Shaving the cylinder head

**Haytham4ever** · 15-09-2007 02:42 AM

السلام عليكم
ازايك يا شباب كل سنة و انتم طيبين
دي اول مشاركة ليا في المنتدى و الحقيقة شجعني على الاشتراك الخبرات اللي لاقيتها في المنتدي ما شاء الله
مش هطول عليكوا
انا عربيتي 128 موديل 75 الشكل القديم
اشتريتها من راجل عجوز كان جايبها من الزيرو من المانيا
العربية حالتها ممتازة
بس انا حبيت اعدل فيها شوية قلت بدل ما اعمل شنبر و اعدل في الكربراتير و الشكمان و الفتيس... اغير الموتور احسن و ابيع القديم
جبت موتور ريتمو/ريجاتا 1300 المفروض انه 75 حصان
العربية بقت صاروخ
اخويا كان معاه اكسنت كنت بطلع منه على كل السرعات
حتى فوق ال130
المهم مع الوقت حسيت ان العربية مبقتش تجري
مش عارف انا اتعودت عليها و لا ايه
و انا بدور في النت على تعديلات في الموتور لاقيت واحد عامل حاجة غريبة اوي مش فاهمها لحد دلوقتي
و المفروض ان التعديل ده خلى العربية 95 حصان :shock:
بس الكلام بالانجليزي و نص الكلام اهه:
In 2000 I put the 1,3L engine with 75HP and 5 speed gear box from crashed YUGO65. Shaving the cylinder head 1,5 mm and mounting Supersprint exhaust system engine power has increased to 95HP and 0-100 only 13sec

و اللينك اهه
http://www.mirafiori.com/~courtney/1...milenovic.html

ايه بقه اللي هو عمله في وش السلندر؟؟
ياريت اللي فاهم يقولي عشان انا ناوي اعدل التعديل ده في الخطة الجاية
في انتظار ردوكوا و اي مقترحات تانية لتحسين الاداء
و السلام عليكم :)

**جندى مجند** · 15-09-2007 02:47 AM

أعتقد انه عمل كشط (تجليخ) لوش السلندر ... دة مش حيزود الباور حاجة لأن الكشط دة بتحتاج تعمله لو جوان وش السلندر ضرب نتيجة سخونية جامدة و الوش حصل فيه تقوس ... لكن الجزء التانى من الكلام هو اللى زود الباور عنده

and mounting Supersprint exhaust system

**Haytham4ever** · 15-09-2007 08:44 PM

مفتكرش لانه عمل كده برضه في الموتور التاني
اقرا اللي مكتوب في اللينك

**ahmed1981** · 15-09-2007 11:31 PM

الراجل عمل حاجتين:
1 - قشط لوش السلندر
وطبعا ركب الوش بنفس سمك الجوان المفرد عادي
ونتيجة لذلك زاد من نسبة الإنضغاط للموتور لأن غرفة الإحتراق تعتبر صغرت
وهذا ما يؤدي إلى زيادة أحصنة الموتور

ستحدث مشكلة وهي التصفيق ونتلافاها بوضع بنزين 92 وضبط توقيت الشرارة المناسب
ولا بد أن تكون دورة التبريد 100% حتى لا تسخن السيارة لأن هذا التعديل يزيد من السخونة

2 - وهو يقول أنه غير نظام الشكمان بنوع رياضي وهذا ما زاد أيضاً من الأحصنة

الحقيقة أنا عملت في عربيتي (ال 128 موديل 76 بها موتور ريتمو 1300 ) التغيير الأول
وفعلا العربية كانت طيارة وسحبها لا يقاوم :twisted:
ولكن عمر جوان وش السلندر بيقل :(
لذلك لا أنصحك بذلك منعا لكثرة المشاكل

**Haytham4ever** · 24-09-2007 01:24 AM

اول مرة اعرف الحكاية دي
على حد علمي اللي بيقشط من وش السيلندر لما بحصل فيه اعوجاج ولا حاجة بيحط اتنين جوان
طيب يا ترى هو بيقشط الوش كله و لا مناطق معينه
و ايه التعديل اللي ممكن يتعمل في الشكمان
و لو في حد عنده اقتراحات تانية يا ريت يتحفنا بيها

**sab3aawy** · 18-11-2007 04:05 PM

كشط وش السلندر يؤدى الى صغر المساحة المتاحة لمخلوط الوقود والهواء بعد شوط الإنضغاط مما يؤدى الى رفع نسبة الإنضغاط والتى تشكل عامل مؤثر فى زيادة القدرة الحصانية، فكلما زاد ضغط الوقود قبل الإحتراق ادى هذا الى ارتفاع درجة حرارة الإحتراق، وبالتالى ارتفاع ضغط الإحتراق، وبالتالى القدرة الحصانية

لكن فى نفس الوقت وكما ذكر اخونا احمد ارتفاع نسبة الإنضغاط يودى الى حدوث احتراقات موضعية وبالتالى تكوين جبهات احتراق متعددة تؤدى للصفع (التسقيف) ، ولذلك يجب استخدام نوعية وقود تثبط الصفع (بنزين عالى الاوكتان)

النصيحة قبل ما تفكر فى هذة التعديلات انك تدور على السبب الذى ادى لتدهور اداء محرك سيارتك، هل البوجيهات تدهورت، هل المحرك فوت ، هل الكاربراتير تدهور، حاول علاج امراض محركك اولا قبل البحث عن تعديلات

**Xpert** · 30-11-2007 12:58 AM

بص يا سيدي .. اول حاجه اقولهالك .. لو هاتبيع قوللي :D
تاني حاجه .. تبقي خربت الدنيا لو بعت الموتور الاصلي .. لو رقم الموتور زي رقم الشاسيه
تالت حاجه .. عاوز تجري . ركب اونو تيربو كامل بعفشته ..
رابع حاجه .. اللي عمله الراجل .. قشط الوش و ده زود الكبس بتاع الماكنه .. لانه بيحط جوان واحد بس مش 2 .. مانصحكش انك تعمل كده غير لما تعرف الكبس الاصلي بتاع الماكنه كام .. و حدودك ال 10:1 لو اقل اعمل .. مش اقل ماتعملش ..لسبب واحد .. كل ما زاد كبس الماكنه .. هاتحتاج بنزين انضف .. و احنا ماشاء الله البنزين بتاعنا زباله الزباله ..
اليوجو 65 هيا ال 128 بتاعه بره ... اصلاً ال128 بعد 87 كله يوجو بره ( ال128 اليوغوسلافي = الزاستافا)
هوه قشط الوش 1,5 مم و ركب شكمان اسبور .. ده كل اللي عمله .. و اعتقد انه بالغ شويه لما قال انها جابت 95 حصان

**paladin** · 30-11-2007 02:11 PM

if your head wasn't shaved before then go for it or you can search for a thinner head gasket the performance will be a lot better but take care that the car will get hotter

**Haytham4ever** · 04-12-2007 07:18 PM

فعلا الموتور خف شوية لاني كنت بفتري عليه شوية
اكيد كبسه قل
و كمان الكربراتير دوخني .... رحت لواحد بتاع كربراتيرات في الحي السادس ضبطه و البوجيهات بقت حارقه كويس اوي
و بعد كده رجعت سوده تاني !!
انا حطط بوجيهات دينسو 3 شمعة جايبهم من الوكيل اللي في التوفيقية عشان اتاكد انهم اصلي
و بقالهم دلوقتي يجي 30 الف كيلو
هل ممكن انها تقلل القدرة مع العلم ان مفيش اي تقطيع و الدوراه الصبح من مره و كله تمام
حد يعرف واحد بتاع كاربراتيرات بس يكون 100% مش اقل

آخر استفسار بقه
موضوع اني اوسع الموتور من جوه و اخليه 1500 سي سي
هل ده ممكن و ليه مشاكل و لا لأ
و مكلف برضه و لا لأ

و جزاكم الله خيرا

**Haytham4ever** · 04-12-2007 07:23 PM

سؤال اخير بالمرة
الشكمان اللي بيعملوه اللي هو بيلغي الفرن خالص و بياخد اربع مواسير من اول الموتور و يتجمعوا زي المشترك كده و بعدين ماسورة الشكمان قبل العلبة
الراجل بتاع الشكمانات اللي في احمد سعيد لاقيته عنده
ده بيفرق جامد في السحب و لا مش اوي
علما انه قالي ثمنه 300 جنيه