فاكر اول مرة سوقت فيها.ايه بقى اول مصيبة عملتها ؟؟؟؟

**himatros** · 01-04-2009 12:57 PM

بسم الله الرحمن الرحيم

اكيد طبعا فاكرين اول مرة سوقتوا فيها عربية وكمية المصايب والمشاكل اللي الواحد عملها وياسلام لو كان ابوك جنبك ياعيني هتاخد على قفاك لحد متقول انا رايح اسوق العجلة بتاعتي احسن
ابدا بنفسي :
اول مرة سوقت سواقة حقيقة كنت مع بابا الله يرحمه بييقولي وديني البيت واحنا كنا بعيد عن البيت بحوالي 2 كيلو
قلت يلا وبدات الملحمة مشيت نص الطريق حلو وجيت في شارع ضيق كده فيه عربية نص نقل واقفه ويادوب في حته كده تعدين يعني انا لازم اعدي من وسط البيت والعربية
وانا داخل المغارة دي عملت حسابي من البيت ومعملتش حسابي من العربية رحت جاي خابط العربية من ورا وياريت اللي جرى ماكان رحت جاي كاسر فانوس العربية اليمين والمكان بتاع الفانوس اطبق جوه شوية طبعا بابا عمال يقول وقف وقف وقف وقف وانا ماشي ولكانني في (واادي النسيان) لحد مخبط راح جاي نازل وقالي وسع يله انا اسوق المهم قربنا البيت والله بقوله يابابا انا قولتلك مش عاوز امشي من الشارع ده......
رحت مستقبل منشيت امريكاني من بتوع ريك فلاير على صدري وقالي (اخررررررس خااالص)..
وعدت على خير
قولولي بقى ايه تجاربكم الاولى ........

**Chucky** · 01-04-2009 01:23 PM

احنا ساكنين فى بيت عيلة و عندنا جراج فى البيت و كنا راكنين فيه العربية

المهم انا كنت لسة يا دوب اعرف النقلات بالعافية و العيلة كلها راجعيين من صلاة الجمعة و اللى كان خارج ساعتها بيخرج العربية بتاعته من الجراج

المهم الكل واقف قدام الجراج و والدى قالى خرج العربية من الجراج و انا اقوله بلاش يا بابا و هو يقولى امشى روح خرجها... المهم طبعا مكنش قدامى غير انى اخرجها

روحت زى الشاطر مدور العربية و بدوس بنزين بقى و برفع رجلى من على الدبرياج بشويش زى ما انا متعلم و قولت لازم ابينلهم انى سواق ايه محصلش

و ابص الاقيلك العربية مرة واحدة صوت الموتور بقى عالى جدا و العربية كانت شوية و هطير من على الارض و راحت طالعة بسرعة جدا و ابص اكتشف ان الدركسيون لافف على ناحية الحيطة و كنت هدخل فى الحيطة المهم طبعا بعدل الدركسيون بسرعة و كل ده و العربية ماشية و نسيت خالص الناس اللى واقفة قدام الجراج و طبعا العربية طالعة صاروخ من الجراج و مش عايز اقولك على اللى شوفته بقى

ناس بتتحدف هنا و هناك و اللى عمال يزعق وقف وقف دوس فرامل حااااااااااااااسب... كنت حاسس انى محمود عبد العزيز فى فيلم الكيت كات بس بدل ما هو كان سايق فيزبا انا كنت سايق عربيتنا

و سبحان الله برضو نازل بقوله نفس الجملة اللى انت قولتها... انا قولتلك مش عايز اطلع العربية من الجراج و تقريبا كان نفس رد الفعل بس كان زيادة عليه ان والدى مفكرش يقولى طلع العربية من الجراج لمدة 3 سنين بعدها

**pedooooo** · 01-04-2009 01:44 PM

انا اول مره سوقت فيها كنت مسافر انا وبابا واعدت اتحايل:10D5C8~1107: عليه عشان اسوق وكان معانا اياميها عربيه اكسيل اوتوماتيك المهم بعد ما اتحيلت عليه شويه نزل وخلانى اسوق ومشيت زى الفل بالعربيه لحد ما وصلنا للمكان اللى كنا رايحينه ولحد دلوقتى كله تمام جيت بقى قدام اصحاب بابا وقلت اترسم شويه بقى و اركنلهم ركنه تمام والركنه التمام دى كانت بخبط لرفرف والاكصدام من الناحيه اليمين
و مقولكش بقى بابا ضربنى حتت علقه بس كنت ساعتها فى اولى اعدادى بس الحمد لله عدت على خير

**gebreel** · 01-04-2009 01:56 PM

انا الحمد لله هي حاجة واحدة و متعتبرش جامدة كنا بنظبط حاجات في شقة اختي قبل الجواز و كدة و لسة كنت متعلم السواقة جديد فالمهم اتأخرنا و قلنا هنبات بدل مانرجع متأخرين فقلت لبابا انزل اركن العربية في الجراج علشان متتسرقش قالي انزل معاك قولتلو يا راجل شوية ثة بقى دانا طلعت الرخصة خلاص قال طلعت الرخصة قاال ما علينا
نزلت اركنها و قولت اركنها ركنة جامدة بقى و جيت جنب عمود و هركن في الباكية اللي جنبه فدخلت و حكيت الباب الوراني شمال حكة بسيطة و قاعد ابص في المرايا خايف ارجع لانها كانت مقربة خالص من العمود شوية و لقيت بابا نازل و انا حوالين العربية عمال الف بحاول افهم هعمل ايه و هو قالي وسع و ركب و بص بصة واحدة و طلع العربية زي الفل بس كان اللي حصل حصل و من ساعتها كل ماروح لاختي اركن برة

**Fadi Ezzat** · 01-04-2009 02:07 PM

انا بقى حكاية مختلفة انا كنت عمرى ما خبطت العربية فى حياتى كانت كل سواقتى جوة البلد المهم كنت على طول بسوق جوة البلد وحلو جدا وعمر ما العرربية اتخدشت منى
المهم بابا المهم بابا حب يشوف سواقتى حلو ولا لأ طلعنى على طريق مش سريع اوى بس السرعة مثلا الى الناس بتمشى عليها حوالى 40 او 50 كدة يعنى وانا بقى اول لما صدقت قلت خلاص بقى هوريلة الى انا سواق المهم طلعت ولقانى حلو اوى ففرح اوى وقالى تعالى نطلع على السريع قلتلة بلاش انا انا بخاف قالى انت بتسوق حلو خايف من اية والمهم طلعنا على السريع ودعيت لربنا انة ينجينا زطلعنا على السريع وكنت سايق حلو الحمد للة تمام وبعدين قالى ادى الغيارا التالت يالا قلتلة طيب ويارتنى ماقلت كنت وانا بجيب التالت رحت جاى باصص ناحية الغيارات وسبت الطريق :POINTI~2[2]: وهوب لقيت حتة زغروف نزل على افاية كان هيموتنى بيقولى بزعيق بص للطريق ياحيوان طبعا ادايقت بس من ساعتها اتعلمت وخلاص بقى احنا كدة كدة كل عربياتنا اوتوماتيك مش هاخد زغاريف على اافاية تانى

**himatros** · 01-04-2009 03:07 PM

يعني مش انا لوحدي اللي كان بينضرب ههههههههههههه
يله بقة الواحد لازم ياخد على قفاه صح عشان يسوق صح

**yehia** · 01-04-2009 03:36 PM

أول مصيبة كانت بعد ما سوقت بسنتين تلاتة كده ....

هى مصيبة جهل بالطريق أكتر من أى حاجة تانية .....

كان تقريبا 2002 ....على الطريق الدائرى فى الجزء تبع القليوبية وانت رايح على منزل الطريق الزراعى......

ماكنتش حافظ الطريق ولا "ايدولوجية" وضع أكمنة الطرق السريعة اللى انتشرت لاحقا ... انهم يقفلوا كل الحارات ويسيبوا الشمال بس تعدى عربية عربية ......

كنت ماشى على الدائرى بالليل وفاتح السرعة ... لقيت زحمة عربيات قدام ومركزة ناحية الشمال ..والحارتين اليمين فاضيين ... فأخوكم طبعا بكل "نباهة وفطنة" قال أما يعدى منها على بركة الله ....

بعد ما هديت شوية ..... قمت داخل فى الحارة اليمين قوى ولسة بأجمع سرعة تانى ... ألاقى هووب قدامى كشك الكمين وبداية حاجز أسمنتى بعرض الطريق .. رحت مديها فرامل بعمرى كله وطلعت صوت وعفرة طبعا .....

والحمد لله عدت على خير وماحصلش أى حاجة ولا سين ولا جيم ..... مجرد بس الاطلاع على الرخص وكانت تمام

**meromar** · 01-04-2009 07:04 PM

ياااااااااااااة ياباشا انت بترجعنا لاجمل زكريات فحياتنا ...اول مرة سوقت العربية فيها كنت واخدها من ورا والدى وقولت انزل اخد بيها لفة وارجع قبل ميرجع من الشغل..المهم اخدت اللفة ونسيت نفسى والوقت سرقنى وبدل ماخد لفة اخدت 100 لفة وطبعا قولت احط العربية فنفس المكان اللى كانت مركونة فى عشان والدى ميعرفش انها اتحركت من مكانها..اول مصيبة قابلتنى ان مكان العربية اللى كانت مركونة فى اتاخد ...قولت يادى المصيبة روحت فداهية ..المهم قولت اركنها فاى مكان وخلاص لحد مشوف حعمل اية ..المصيبة التانية وانا بركن خبطها فالسور ..قولت يانهار اسود انا ميت ميت..ندخل بقى على المصيبة التالتة وهى انى لما طلعت البيت لقيت والدى رجع من الشغل بدرى غير العادة..وشى طبعا جاب الوان الطيف كلها وقولت تانى انا ميت ميييييييت ومكنتش خالص متوقع انى حعيش بعد اليوم دة ..اول والدى مشافنى راح رافع ايدة وعينكو متشوف الا النورررررررر لاقيت الدنيا ضلمت قدامى ..والله ضلمت بمعنى ضلمت وفين يوجعك بقى والحمدلله عدت بعد تدخل والدتى ربنا يديها الصحة ويخليها يارب ..طبعا المفروض بعد العلقة دى انى احرم ومخدش العربية تانى ..تصدقونى لو قولتلكو انى تانى يوم اخدتها بردووووووو بس الحمدلله رجعتها فمكانها ومعرفش انها اتحركت

-

الموضوع: فاكر اول مرة سوقت فيها.ايه بقى اول مصيبة عملتها ؟؟؟؟

LinkBack

أدوات الموضوع

عرض

فاكر اول مرة سوقت فيها.ايه بقى اول مصيبة عملتها ؟؟؟؟ - انشر الموضوع فى :

-

-

-

-

-

المواضيع المتشابهه

قولنا سوقت ايه

سوقت السيريون

فاكر اللجان الشعبية .. أحكلنا حصل معاك فيها اية ؟

مصيبة كبيرة اغلبنا واقعين فيها و مش حاسين

انا سوقت سيريون

الكلمات الدلالية لهذا الموضوع

المفضلات

المفضلات

ضوابط المشاركة