الموضوع: احزرو يا جماعة من مصيدة العكسي؟

نفس المكان ...بس مش نفس الموقف بالظبط
إللى حصل إنهم كانوا مغيرين نظام الشوارع جديد
و أنا ما أعرفش
لكن لاحظت إن فيه يفط ممنوع الدخول وضعت جديدة على بعض الشوارع بالفعل و كنت ماشى هادىء جدا علشان أستوعب التغيير لكن لما دخلت الشارع ده لم ألاحظ أى يافطات
و اتمسكت بنفس الطريقة.... طلعلى البيه من على الرصيف و نط قدامى لدرجة إنى اتخضيت و وقفت فجأة لإنه فعلا ظهر من العدم كإنه صقر بينقض على فريسته...بس كان فيه ظابط و لجنة فعلا و خلص الموضوع ب 30 جنيه
أنا ما شفتش اليافطة ليه ؟؟.....عربية شيروكى واقفة على الناصية ( الملف ) و كمان صف تانى حنبها عربية نقل بصندوق عالى مغطيين على اليافطة بشكل يستحيل أى حد راكب فى عربية فى الشارع يشوفها....و طبعا مهما تتكلم فى إن فى عربيتين مخالفتين هما السبب و الكلام ده كله مالوش لازمة... ساعتها كانت الغرامة 100 جنيه أفتكر..فأنا قلت اعتبرها غرامة 30 جنيه فورى أحسن من البهدلة بتاعت الاستلام بعد السحب و ال 100 جنيه و طبعا " حسبى الله و نعم الوكيل " أولا و آخرا...

هو الأمين النصاب اللي موجود في دخلة الشوارع اللي عند سوق العصر و مول الكمبيوتر. انا من الشرقية و كنت مرة هناك و لكن قبل القانون المتعدل. و برضوا طلعلي موش عارف منين و بيقولي انت داخل مخالف و لأني غريب و الشوارع بالنسبة لي ملعبكة موش هفتكر فين بالظبط هناك بس هي في الحتة دي، و كل اللي فكره اني كنت متأكد إن مافيش يوفط تمنع الدخول في الشارع و لا هباب.

المهم حضرت النصاب ده قاللي الرخص و من غير ما اسئله ليه دورتله عليهم و اديتهمله و لكن و انا ببص و ببحلق في عينيه و ركنت العربية و نزلتله، قولتله ايه اللي حصل؟ و برضوا وانا ببص في عينيه الاتنين و ببحلق و انا رايحله طلعت الموبايل من جيبي و مسكته في ايدي، قاللي انت داخل مخالف. قلتله مخالف ازاي؟!!! الشارع اوله قدمنا اهه و ما فيش اي يافطة تمنع الدخول قاللي بس هو مخالف، قلتله يا افندم لما يبقى فيه يافطة يبقى مخالف و على العموم انا غريب وشوف حضرتك عاوز تعمل ايه. و ما لمحتيش من قريب و لا بعيد اني ممكن اديله حاجة ولا محتاجة (يعني لو جدع اعملي مخالفة سير عكس الاتجاه) .

المهم حضرته ما عملشي حاجة و قاللي ما عوتش تدخل من الشارع ده تاني و اداني الرخص.

الخلاصة بالنسبة للناس اللي هناك ممكن حد يعمل فيه بلاغ في النيابة و ممكن تبعتوا فيه شكوى في الرقابة الادارية و تتهموه بفرض اتاوات و رشوة هو و الظابط اللي بيقف معاه، لأن شكلها كدة مطبخة مع الظابط. و كمان فيه مصلحة التفتيش في وزارة الداخلية.