الطريق من القاهره الى دمياط

**Ramy_Tantawi** · 05-04-2009 02:30 PM

السلام عليك ورحمة الله وبركاته.

عاوز يا جماعه اعرف الطريق من القاهره الى دمياط ده هايكون اي طريق بالظبط ؟ وهل ليه علاقه بطريق اسماعيليه او السويس ولا طريق تاني ؟

الحاجه التانيه بعد اذنكم الطريق تقريباً مسافته قد ايه لو من القاهره الى دمياط مرورا بالاسماعيليه ؟

**hamedo0** · 05-04-2009 02:43 PM

انا الاعرفه انه طريق بورسعيد في داخله تروح منها دمياط وده سمع بس يارب حد يفيدك عشان عاوز اعرف طريق انا كمان

**aif** · 05-04-2009 02:45 PM

انا اعرف انه فيه طريق القاهرة بورسعيد الصحراوي .. ثم بورسعيد دمياط الساحلي
وممكن القاهرة بنها المنصورة دمياط الزراعي وده مشهور انه مليان مطبات صناعية
دي معلومات اولية ..... التفاصيل مع الزملاء الدمايطة اكيد

**samehkadous** · 05-04-2009 05:05 PM

هتطلع على طريق الاسماعلية الصحراوى ومن الاسماعلية الى بورسعيد ومن بورسعيد الى دمياط على الدولى بدون دخول بورسعيد وهو حوالى 3 ساعات لو خايف من الرادار

**ihab** · 05-04-2009 05:37 PM

المشاركة الأصلية كتبت بواسطة samehkadous

هتطلع على طريق الاسماعلية الصحراوى ومن الاسماعلية الى بورسعيد ومن بورسعيد الى دمياط على الدولى بدون دخول بورسعيد وهو حوالى 3 ساعات لو خايف من الرادار

بالضبط كده
قبل مدخل بورسعيد تقريبا ب 3 - 5 كم بتلف شمال و تاخذ الطريق الساحلى و ده ممتاز و تقريبا المسافة فى حدود 260 كم تقريبا و يستحسن تمشى فيه بالنهار لانه بالليل مفيهوش اضاءة

**mokhtar** · 08-04-2009 03:37 PM

هتاخد طريق القاهره - الاسماعيليه الصحراوى من اوله حوالى 120 كم ومن اسماعيليه من الدائرى اللى خارج البلد هتفضل طوالى لحد ماتلاقى نفسك فى طريق اسماعيليه - بورسعيد حوالى 90 كم وقبل مدخل بورسعيد ب 5 كم هتلاقى طريق شمال مكتوب عليه الدولى الساحلى (دمياط) هتاخد اليوتيرن وتمسك الطريق ده حوالى 45 كم تلاقى نفسك داخل على كمين شطا قبل دمياط ب 5 كم وتكمل الطريق للاخر هتلاقى نفسك فى ميدان كبير اسمه ميدان الشهابيه تروح منه لاى مكان فى دمياط

الطريق ده كله حوالى 250 كم وهو اطول من الطريق الزراعى ( القاهره-بنها -المنصوره - دمياط) ب30 كم بس طريق ناعم زى الحرير مفيش مطبات ولا اى حاجه على السكه ولا ناس ولا تقاطعات والسواقه فيه مريحه جدا وفيه خدمات كتير واستراحات خصوصا اسماعيليه والقنطره والطريق من السماعيليه لبورسعيد ممتع جدا بيعدى من تحت كوبرى السلام على قناه السويس وبتفضل حوالى 45 كم ماشى جنب قناه السويس وتشوف البواخر والناقلات ماشيه جنبك فى القناه
تنور دمياط واى خدمه

**Samir Elshahawy** · 08-04-2009 11:07 PM

أفضل طريق لدمياط هو طريق (القاهرة/الاسماعيلية/بورسعيد/دمياط)

- طول الطريق حوالي 220 كم و السرعة القانونية 90 كم/ساعة
- الزمن : حوالي ساعتين و نصف
- الرادارات : مركز الطب العالمي , قيادة الجيش الثاني بالاسماعيلية , قبل مدخل بورسعيد من 3 الي 5 كم