الموضوع: موقف بسيط - الحمد لله

يوم الخميس اللي فات:
في حدود الساعة 8 إلى 8 و نص مساءاً كنت راكن في جسر السويس جنب سور المشتل لإني كنت عند أبو الجوخ بتاع العجل .. الرصيف منور زي الضهر و قبل العربية بعشرين متر في محطة أتوبيس عليها كام شخص.
المهم ... سايب جاكت على الكنبة الخلفية و فيه swiss knife فيها كل مفاتيحي + النسخة التانية من مفاتيح العربية و الريموت + شنطة فيها هدوم.
المهم غبت ساعة رجعت لاقيت زجاج الباب الخلفي من ناحية الرصيف مدشدش و الحاجة متاخدة من على الكنبة.

أنا متخيل السيناريو إن حد كسر الإزاز الأول .. طبعاً الإنذار ضرب 30 ثانية و فصل من الخبطة .. و بعد كدة رجع تاني أو واحد غيره الله أعلم و شد الحاجة من الكنبة بدون ما يفتح الباب و إلا كان الإنذار فضل يضرب بدون ما يفصل.

المهم ..
يوم الجمعة:
هكلم التأمين يبقى الموضوع هيطول و مندوب يجي يبص و أضيع كام يوم و أسيب العربية بالليل و هية مفتوحة قلت مش مستاهلة..
رحت مركز قطع الغيار تبع غبور اللي في شارع دمشق جنب بنك عودة.. بكام إزاز إلنترا 2008 خلفي يمين يا عم الحاج...؟
ضرب شوية زراير على الكمبيوتر و قاللي..
.
.
.
.
750 جنيه مصري ..........بس الحقيقة الحق يتقال شاملين الضريبة و بدون تركيب..
طلعت على دوسو بعديهم بـ 100 متر بالظبط.. عندك يا عم إزاز إلنترا 2008 خلفي يمين؟
طلع عنده د. جريش زي الفل بـ 150 جنيه بالتركيب..
قلت الحمد لله .. ركب يا عم..

جنب دوسو فيه عشم نوار اللي أصلاً بيركب إنذار الإلنترا في غبور و قلتله على الموضوع و إيه الحل في موضوع الريموت اللي ضاع؟
قاللي حلين.. أولا: ياخد الإنذار القديم بالريموت اليتيم و يديني واحد أخوه جديد بـ 2 ريموت و أدفع فرق 150 جنيه.
ثانياً: ياخد الإنذار القديم بالريموت اليتيم و يديني اللي بينزل في موديل 2009 و بيفتح الشنطة من الريموت و أدفع فرق 200جنيه.
طبعاً ركبت بتاع 2009..


الحمد لله على كل شيئ و عذراً للإطالة و يا ريت إخوتي في المنتدى ياخدوا بالهم و محدش يسيب أي حاجة تغري أي حرامي إنه يفكر يعمل كدة لإن واضح لإن الموضوع ده زاد بصورة غبية شوية .. ربنا يستر على الجميع.

أعتقد يكون شيئ جيد لو كل عضو يقترح حلول لتأمين العربية من موضوع السرقة ده ... انا شخصياً حتى مع الإنذار لازم أركب عمود الدريكسيون و إن شاء الله بعد كدة مش هسيب أي حاجة جوة العربية.