتعزم على بعض

المدينه ..... الماده
الريف ... الاصول والموده والواجب والكرم و....
امى بتسلم عليكى وبتقلك ..تسلم ايدك على الموضوع القييم ده
واعتقد ان احنا فى المنتدى هنا بنطبق نظريه ...امى بتسلم عليكى ... يعنى انا لما بكون محتاجه حاجه بخبط على باب المنتدا واسال عليها وبصراحه فيه ناس كتير بتفتحلى الباب وبتدينى مسالتى
شكرا مره اخرى على الموضوع

**abdalla45** · 02-04-2009 12:03 AM

هو كان موضوع مهم قبل كده نظرا لحاجة ام محمد لبصله من ام حسين عشان تكمل الطبخ قبل ميرجع ابو على من الشغل عشان ميعكننش عليها ويبعتها بيت ابوها فى سرفيس لكن الوقتى اعتقد الدنيا خيرها قل قل جو الناس بس ام محمد خيفا تروح لام حسين تروح جيالها تانى يوم تاخد بصلتين عشان الفوايد او تلسن عليها فى الراحه والجايا وممكن يسموها فى الشارع ام بصله وممكن ابو على يجيب اكله حلوه فى يوم وهو جاى فهتضطر تنزلها حاجه مهى اكيد هتشم الريحه وهتسيح فتقول اريح دماغى وكمان كدا كدا ابو على معتش هيفرق كتير لو ملحقتش اخلص الطبخ وفتح بقه هشبشبله

**aif** · 02-04-2009 08:30 AM

المشاركة الأصلية كتبت بواسطة Terrible_DaRsH

هنا بقي مفيش ولا جار عدل كله بتاع مصلحته وخلاص وناس زى الزفت ..

كان جارنا اللى قدامنا بس اللى كويس وربنا يرحمه بقي . بالرغم انه كان مسيحى الا انه كان اجدع جار قابلناه هنا ...

والله يا درش احنا كان الجيران في بيت العيلة زمان ... كان 6 مسيحين و 5 مسلمين ....
كنا فعلا مش بنلاحظ الموضوع ده الا وقت العبادات ....والاعياد كانت بتبقى اعياد للكل .... كله بيعيد ويلعب ويأجر عجل ويفرقع بمب ويجيب هدوم جديدة
الكلام ده حقيقي مش شعارات
دلوقت اللي علي نفس الدين والمذهب اصبحو مش طايقين بعض
العيب في النفوس .... والضغوط اللي بنعيشها يوميا

**msobhy** · 02-04-2009 01:55 PM

المشاركة الأصلية كتبت بواسطة powerofhelll

انت عارف لو كلنا اعتبرنا جرينا زي العيله تمام ابوك و امك و اخوك و اختك و عمتك وعمك كلنا هنبقي مش خيفين من حاجه و هنحس بشعور طمئنينه رهيب
ممكن طلب صغير
تحجزلي الشقه الي جنبك علشان لما اتجوز

كلامك صح بس السؤال هل الناس هاتراعى انى باعملهم زى عائلتى ولا هايستغلونى بصفتى لقطة بالنسبه ليهم؟
بخصوص الطلب - طلب مرفوض ياسيد / الاستاذ اخويا سبقك واللى سبق اكل النبق
وابقى فوت علينا بكره