يعنى ايه الشاسيه مفتوح ؟ و يعنى كوبلن داخلى ؟؟

**Lion_Heart** · 07-04-2009 02:33 AM

بنسمع كتير فى المنتدى عن الشاسيه مفتوح و عاوز زرجينه يعنى ايه ؟؟ هل اللحام فك من امكان معينه ؟؟ و لا المسافة بين اجزاء الشاسيه وسعت ؟؟
ياريت احد الاخوة يدينا نيذة عن الموضوع ده للمعرفة و ازالة التعجب عن قراءة ما يتعلق بهذا الموضوع

بالنسبة لطقطقة الكبالن دى بتكون من الكوبلن الداخلى ولا الخارجى ولا الراس ؟؟
ولما اشترى كوبلن ده كله بيجى مع بعض ولا كل حته لوحدها ؟؟

معلش عمال ادور على الاجوبة دى بالمنتدى لكن خاصية البحث فى الوقت الحالى مش عارف ايه اللى جرالها ..

**casper1500** · 07-04-2009 03:07 AM

اللي اعرفه عن الشاسيه المفتوح ان المسافة بين الفخدتين اللي في الكبوت بتكبر و الشاسية بيتكسر و عشان تلحم الشاسية لازم ترجعه لوضعه من خلال الزرجينه و بعدين تلحم على الوضع المظبوط ..

الموضوع دة كان حصلي في 128

**casper1500** · 07-04-2009 03:12 AM

و طبعا عشان تعمل الزرجينة (عبارة عن بار بيتحط بين الفخدتين و تقعد تشد لحد ما المسافة تتظبط) لازم كل حاجة في الكبوت تتشال يعني الموتور بالعمة بالردياتير ..... بالليلة كلها

**أبو إياد** · 07-04-2009 10:30 AM

بالنسبة للشاسيه بيتأثر بكثرة المطبات وسؤ استخدام السياره وردائه ارضنا الغاليه مصر
والتأثير بيكون فى مقاسات ابعاد الشاسيه والحل حاجه من الاتنين
1- تظبط زوايا ع الوضع الجديد وده انتبيوتك (حل مؤقت)
2- تظبيط مقاسات الشاسيه وده ليه طريقتين كل طريقه حسب الحاله
ممكن تتحل عن طريق اجهزه باعاده مقاسات السياؤه ودى لو حاجه بسيطه
او انها تتظبط عن طريق الزرجينة

بالنسبة لطقطقه الكوبلن دى بتكون لعده اسباب
ا - قطه كاوتش راس الكوبلن الخارجى
مما يؤدى الى تعرض الزيت وشحم الكوبلن الى المياه والهواء والاتربه وبيخليه يجف وبالتالى بيكون فى خشونه فى حركه الكوبلن بتبان مع الملفات
2 -كسر الدريكسيون الى اخر لفه والاندفاع بقوه مما يؤدى الى نفس الاسباب السابقه

اما الكوبلن الداخلى ده اسمه داخلى لانه بيكون داخل الفتيس
وده مش بيطقطق باستمرار زى الخارجى
ده بيعمل صوت طقه واحده مع هبده جسم السياره بالكامل فى حاله تغيير سرعات الفتيس او الفرامل وبتبان جدا مع الفتيس الاوتوماتيك
وده بيكون بسبب فك بعض الاجزاء داخل الكوبلن (صليبه الكوبلن الداخليه)

**Lion_Heart** · 08-06-2009 11:24 AM

المشاركة الأصلية كتبت بواسطة mohamed9999

طيب و موضوع الشاسيه دا لما او تظبيطه يتكلف كام ؟؟؟؟؟؟؟؟؟ عشان انا عندى الشاسيه بتاع العربيه مفتووووووح

عربيتك نوعها ايه و موديلها كام ؟؟

**mohamed9999** · 08-06-2009 02:26 PM

128 موديل 1986 1100 سىسى

**aYaBooY** · 08-06-2009 05:00 PM

المشاركة الأصلية كتبت بواسطة mohamed9999

128 موديل 1986 1100 سىسى

موضوع شاسيه الـ128 ده حاجة عادية
انت المفروض تشوف سمكري ابن حلال و يعملة لو المشكلة مجرد فتح شاسيه يعني المسافة بين الكرتيرات الامامية مقفولة يبقي ممكن تتعمل من غير فك الموتور
انت ممكن تتاكد بنفسك المسافة بين مسمار المساعد لمسمار المساعد التاني 99 سم نت نص المسمار لو اكتر يبقي المفروض تتقفل لو اقل يبقي تتفتح
و الموضوع بياخد وقت حوالي 3 ساعات شغل و ممكن يتفك العمة و علبة المروحة و يشتغل بس يبقي يخلي بالة من السلوك
و هاتلاقيه بيعمل الزرجينة و يسيبها شوية و بعد كدة يبداء يلحم في العلب يمين و شمال علشان يقوي من تماسكهم بجسم العربية و طول ما هو شغال بيكون الصبي بتاعة اعد يرش مياه من حتت تانية و على السلوك
الموضوع ده اتقالي من واحد سمكري في شبرا 250 جنيه و واحد تاني قالي 200 و واخد تاني قالي 350 علشان هايلحم الستارة الامامية لما قلت الاسعار ديه لواحد قريبي سواق ضحك و اخدني عند واحد في الاسماعيلية عملها و دفعت 60 جنية و 5 جنيه بقشيش للصبي
طبعا انا الـ128 الي كانت معايا كانت رشة دواخل لو عربيتك فبريكة يبقي يفضل تسيبها كدة لحد ما ربنا يكرمك و تبيعها و لو ناوي تخليها يبقي اتوكل على الله

**aYaBooY** · 08-06-2009 05:01 PM

صحيح يا عم قلب الاسد
انا مسمعتش عن اكسل بتفتح او تقفل ساشيه
الموضوع ده كان مشهور في الـ128 و الـ127 بس قليل
و الريجاتا و الريتمو و اشهرهم الريتمو

**Lion_Heart** · 08-06-2009 07:02 PM

المشاركة الأصلية كتبت بواسطة ayabooy

صحيح يا عم قلب الاسد
انا مسمعتش عن اكسل بتفتح او تقفل ساشيه
الموضوع ده كان مشهور في الـ128 و الـ127 بس قليل
و الريجاتا و الريتمو و اشهرهم الريتمو

الحمد لله مفيش فتح شاسيه ولا حاجة فى الاكسل لكنها كالعادة اسئلة عامة كنت بسمع عنها او اشوفها عشان كده كنت كتبت الموضوع للاستفادة .

الموضوع: يعنى ايه الشاسيه مفتوح ؟ و يعنى كوبلن داخلى ؟؟

LinkBack

أدوات الموضوع

عرض

يعنى ايه الشاسيه مفتوح ؟ و يعنى كوبلن داخلى ؟؟ - انشر الموضوع فى :

-

-

-

-

المواضيع المتشابهه

تجربة تغيير كوبلن داخلى لأوكتافيا a5 خارج التوكيل

راس كوبلن داخلى استيراد

يعنى ايه جامعة مفتوحة او تعليم مفتوح؟

يعنى ايه سيس ؟؟؟

الكلمات الدلالية لهذا الموضوع

المفضلات

المفضلات

ضوابط المشاركة