إزاي تعرف إن عربيتك الكرولا M-mt محتاجه السوفت وير الجديد

**bronze** · 09-04-2009 09:09 PM

النهارده أنا كنت في توكيل تويوتا العبور. وسألت المهندس / محمد سند (مدير الصيانه) إزاي أعرف إن عربيتي محتاجه السوفت وير الجديد اللي نازل عشان ضبط الفتيس M-MT. الإجابه كانت كالتالي:
-دور العربيه وحط دراع الفتيس على الوضع الأتوماتيك E وإنت دايس فرامل. وبعدين شيل رجلك من على الفرامل وماتدوس بنزين خالص. لو العربيه إتحركت لقدام عادي (زي العربيات الأتوماتيك العاديه) يبقى إنت نازل في عربيتك النسخه المعدله. أما لو العربية متحركتش أو حسيت برجرجه جامده يبقى تروحلهم وهما ينزلولك السوفت وير الجديد على حساب الضمان.

وأي أوامر

**faroukahafeez** · 10-04-2009 01:12 AM

المشاركة الأصلية كتبت بواسطة bronze

دور العربيه وحط دراع الفتيس على الوضع الأتوماتيك E وإنت دايس فرامل. وبعدين شيل رجلك من على الفرامل وماتدوس بنزين خالص. لو العربيه إتحركت لقدام عادي (زي العربيات الأتوماتيك العاديه) يبقى إنت نازل في عربيتك النسخه المعدله. أما لو العربية متحركتش أو حسيت برجرجه جامده يبقى تروحلهم وهما ينزلولك السوفت وير الجديد على حساب الضمان.

وأي أوامر

الموضوع ده كان خلاف للناس اللى عندها السوفت وير القديم
فى ناس اقالت انها مش بتتحرك على الوضع E خالص وناس قالت انها بتتحرك ببطء والاثنين نزلوا السوفت وير الجديد

اعتقد ممكن نكمل الموضوع ان العربية لو فيها سوفت وير قديم مش هتتحرك او هتتحرك برجرجة زى ما قولت

**magnooon** · 11-04-2009 11:28 AM

السلام عليكم
الكلام ده مش ممكن يكون مظبوط لسبب
انا مستلم عربيتى 2008 ادفانسيد من اول دفعة نزلت مصر من كورولا الشكل الجديد
وده كان فى شهر 1 2008
وعامله لحد دلوقتى 30000 كيلو
وزى الفل معاى
والعربية لو جبتها على ال e هيه واقفه حتتحرك لوحديها قدام من غير ما ادوس بنزين خالص
يبقى ازاى العربيه وانا مستلمها من اول دفعه نزلت مصر وبتتحرك من غير ما ادوس بنزين والعربيات اللى تم تسليمها بعد كده فيها المشكله ديه!!!!!!!!!!!!!!