السلام عليكم يا شباب
كنت عاوز اعرف اروح سانت كاترين بالعربية ازاى
انا ساكن فى الجيزة
الطريق اخباره ايه و الخدمات عيه
و اخيرا هو فى محطات بنزين 92 فى سانت كاترين
عرض للطباعة
السلام عليكم يا شباب
كنت عاوز اعرف اروح سانت كاترين بالعربية ازاى
انا ساكن فى الجيزة
الطريق اخباره ايه و الخدمات عيه
و اخيرا هو فى محطات بنزين 92 فى سانت كاترين
اخى الفاضل
انا اقدر انصحك لغاية 75 % من الطريق فقط لانى مكملتوش لاخره
انت ساكن فى الجيزة هتاخود ان شاء الله كوبرى اكتوبر لغاية مدينة نصر و تنزل شارع النصر و تمشى على طول و تخش على طريق السويس
لازم تتلزم بالسرعه القانونية لان عليه رادار بعد ما تعدى كمين السويس تاخود الملف الى بعد الكيمن و تخش يمين فى اتجاه النفق و هنا الطريق بيكون الطريق اتجاهين فخلى بالك لان الطريق بتاع سينا كله الطريق مفرد مش مزدوج
هتكمل لغاية النفق و تعدى سينا على بركه الله بعد النفق هتمشى على طول لغاية متلاقى طريق يمين و شمال هتاخود يميين على طول
هتعدى الاول على عيون موسى و بعد كده راس سدر و ياريت تخلى بالك و تكون حزر فى سواقتك بلاش جرى مالوش لازمه سرعتك 100 كويس
فيه بنزينه موبيل بعد راس سدر كمل بنزين منها و فيه ممكن تاخود ريست
و قدامها الناحية التانية فيه ريست برد اسمه هيوالداى فنتزيا
و بعد راس سدر هتخش على ملفت حمام فرعون و ابوزنميه و هيا ملفات حاده و خطر
ما تتخطاش الى قدامك الا اصعب الظروف بعد كده هتخش على ابورديس
و بعد ابورديس هتفضل ماشى لغاية متلاقى مفارق سانت كاترين فيه بنزينه شل اعتقد و جنبها ريست اسمه مانتا كمل تفويل من هناك لان انا معرفش فيه فى كاترين بنزين ولا مفيش
هتوصل عند المفارق هتخش شمال على كاترين بعد المفراق انا ما مشيتش
بس الى سمعته من ناس مشيت عليه انه فى ملفات جامده
ولازم تكون حزر .
و عموما طرق سينا لازم تمشى عليها نهارا و بسرعه معقولة ولوحسيت نفسك تعبان و عاوز تنام اركن فى اى محطة بنزينو ريح مش على الطريق
ور بنا يسلم طريقك ان شاء الله
الف شكر يا باشا على اهتمامك و ردك وخاصة بالنسبة للخدمات و البنزين على الطريق
ياريت يا شباب اللى يعرف اى معلومات عن باقى الطريق
أنا لسه كنت راجع من نويبع عن طريق شرم الشيخ أول أمبارح كل اللي أقدر أقول لك عليه :
- توجد لافتات توضيحية لأرشادك علي الأتجاه الصحيح فلا تقلق
- الخدمات متوافرة علي الطريق ده
- أحذر المنحنيات و المنحدرات الشديدة بطرق جنوب سيناء
- يفضل السير نهارا و علي سرعة 100 كم/ساعة
و علي كل حال أنا مسافر غدا الي الطور لما أرجع هاأديلك وصف تفصيلي للطريق
باقى الطريق بعد لما تخش شمال هتحس انك دخلت فى طريق مهجور و ممكن تقعد 10 كيلو متشوفش ولا عربية علية.
بعد كدة هتقابل نقطة شرطة اى كلام و هتكمل بقى.
الطريق طالع الجبل فا اغلب الوقت تلاقى نفسك فى مطلع و ملفات مش هقو صعبة بس مش سهلة.
فية ملف وحد معمول بطريقة سخيفة جدا و تقريبا اكتر من 90 درجة من غير اى علامات و هتلاقى علامات على الارض ان فية ناس كتير طلعوا برة الطريق.
غير كدة الطريق معقول و فية محطتين بنزين فى كاترين.
و ترجع بالسلامة يا باشا.
شكرا ياشباب على الوصف
و يا ريت اللى عنده تفاصيل اكتر يشارك معانا
وجزاكم الله عنا خير
طريق كاترين علية خدمات كويسة
شوف ياباشا بعد لما توصل مفارق سانت كاترين وتخش شمال هتمشي حوال 30 كيلو هتلاقي نفسك في وادي مكتب ممكن تشرب ميه من الابار الي فيه وبعدها بحوال 30 كيلو هتلاقي نفسك داخل علي وادي فيران ولكن احذر المنحنيات انا اتقلبت هناك قبل كده سنه 2002 وكنت ماشي 60 والله 60 واتقلبت ربنا يسترها معاك
بعدها حوالي 40 كيلو سنت كاترين من بدايه المفارق الي سنت كاترين مفيش بنزينه علي الطريق
وااااه لو انت طالع دير سانت كترين خلي بالك كويس جدا وانت طالع واكتر وانت نازل لانه فعلا خطر لان انت طالع ونازل من جبل واياك اياك تسرح او تكلم حد لا وانت طالع ولا نازل لان ممكن تلاقي البدو راكب مرسيدس جاز أو نصف نقل وطاير لانه حافظ الطريق ، وتروح وتيجي بالسلامه .