الموضوع: العربيه بدأت تسقف....

انا امبارح كنت حتجنن..

كنت في مشوار بتاع 50 كيلو رايح جاي...
وفي طريق العوده لاقيت الماكينة صوتها عالي...
ولما وصلت البيت... فتحت الكبوت " طبعآ انا يوميآ باشيك علي الميه والزيت... والحمد لله العربيه ما بترفعش حراره"
المهم فتحت الكبوت واجي ازود امبليهات الاقي حاجه بتسمع في الماكينة زي الدق كده. " صوت صباب " بصيت علي الشكمان لاقيت العادم بيطلع علي دفعات..
بم بمبم بم بمبمبم ويتكرر... يعني مافيش انسيابيه في خروج العادم.

المهم قفلت الكبوت وركنت العربيه وانا بصراحه متعكنن...
انا عارف ان البنزين ال 80 اللي حطيته زباله. بس مستني ان التنك يقرب يفضي... وحاسه مش ناوي والتفويله دي فيها بركه بشكل غريب.


المهم النهارده الصبح فتحت الكبوت ودروت وبعد ما العربيه سخنت لاقيت نفس الصوت..

اختبرت الشراره اللي خارجه من الموبينه لاقيت سلك البوجيهات اللي خارج من الموبينه ورايح للبوجيه رقم 2 مهبب من جوه..
فكيت سلوك البوجيهات الاربعه.
" وعلي فكره ترتيبهم في الموبينه من فوق لتحت هو 1 4 2 3
وترتيبهم علي الماكينة من الشمال لليمين هو 1 2 3 4 "

المهم نظفت نقاط التوصيل الداخلية في السلوك واختبرتهم بالافوميتر تمام.
وطلعت البوجيهات وحرقتهم... وسنفرت كويس.
و سنفرت سن التوصيل رقم 2 اللي خارج من الموبينة.

وقبل ما اجرب قمت فاكك فلتر البنزين" اللي طلع عيني لحد ما فكيته واكتشفت انه بكليبس " وقمت مصفي البنزين اللي فيه في كوبايه لاقت فيها مياه وحصا اسود...
المهم نظفته.

وجربت راح صوت الخبط اللي كان موجود في الماكينه.
لكن التقطيعه موجوده بشكل بسيط ويكاد يكون غير مسموع.

ان شاء الله ناوي
1- اغير طقم بوجيهات. وسلوك بوجيهات " تنصحوني بنوع ايه "
2- اغير فلتر البنزين ولا بلاش "هو مش مكتوم علي فكرة "

انا قلت احكي التجربة البسطه دي ربما يكون فيها افاده لحد من الاعضاء.
وكمان أسأل علي النقطتين اللي ذكرتهم.


ملحوظه:
الاخ محمد ممدوح كان نصح قبل كده الحرص عند فك سلك البوجيه من ناحية الموبينه احسن تتكهرب.... بصراحه انا كنت باختبرها واعصابي سايبه متخيل 3000 فوت حيمسكوا فيا... بس لاقيت الموضوع مش كده.