المرور يفشل في أول اختبار لعلاج اختناقات رمضان

12-09-2007 03:36 PM

برضوا تطبيق اللامركزية دلوقتي ممكن يسبب كارثة كبرى عندك مثلا المدن الجديده زي ( مدينة السلام - العبور - النهضة - الشروق ) الطريق الرئيسي ليهم والاوحد هو امتداد جسر السويس والطريق ده لم لا يعلم من اكثر الطرق التي تعاني من مشاكل واختناقات ده غير سطوه اباطرة الاسفلت ( الميكرو والميني باص والاتوبيسات ) علي الطريق واللي ساكن في المناطق ديه عارف الزحمة اليومية بتاعة منطقة المصانع والفاروقية والمزلقان ( سوق القنال) وموقف العاشر ودخلة سوق العبور

فلو المصالح الحكومية ( ولو جزء منها ) اتنقل في حتة من دول هتبقي فيه طااااااااااامة كبرى لان الطرق غير معدة لكده وجانبي الطريق فيهم وحدات جيش ومرافق كذالك الجزيرة الوسطى مع اتساعها

عشان كده لازم تبقي فيه حلول شاملة يعني اكثر من اجراء مش واحد بس

وعلي رائ اللمبي ( يا تعملولهم سندوشتات حلاوة بالقشطة يا توفرلهم الكلة )

**عمرو عبيد** · 12-09-2007 03:56 PM

المشاركة الأصلية كتبت بواسطة Abonora

برضوا تطبيق اللامركزية دلوقتي ممكن يسبب كارثة كبرى عندك مثلا المدن الجديده زي ( مدينة السلام - العبور - النهضة - الشروق ) الطريق الرئيسي ليهم والاوحد هو امتداد جسر السويس والطريق ده لم لا يعلم من اكثر الطرق التي تعاني من مشاكل واختناقات ده غير سطوه اباطرة الاسفلت ( الميكرو والميني باص والاتوبيسات ) علي الطريق واللي ساكن في المناطق ديه عارف الزحمة اليومية بتاعة منطقة المصانع والفاروقية والمزلقان ( سوق القنال) وموقف العاشر ودخلة سوق العبور

فلو المصالح الحكومية ( ولو جزء منها ) اتنقل في حتة من دول هتبقي فيه طااااااااااامة كبرى لان الطرق غير معدة لكده وجانبي الطريق فيهم وحدات جيش ومرافق كذالك الجزيرة الوسطى مع اتساعها

عشان كده لازم تبقي فيه حلول شاملة يعني اكثر من اجراء مش واحد بس

وعلي رائ اللمبي ( يا تعملولهم سندوشتات حلاوة بالقشطة يا توفرلهم الكلة )

انا شايف الحل
نقل كل المصالح و الوزارات خارج القاهرة يعني 6 اكتوبر - التجمع الاول او الخامس

او نعمل زي الدول اللي بتفهم

و نعمل عاصمة حضارية جديدة

تتخطط صح و تبقي القاهرة عاصمة تاريخية
ولا ايه رأيكو

:D

**amir** · 12-09-2007 04:14 PM

المرور و مشكله المرور في رمضان , هل فعلن احنا بنعاني منها في رمضان بس؟!! اظن لاء بس في رمضان بيبقي الوضع كئيب زياده شويه عن الاول فبنشتكي لاكن تعالو نفكر نشتكي مين......
مع احترامي لرجال المرور علي مجهودهم الباسل في محاولات اصلاح ما لايمكن اصلاحه, لاكن الحل مش في ايديهم, الحكومه ملزمه ببناء كباري و انفاق ( من عينه 6 اكتوبر اللي انا شخصيا شايف انه لازم يتعمل كوبري فوقه و يخلو واحد رايح و التاني جاي) انا مش مهندس لاكن اكيد في مهندسين اقدر مني في التخطيط و التنفيذ , فاكرين كوبري المونديال اللي كان هيبقي من الاوتستوراد و ينزل عند طريق السويس
مش بالذمه طريق السويس اللي مؤدي لمدن جديده ذي الشروق و الرحاب و بدر تحس انه طريق مسكين لغايه بدر, يعني لما جم ينشيئوا المدن دي كانو متوقعين السكان هناك يبقي معاهم هليكوبترز!!!
طريق مسكين و غير عريض ضيف علي كده عزبه الهجانه و الميكروباصات اللي بتخرج عمودي علي الطريق من قدام مستشفي الكهرباء علشان يلفو الاتجاه الراجع علي الماظه بطريقه يحسدهم عليها سفاحين التاريخ!!! دا غير طبعا الحفر و البلاعات
و كذلك طريق الاسماعيليه اللي مهما اتكلمت عنه مش هوفيله حقه
و المنطقه عند قاعه المؤترات و ارض المعارض و امتداد رمسيس و الاستاد (لا تعليق)
الموضوع مش موضوع سوء تخطيط لان مفيش تخطيط من اساسه
ولو جم يعملو كوبري وللا جراج هزيل يقولك 30 و 40 مليون ( يا ريت حد يكون عنده عدد اخبار السيارات بتاع اغسطس السنه دي يقرا صفحه 4 علي الشمال فوق خبر انشاء اول جراج ذكي في العالم بالمانيا, الجراج ده بتنزل من عربيتك براه و العربيه بتتنقل علي سيور في مكان فاضي جوه و لما تيجي تاخدها بتحط الكارت بتاعك و العربيه تيجيلك علي سيور في خلال دقيقتين علي الكثر مش ده اللي مزعلني لاكن لو كملت الخبر هتلاقي انه الالمان بيقولو ان الجراج ده اوفر من الجراجات العاديه تحت الارض او فوق الارض لان مفهوش نور او سلالم او مصاعد او انظمه تهويه) و الله انا كنت خلاص هموت من الارف ده احنا عندنا جراج اتبني و اتهد و طلع علينا واحد في الجرنان لا فض الله فوه بيقول ان قرار انشائه سليم و قرار هدمه سليم ( مش فاكر اسم الجرنان ولا الكاتب لاني ساعتها كنت دخلت في نوبه ضحك هستيري )
شوارع رئيسيه ضيقه و مكسره و مليانه حفر و بلاعات و مطبات اماكن انتظار معدومه كل ده يستحيل علي رجال المرور البواسل حله في شهر رمضان الكريم.
و بالنسبه للحلول انا عندي حل بس هو فعلن غريب شويه بس هو ده اللي قدرت عليه ( انا مش مهندس ولا افهم في التخطيط و الحاجات دي) بس الحل ده محتاج ناس من اللي بنو الجراج بتاع المانيا ده و طلعو بعدها يقولو اوفر من الجراجات العاديه ( مضربوش التكلفه في 2 او 3 عشان بقي انتو عارفين تكلفه السيور و المواتير و الكومبيوتر!!!!!)
المهم الحل يتلخص في الاتي:
تيجي في الشوارع اللي فقد الامل فيها خلاص و تعد اول صف عماير و التاني لغايه ما توصل للصف الرابع او الخامس جوه و تقوم منقي اقل عماره في الارتفاع و عدد السكان و تقوم هاددها و طالع بعماره لا تقل عن 30 او 40 (و لو امكن ازيد يا ريت) دور و العماره دي او البرج ده للدقه هيكون مبني تحته جراج يساع عربيات السكان بواقع عربيه او اثنان لكل شقه و بعد كده يتعمل نفس الموضوع علي امتداد نفس الصف و كل ما برج يخلص يتم تسكين الناس في العماير المجاوره به و بكده هتبقي العماير 3 او 4 صفوف فاضيه علي الشارع تقوم هاديدها و موسع الشارع و ممكن تعمل الابراج الجديده علي شكل مربعات و تبني مبني خدمات 4 او 5 ادوار ( حاجه ذي مول كده) في منتصف المربع السكني ده و يتنقل فيه اصحاب المحلات و بكده معظم ااسكان في المربع ده هيتعاملو مع مجمع الخدمات الخاص بيهم وده هيقلل بشكل كبير استخدام العربيات في مشاوير كانت ضروريه قبل كده مع الاخذ في الاعتبار ان توسيع الشارع ده هيكون علي صف واحد و لسه الصف التاني فا الشوارع الرئيسيه الضيقه هتوسع قوي مع العلم ان الهدم و الانشاء مش هيئثر علي الشوارع الرئيسيه بشكل قوي لانو هيكون في الداخل, و ده كمان يدي فرصه جديده للمخطط المصري لانشاء كباري و انفاق و تقاطعات حره ( علي ميه بيضا!!) و من غير التقيد بالشكل الحالي للشارع.
طبعا الفكره محتاجه تفكير و مناقشه كتيره لان في مشاكل هتتطلع ذي مشاكل قانونيه و مشاكل في الصرف الصحي و خلافه لاكن اظن ان اهل الخبره موجودين و قادرين علي حلها , بس لو فكرتو في الفكره دي مش هتلاقي شوارع مقفوله ذي فيصل مثلا و الهره و في نفس الوقت يتم منع بناء عماير اقل من 40 دور و ممكن الاستعانه بالبنوك في توفير المال اللازم( و ما اظنش ان اللي هيبني ساعتها هيخسر لانه كده بايع و كده بايع).
بس تخيلو لو حاجه ذي كده اتعملت مصر هتكون حاجه تانيه و الحياه فيها هتكون منظمه و مريحه و مستني رائيكو و مناقشتكو

**ابوحميد** · 13-09-2007 02:37 AM

استاذ امير
انا معجب انك عضو جديد لكن عندك حماس انك تكتب رد مسهب واكيد خد منك وقت وتفكير ومجهود تشكر عليه
طبعا انا معاك فى حاجات انت قلتها فى المقال وحاجات تانية لا
لكن دى سنة الكون مستحيل الناس يتفقوا على حاجة معينةما علينا بالنسبة للفكرة بتاعة حضرتك هيا حلوة وبراقة لكن مش عملية بمعنى انها بتفكرنى باللى حصل فى فيصل تمام
فيصل حتة كانت المفروض انها تكفى كام الف نلاقيها شايلة الوف كتيرة من البشر والسبب ان الحتة اللى المفروض فيها انها تشيل عمارة يتبنى مكانها برج
موضوع الابراج دا موضوع فاشل حتى لو اتعمل جنب كل برج برج تانى جراج السبب بسيط وهوا ان احنا عاوزين نحل مشكلة المرور دلوقتى ودا اللى بنتكلم عن مشكلة المرور مش سببها العربيات اللى راكنةيمكن يكون دا جزء لكن برده مش سبب جوهرى
انت لما تعمل برج 30 دور وفيه حوالى 150 اسرة على فرض معدل الاسرة 4 افراد يعنى حوالى 600 فرد هل انت متوقع ان كل الاسر دى عندها امكانيات تشترى عربيات بالطبع لا حتى فرضا انهم كلهم عندهم الامكانيات هل كلهم الناس اللى حيخدموا عليهم من كله معاهم عربيات لا طبعا يبقى ايه الخطوة المنطقية بعد كدا اللى حيحصل انه حيكون فيه طريق مواصلات للمنطقة دى اللى فيها نسبة سكان عالية مواصلات عمومى او ميكروباص فى حتة اساسا مش معمولة للعدد دا يسبب ايه؟
يسبب تكدس سكانى ومرورى يبقى جينا نكحلها عميناها

الحل اللى انا شايفه مناسب هوا المدن الجديدة او عاصمة جديدة تكون متخططة ل200 سنة قدام

**Ahmed Anwer** · 13-09-2007 03:11 AM

بس الصين بتعمل كده عشان تبقي متواكبة مع نموها الإقتصادي
بيهدوا المناطق القديمة و يبنوا مكانها ناطحات سحاب حديثة
بس العيب الوحيد للحكاية دي اللانسانية في سكن الأبراج الشاهقة

**Karim_Monir** · 13-09-2007 11:36 AM

استاذ امير كلامك منظم وانيق
والحل اللي انت شرحته ده بيدل على التخطيط
وده ابعد ما يكون عن مصر
احنا عايشين حالة عامة من الفوضى والعشوائية ولا يوجد تخطيط لاي شيء في البلد
هوب ابني جراج هوب نهدمه هوب نعمل طريق جديد هوب لاء ده وحش
هوب نبني كوبري اكتوبر هوب ده مافيهوش بلكوانت للعربيات العطلانة ويتحول لفخ كبير لو عربية من عربياتنا الفيرار ولا البوجاتي وقفت فوق الكوبري
الواحد صايم ومش عايز االضغط يعلى
خلينا كدة ساكتين
بس بالله ما حدش يقول المصريين بس هما السبب كشعب
هل يعقل مع اول دخول يوم رمضان اصحى الصبح وانا متوقع حالة الشوارع الاقي شركة الغاز قررت تكسر كل الشوارع المؤدية للحرفين عشان تدخل غاز
هل هو حيوي ومهم جدا كدة عشان اكسر كل الشوارع واني عشان اطلع من بيتي اقعد نص ساعة

هل يعقك اني اعمل جزيرة وسطى عرضها 20 متر والشارع ده انا عارف ان فيه تكدس مرور رهيب وعرض الشارع حارتين ولو اتوبيس ولا ميكروباص وقف قفل الشارع وراه

هو زي ما بقولك لا يوجد تخطيط نهائي
لكى الله يا مصر

**Ahmed Anwer** · 13-09-2007 06:31 PM

السبب الرئيسي في هذه المشكلة ‘ إدارات المرور و أجهزة الشرطة
اللي مالهاش أي تواجد و لا عندها أي فكر
شوارع القاهرة مش سيئة للدرجة و أسألوا اللي عايشين في دبي علي شارع الشيخ زايد ، يقولوكم انتم عايشين في نعمة ، أخويا كنت بوصله من نص البلد لمدينة نصر كان بيقولي يا بختكم عندكم كذا بديل لنفس المشوار
المفروض يبقي في مثلآ غرفة عمليات ، للقاهرة و يعتمدوا فيها علي تصوير القمر الصناعي أو دوريات طيران هيلكبوتر و يبقي فيه حلول سريعة لأي إختناق يظهر ، تحويلات ، بدائل ، أي عائق يشيلوه بسرعة
حتي سلوكيات الناس نتيجة لعدم تواجدهم و عدم تطبيقهم للقانون
دول أساسا متخلفين في الحاجات الإدارية و الورقيات ،، طبيعي إنهم يبقوا بالفشل ده في تنظيم المرور

**hazem_khidr** · 13-09-2007 06:46 PM

شوارع القاهرة مش سيئة للدرجة و أسألوا اللي عايشين في دبي علي شارع الشيخ زايد ، يقولوكم انتم عايشين في نعمة ، أخويا كنت بوصله من نص البلد لمدينة نصر كان بيقولي يا بختكم عندكم كذا بديل لنفس المشوار

عندك حق انا كنت في ابو ظبي
و لمسافه بين ابو بي و دبي 145 كيلو كنت باخدها في ساعه او اقل كمان لكن المسافه من دبي للشارقه و اللي كانت حوالي 20 كيلو بس كنا بنقعد فيها اكتر من ساعه و نص في شارع اليخ زايد.
في طريق تاني لكن م الكل بيمي عليه و الزحمه عليه اقل ويه و هو طريق الامارات لكن اللي يتوه في دخله من دخلاته حيضيع