الموضوع: كيا سيراتو 2009 اوتوماتيك الشكل الجديد ولا هيونداي الينترا اوتوماتيك 2009

بص يا سيدي
أنا بأجر الإلنترا موديل 2008 أوتوماتيك كاملة كتير جدا. والحق يقال إن العربية دي غيرت نظرتي لهوينداي. يعني خلتني أحترم شركة هيونداي.
بس المشكلة إن العربية عايزة معاملة خاصة جدا. وعشان كده صاحب معرض الإيجار بيطلعها بس لثلاثة أنا منهم. عشان إحنا دكاترة ومعروفين بسواقتنا الهادية.
العربية فعلا في منتى الجمال وخصوصا نعومتهاالغير عادية ورحابة الصالون بتاعها وسحبها الممتع. أنا فاكر إني جبت ال 100 في أقل من 9 ثواني. وده أعلى تسارع في فئتها. أعلى من اللانسر أو الصني أو الأوبترا.
ولكن العربية بتاعة دلع بس. يعني لازم تسوقها بحنية غير عادية. وده بالإضافة لإنها قريبة من الأرض فلازم تعرض على أي مطب عالى. والمشكلة دي مش موجودة في الانسر أو الأوبترا أو الصني.
بس في الإجمالي العربية بالنسبة لسعرها جميلة جدا. خصوها إن هي بقت ب113 كاملة.
ولكن

السيراتو فيها إمكانيات أعلى. طبعا الإير باج والفرامل الإلكترونية والسمارت كي والباقي كله. وعلى فكرة العربية مش مبالغ في سعرها ولا حاجة. أنا فاكر مرة إني ركبت مع واحد السيراتو الشكل السابق وعجبتني جد. بس ما كانتشي أحلى من الإلنترا. دلوقتي السيراتو أحلى بكتير. وصدقني عن واحد عنده عربية هيونداي وعربية كيا. الهيونداي أنعم بس الكيا أقوى في قوة التحمل.
والوكيل الجديد بيحاول يعمل المستحيل عشان ياخد مكان كويس في السوق.
أنا كنت خلاص قررت أجيب الإلنترا وكنت بحوش المقدم بتاعها. بس لما شوفت السيراتو الجديدة قررت إني أجيبها. وإن شاء الله ربنا يعيني وأجيبها.
لو عايز كلام أكتر عن السيراتو إفتح موضوع إسمه (الموسوعة السيراتوية) اللي كاتبه بصراحة راجل ممتاز. شارح السيراتو الشكل القديم بكل تفاصيلة من الألف إلى الياء. هو موضوع طويل جدا بس صدقني حيحسسك كإنك إنت اللي إشتريت السيراتو الشكل القديم.

أما بالنسبة لموضوع سعر العربية اللي غالي في الأول فإنت فكرتني بنفسي من حوالي عشر سنين لما جيت أشتري أول كمبيوتر ليا. فقلت أنا حستنى شوية عشان أجيب الموديل اللي أنا عايزه بسعر أرخص. وبعد التفكير لقيت إن الموديل بيرخص عشان في الأحدث منه نازل قريب وبعد مدة صغيرة حيبقى الموديل اللي أنا إشتريته قديم ومحتاج يتحدث. نفس القصة في العربيات. إنت بتجيب موديل جديد في أوله وما بتحتاجشي تغيره غير بعد 5 سنين على أقل تقدير (على الأقل خالص فترة الضمان).

بصراحة ربنا يكون في عونك في الحيرة دي
وحاول تستخير ربنا
ومهما كانت العربية اللي حتشتريها أسأل الله أن يعطيك خيرها وأن يكفيك شرها.

حاولت أفيدك على قد ما قدرت أتمنى إني أكون جاوبت على بعض أسئلتك
والسلام ختام

شكرا علي الافادة يا دكتور Frozen Fire انا فعلا حاسس اني ميال للكيا اكتر خصوصا اني شايفها صاجها اقوي من الالنترا شوية.
وشوفت انت نازل تيجبها امتي علشان ننزل مع بعض :)
وربنا يسهل

انا سمعت ان فيه موديل اوتوماتيك هينزل ب 103.000 بس لسه شويه وهيكون تقريبا زك المانيوال بس اوتوماتيك