الموضوع: مصرح ببروز وأطوال - مصرح بتحميل عمال

امبارح شفت عربية نص نقل شايلة اسياخ حديد طالع نصها بره العربية والبيه السواق مش مكلف خاطره حتى يعلق جركن احمر او فوطه صفراء في آخر الحديد لتنبيه الناس اللي وراه للاحتراس من اسياخ حديد زي كتير ما بيعملوا

اللي يغيظ في الموضوع هو ان العربية مكتوب عليها من الجنب العبارة السخيفة المشهورة : مصرح ببروز وأطوال

نفسي اعرف بأه الجهة الحكومية اللي طلعت التصريح ده طلعته على اي اساس

هل صاحب العربية سواء فرد او شركة بيتقدم للجهة دي ان عنده عربية نص نقل وشغال في مجال نقل الحديد وعايز التصريح ده يقوم كل اللي يعمله يدفع مبلغ سنوي ايا كان قليل ولا كتير للحصول على التصريح ده وياخده يظهره للجان المرور

اللي افهمه ان التصريح ده ما ياخدوش الا العربية اللي عاملة تجهيزات خاصة تسمح بتحميل بروز واطوال بما لا يضر الآخرين ولا يعرض حياتهم للخطر

كذلك تصريح : مصرح بتحميل عمال

بتلاقي عربية نص نقل عادية جدا وكاتبة الجملة دي وفيها عمال من ورا في الصندوق ، برضه المفروض يكون حصل على التصريح ده في حالة واحدة بس هي انه يكون عمل في الصندوق تجهيزه معينة تسمح بتحميل عمال بشكل آدمي فيه حماية لهم من الحوادث او الأخطار بشكل عام.

يا ريت لو حد يعرف التصريح ده بيتاخد ازاي يقول لنا ولو برضه مفيش تصريح ولا حاجه وهي جملة بتتكتب على العربية وخلاص يبقى لازم يتحاسب السواق وصاحب العربية