حادث إمبارح .. طريق مصر إسمعيلية الصحراوى

**RED_OCTOBER_IV** · 05-04-2009 04:23 PM

المكان : نهاية طريق مصر إسمعيلية الصحراوى (عند فتحة بلبيس- قبل نقطه أسعاف الطريق بشويه )
االزمان : يوم السبت 4/4 الساعة 12 ونص مساءً تقريباً
الحدث : عربية أجرة (تاكسى) خبط أمرأه فى أواخر التلاتينات . . او فى الاربيعنات

التفاصيل :.
إمبارح الساعه 12 أو 12 ونص بليل .. كنت نازل وسط البلد أنا وأربعة من صحابى ... وكالعادة بناخد الكنبة الى ورا والى قدمها .... والميكروباص كان فاضى ومعلى الكاسيت و الطريق سالك .. وزى الفل
وقبل نهاية طريق الميكرو باص بحوالى كيلو .. بصينا لقينا الراجل راح راكن فى وسط الشارع ... بنبص من الشباك الشمال .. لقينا تاكسى شاهين الأزاز الامامى بتاعة كله متكسر فى الارض وشاب فى أوخر العشرينات أو التلاتينات .. قاعد قدام التاكسى وحاطط أيده على وشه وماسك عينه ... فى الاول أفتكرت إن الشاب ده هو الى أتخبط لكن لما واحد من صحابنا قالو .. إنتا من عزبة معروف .. بصله أوى ورد قله أه ... ونزل صاحبنا من الميكروباص ونزلنا معاه عشان نتطمن على الرجل .. بس لما نزلنا قربنا منه .. قالنا شوفو الراجل إلى انا خبطه .. ..... ...
جرينا على الناحية التانية من الطريق لاقينا

واحدة ست ممده على الارض وحوليها دم كتير .. من راسها وأجزاء فى جسمها ..
وجنبها شنطة سفر كبيره نسبياً لونها بنى ... الست كانت لابسه أصفر أو بيج تقريباً
وهى شقراء ... وكان فى واحد كبير فى السن واقف جنبها .. تقريباً يقربلها ... الست كانت تقريباً بتفارق الحياه .. عنيها بتتحرك تبص علينا ولكن مش بتتكلم ولا أى حاجه فيها بتتحرك ... أتنين من الى كانو حاضرين كلموا الاسعاف .. وجريت مع صحابى لنقطه الاسعاف الى كانت على مرمى البصر ... لكن ملقيناش عربية أسعاف هناك بس فيه نقطه تانيه بعد الكبرى الى هو متفرع من الدائرى ........
بس وأحنا بنجرلها سمعنا صوت عربية أسعاف قريبه من المكان وجايا على الحادثه
.. رجعنا على الميكروباص .. ركبنا ولقينا السواق بيقول لبتاع التاكسى

.. إمشى إنتا بقى بدل ما حد ياخد النمر ..

وبجد فى اللحظه دى شفت عين الست وهى حايره مش عارفه إيه الى حوليها ..عرفت إن حق المسكينه دى ألى أكيد فى حد قلقان وهيموت من قلقه عليها ..ممكن يروح هدر

علشان كده قررت أكتب الموضوع ده ..
السواق الى عمل الحادثه دى ... من حتة أسمها (عزبة معروف) ودى فى عين شمس ... وبيشتغل على عربيه شاهين ..
هو شاب فى العشرينات أو التلاتينات مش أكتر
نحيف .. متوسط الطول مائل الى أن يكون طويل
شعره متنحى عن جبهته شويه .. شعره خفيف
التاكسى أتكسر فيه الزجاج الامامى .. الاكصدام الامامى .. والرفرف اليمين تقريباً
..... وأتمى أن حد من الضباط الى معانا أو أى حد يعرف ضابط تبع مرور المنطقه دى يبلغه ويارايت يتمسك الولد ده فى أسرع وقت ..

حسبى الله ونعم الوكيل

**Terrible_DaRsH** · 05-04-2009 04:34 PM

طب لما انت عرفت مواصفات السواق كلها ..

كان اسهل لك تاخد رقمه ..

و بعدين انا يوميا بشوف ما لا يقل عن 3 جثث فى طريق مصر اسماعيلية ده شيء عادى ..

**RED_OCTOBER_IV** · 05-04-2009 04:36 PM

من ملابسات الحاث .. ومن كلام صحابى ألى أتكلمو مع السواق
إن الست كانت عايزه تعدى الناحية التانيه .. وهو فوجئ بيها قدامه فحاول يفرمل .. وخبط فى الرصيف بالرفرف والعربيه لفت لفة كامله حولين نفسها و طيرت الست وهى بتلف .. ودى الى لقناه فعلاً .. لأن الست كانت على الناحيه اليمين من الطريق بينما التاكسى كان فى أقصى اليسار وملتف ومقدمة عكس طريق السير والرفرف معوج والجنط أو الطاسه مكسوره والبريبيز الامامى ...

**KoDaK_Gti** · 05-04-2009 04:36 PM

طيب وانت ليه متصلتش بالنجدة وانت واقف اصلا وبلغت على الحادثة !!!!
اول حاجة الاسعاف وبعدين النجدة والمفروض متسبوش السواق يمشى

**RED_OCTOBER_IV** · 05-04-2009 04:38 PM

حضرتك أنا كنت مندهش من منظر الست الى على الارض .. ولما فكرت إنى أخد رقم العربيه كان الراجل بتاع الميكروباص مشى ..

**banboty** · 05-04-2009 04:42 PM

المشاركة الأصلية كتبت بواسطة KoDaK_Gti

طيب وانت ليه متصلتش بالنجدة وانت واقف اصلا وبلغت على الحادثة !!!!

علشان مش عاوز يدخل في سين و جيم

ما دام الست اخدتها الاسعاف و ربنا كريم و يشفيها

**KoDaK_Gti** · 05-04-2009 04:43 PM

معلش ربنا يقوم الست بلسلامة ان شاء الله ده اهم حاجة

**osamaesm** · 05-04-2009 04:47 PM

مش عارف اقولك ايه بس انا مجرب حاجه قريبه من كده
انا اخويا الكبير من سبع سنين عربيه خبطته واتشال واترمي في طريق مصر اسماعليه وهربو
احنا جالنا تيلفون من مستشفي ان اخويا فيها ورحنا كان توفي وعرفنا ان ناس بلغت ان في واحد مرمي في الطريق وبعد كده قعدنا نلف ونسأل وتابعنا خط سيره هو كان لسه نازل اجازه من اسيوط كان شغال هناك وراح لناس صحابه عند السندباد وهو بيعدي الشارع عربيه جيب خبطته وقالو هنوديه المستشفي وخدوه في العربيه والله اعلم ايه اللي حصل ورموه في الطريق الصحراوي واحنا عرفنا الكلام ده بعد كده لما سئلنا عند السندباد لكن الناس دي محدش عرف يجبهم
ربنا يرحمه
فالمفروض ان انتا كنت خدت رقم العربيه عشان دم الست دي ميروحش هدر

**masryxt** · 05-04-2009 04:59 PM

اللهم الطف بها و كفانا ربنا شر الطريق سائقا او مترجلا

**cheeez** · 05-04-2009 05:05 PM

ربنا يرحمه

يا ريت يا جماعة يبقى في إيجابية لو في لقدر الله حاجة حصلت بالمنظر دة ، أولاً الإسعاف أو لو في مساعدة إنت تقدر تلحقه بها ، ثانياً النجدة، ثالثاً رقم العربية. و لو الواحد عرف يسيطر على الموضع و ميخلش الرجل يفلت يبقى كدة عداك العيب. و بكدة يبقى ضميرك مستريح .
و ربنا يجازيك خير يا Red_october_iv ، أنا عرف إنك كنت مصدوم مل موقف بس الموضع دة دليل انك كنت عايز تعمل حاجة. و ربنا يقدرك على فعل الخير.