بمناسبة الصيف المولع , أخبار العزل الحراري للزجاج إيه ؟

**abou_ruqi** · 12-04-2009 01:23 AM

يمكن في مننا يعرف الفي كوول v-kool

وده عبارة عن فيلم شفاف (استيكر) بيتلزق على زجاج العربية بيمنع وصول معظم حرارة الشمس إلى الصالون وبيمنع كل الأشعة فوق البنفسجية
وده بيخلي الجو جوه العربية بارد حتى لو ركنتها في الشمس طول النهار وكمان بيحافظلك على خامات الصالون , بصراحة فوايده عظيمة

إنما سعره بقه اللي يخلي قرار تركيبه مستحيل , زمان (من سنة) كان بيتكلف من 1500 إلى 2500 جنيه و كان الإقبال عليه ضعيف جداً
إنما كنت لسه في الشركة (بريدجستون) من كام يوم بسأل علشان أركب في عربيتي قبل الصيف لقيت الدرجات الشفافة (أنا ما سألتش عن الفيمية علشان مكنتش ناوي أركبه) هما درجتي
60 % وده حيتكلف 4500 جنيه !
و 70 % وده حيتكلف 6000 جنيه !!!!!!

بسأله : خير إن شاء الله ؟ ليه يعني ؟
قالي اصل الخامة بقت غالية والجمارك عليها برضه بقيت غالية قوي !
قالتله لا ربنا يوفقكم أنا كده كويس قوي ومالها الشمس يعني هو حد لاقيها
دا انا اركبت تكييف اسبلت 4 حصان ساقع وسخن واحط الكمبروسور فوق السقف ارخصلي !!!
وكمان المنتج اميريكياني واحنا في مقاطعة دلوقتي

المهم قعدت اعس لحد ما سمعت إن في واحد بيبع منتج بديل تايواني بـ 50 جنيه المتر (يعني تغرق العربية بـ 250 جنيه !)

رحت عليه وسألت لقيت المتر بـ 75 وتركيبه بـ 75 وأنا عربيتي تاخد 4 متر يعني العملية كلها بـ 600 قبل الفصال !!

شوفت الخامة لقيتها شبه قوي بتاعة في كوول بس لسه مجربتهاش على مصدر حراري (علشان أشوف بتنفذ منها الحرارة وألا لا)
الجميل بقه إنها 75% يعني أقوى من الفي كوول بس في مشكلة !

الاستيكر مش شفاف 100% فيه درجة فيميه يعني حيغمق الزجاج شوية (صغيرين مش اسود يعني ) فمش عارف أركبه و حيعدي و ألا اللجان و الكماين حيعملوني لعبتهم ؟
وهل حيعدي في الفحص السنة الجاية ؟؟

شوروا عليا يا أخواني , البتاع ده بصراحة طالع من عيني في اتنين صحابي مركبينه في عز الصيف تحس إنك مش محتاج تولع التكييف , ده غير إن أول ما تولع التكيف تبقى العربية تلاجة

أعمله وألا لا ؟؟؟

**amir** · 12-04-2009 01:46 AM

اهلا و سهلا يا ابو رقيه
من زمان و احنا مدخلناش في موضوع مع بعض
لو افتكرتني يبقي اكيد فاكر سؤالك ليا
انا عندي 27 سنه
المهم
انا معاك في ان الفي كول مبالغ في سعره قوي قوي قوي قوي باستهبال كبير
و كنت برضو سمعت عن بديل ليه تايواني كده بس الروله كانت ب100 جنيه(الكلام ده من 3 سنين)
بس فكره انه هيبقي غامق سنه مع ***** المرور مش هتعدي بالساهل
انا النهارده كنت في العتبه بجيب حاجات و شفت النصبايه بتاعتهم و البواخه بقي انهم بيوقفو اي عربيه يقدرو عليها في نص الشارع و مش مهم المش عاجبه
و في ظرف ثواني قليله الشارع بقي ساحه للتعارف و التواصل و صله الرحم كمان بين الناس اللي سايقه
فمش عارف الواحد يركب اللي بتقول عليه ده و ياخد شهاده بيه انه ضد الشمس(كان عضو معانا هنا قال انه اخد حاجه زي كده من بتوع الفي كول و كان بيطلعها لأي حد يوقفه فيميه)
ولا ايه

لقد خالفت القاعدة رقم 9 والقاعدة رقم 12 لذا حصلت على تحذير "كعقوبة مخففة"، كما تم تغيير بعض الألفاظ الحادة بمشاركتك، يرجى التدقيق في اختيار الالفاظ المناسبة.

(إ.م.2)

**masterzmind** · 12-04-2009 02:49 AM

والله انا مش عارف الواحد يعمل الواحد لو ركن العربية فى الشمس يعد ساعة مشغل التكيف عشان يحاول بس يسقع العربية..................... بس الشفاف دة احسن عشان لجان المرور والناس الحلو دية بس غالى اوى 600 كتييييييييييييييييييييييي ييير اوى بس هايفدك جامد اوى بس استنى شوية لما يخش الصيف اكيد الصين هاتزل حاجة مكفاة بى وهيكون ارخص

**onsi** · 12-04-2009 02:54 AM

طيب علشان نقدر نحكم على لونة ياريت صورة بالموبايل وتنزلها عشان نقدر نحكم على التايوانى دة
بس بصراحة سعرة كدة يبقى هايل
وياريت يا باشا تقلنا على مكانة , العنوان والتليفون

**MoMohsen** · 12-04-2009 03:23 AM

طب يا ريت بيانات اكتر عن البديل التايوانى.يمكن نلاقى منه شفاف و نعرف نجيبة من برة

**أشرف فتحى** · 12-04-2009 05:25 AM

المشاركة الأصلية كتبت بواسطة MoMohsen

طب يا ريت بيانات اكتر عن البديل التايوانى.يمكن نلاقى منه شفاف و نعرف نجيبة من برة

+111111111111

**Nour_Peugeot** · 12-04-2009 09:25 AM

انا عندي في العربيه ال 4 زجاج لونهم بني و بيغمق معا الشمس و يفقتح بليل

فا اعتقد انا كده لو محتاج هجيب للزجاج الخلفي و الامامي فقط

بس لو صورتلنا درجه اللون بتاعته تبقي 100 %

**abou_ruqi** · 12-04-2009 09:44 AM

المشاركة الأصلية كتبت بواسطة onsi

طيب علشان نقدر نحكم على لونة ياريت صورة بالموبايل وتنزلها عشان نقدر نحكم على التايوانى دة
بس بصراحة سعرة كدة يبقى هايل
وياريت يا باشا تقلنا على مكانة , العنوان والتليفون

اسمه "القبارى" في سوق الإكسسوارات - عزبة سعد -سموحة - اسكندرية

طيب يا شباب القاهرة أكيد عندكم في ناس شغالة في الموضوع ده و يمكن نلاقي الشفاف في القاهرة ؟
ما حدش يعمل معانا الواجب ده و ينزل يسأل في سوق الإكسسوارات ؟ (أكيد عندكم في سوق اكسسوارات ! )

**abou_ruqi** · 12-04-2009 09:48 AM

المشاركة الأصلية كتبت بواسطة onsi

طيب علشان نقدر نحكم على لونة ياريت صورة بالموبايل وتنزلها عشان نقدر نحكم على التايوانى دة
بس بصراحة سعرة كدة يبقى هايل
وياريت يا باشا تقلنا على مكانة , العنوان والتليفون

المشاركة الأصلية كتبت بواسطة Nour_Peugeot

انا عندي في العربيه ال 4 زجاج لونهم بني و بيغمق معا الشمس و يفقتح بليل

فا اعتقد انا كده لو محتاج هجيب للزجاج الخلفي و الامامي فقط

بس لو صورتلنا درجه اللون بتاعته تبقي 100 %

حقربلكم اللون
حد عارف شكل الكيس البلاستيك اللي بيتلف فيه الهارد ديسك ؟
نفس اللون ده
رمادي مفضض