الموضوع: تحية لرجال المرور ( المحترمين )

طيب انا كان نفسي احكي موقف تاني من ملازم أول في المرور في مدينة طنطا هو موجود في عند نقطة المرور الموجودة في أول طنطا من على طريق المنصورة. بصراحة رجل محترم جدا و لأبعد حد انا فضلت ادعي له بعد ما سبته. الكلام حصل من حوالي شهر كنت رايح انا و واحد صحبي علشان يجدد ترخيص عربيته ملاكي الغربية و احنا اصلا من الشرقية و دي كانت اول مرة في حياتي اروح طنطا مخصوص.

كنا طبعا رايحين على اساس اننا رايحين المرور باعتبار ان نيابة المرور ممكن تكون موجودة في هناك (زي مرور السلام مثلا ) و على اول طنطا فيه مفارق - طريق على يمين و تاني طوالي - و عنده اتلخبطنا- فقلت لصحبي اوقف مكانك لغاية ما أسأل حد. قعدت ادور على حد واقف أسأله ما لقتشي، و طبعا عيني من الأول على نقطة المرور دي، و لكن من مبدأ الباب اللي يجيلك منه الريح سده و استريح، ما فكرتيش اني اسأل حد هناك. المهم في الآخر قلت يا واد خود بعضك و عدي الطريق و اسأل عند الجماعة بتوع المرور و ربنا يعديها على خير. دخلت على الملازم الأول هناك و سلمت عليه و سألته " من فضلك يا فندم مرور طنطا اروحله منين؟ " الراجل كان قاعد، فراح واقف و مشي خطويتين و شوارلي بأيده و قال " هو اللي هناك ده " و كان بيشارو على البر التاني من السكة الحديد و أعقب و قال " خليك ماشي على طول لغاية ما تلاقي اول مزلقان على شمالك، هتلفله و تعديه و من عناك هتوصل المرور". قلتله انا عاجز عن الشكر يا فندم اصلي كنت عاوز براءة الزمة بتاعت العربية، فرد وقال كدة لاء يبقى لازم تروح نيابة المرور في المحكمة و برضوا شرحلي ازاي اروح المحكمة.

المهم في الموضوع اني حسيت ان فعلاً الراجل ده راجل محترم جداً و لأبعد حد و كان نفسي ابوس على راسه شكراً ليه. حد هيسألني و يقول ليه كل ده، ما هو ده المفروض اللي يعمله. هقول هو كان ممكن يعمل ده بدون اهتمام يعني ممكن و هو قاعد و حتى ما يبوصليش اصلاً يقولي امشي طوالي و ادخل او شمال و هناك اسأل. لكن الراجل تصرف تصرف انساني صرف و ما كانشي قدامي الا اني اخضع لذوقه و سمو اخلاقه.

ضابط شرطة محترم
و عارف هوا واقف في الشارع ليه
حتى لو كان اخد رخصتك (و ما يبقاش غلطان ساعتها) بس قاللك كلمتين كويسين كان برضه يبقى مشكور
الف سلامة على البنوتة
والف شكر للضابط

اضابط الشرطة طلع محترم (رغم إنه كان المفروض مايرجعش الرخص إلا فى حالة طوارئ و هى مش حالة حضرتك) ..
الغلط غلط ... و المفروض عشان حال البل ينصلح يكون فى نظام صارم ..
و المفروض تفرح إن المرة إللى إتقفشت فيها عدوهالك
و ألف سلامة على بنتك