بص يا أستاذ جندي مجند اقولك لو عاجباك الفرونتيرا بمتانتها و قوتها وبرستيجها توكل على الله و لو بعد كدة لقيت مصاريف بنزينها مش مريحاك اقلبها ديزل
وممكن كمان لو بتفكر تجيب حاجة 4*4 اقتصادية في البنزين انا شفت التريوس الجديدة و عجبتني بس ماجربتهاش و ماعرفش اية ثباتها و راحتها بس هي بلا شك اضيق من الفرونتيرا في الكنبة الخلفية و في مساحة الشنطة في التخزين
و أعتقد كمان انها مش دفع رباعي و انما دفع خلفي بس
يعني مافيهاش فتيس غرز بس مش متأكد من الموضوع دة في الدايهاتسو تريوس وللا ال عربية الجديدة الصيني اللي نازلة تقليد التويوتا RAV-4 الل اسمها UFU لأني فكرت فيهم زيرو و شفتهم بس فضلت الفرونتيرا لأني ارتحت لها و فضلت المتانة و القوة الأمريكية و لعلمك انا كمان في الاساس ركيب هوندا و عندي أكورد كوبية من 8 سنوات و قبلها كان معايا سيفيك لمدة حوالي سبع سنين و باحب العربيات الهوندا جدا لأنها عربيات متينة و قوية و ماتقفش بيك ابدا بس اللي خلاني اغير للفرونتيرا من شهرين اني بقيت مش طايق السواقه في البلد دي و مش مرتاح في الاحساس بعدم الامان على الاولاد و سط السواقة وسط الميكروباصات و العالم الغتتة اللي غاوية تزنق و تغتت
لكن في الفرونتيرا الموضوع مختلف تماما و الناس بتعمللك 100 حساب و انت ماتخافش عالعربية و تتخلص من شعور الضيق من سواقة الزحمة و التزنيق و التغتيت دة غير ان العربية برستيجها عالي برضة ومميزة