ايه الاستفزاز ده

**kingtefa** · 12-04-2009 11:25 PM

انا لسه راجع من مشوار و للاسف شفت موقف فى منتهى الببواخة" انا اسف على هذه الكلمة "
مشروع خابط عربية ملاكى فيها اب و ام و طفلين و الاب من نوع الناس الطيبين
اللى من الصعب نلاقيهم اليومين دول
سواق المشروع نازل و عاوز يضرب الراجل مع العلم ان سواق المشروع هو اللى غلطان و العربية بتاعته اتحكت حكة بسيطة و عربية الراجل اتبهدلت
نزل سواق المشروع و عاوز يضرب الراجل و عمال يشتم الراجل باهله شتايم وحشة
و الله الدمعة كانت حتفر من عين الراجل و هو بيتهزء ادام عياله و مراته مستحيل حد يتخيلها
الموضوع استفزنى انا و صاحبى فركنت و رحت عشان اخلص الموضوع و للاسف السواق قل ادبه عليا و من حسن الحظ عربية شرطة كانت معدية و للاسف وقفتها انا بالعافية "البيه الظابط مكنش عاوز يقف " و خلص الموضوع بصراحة انا سمعت كلمة شكر من الراجل و دعوة فرحتنى بجد
انا اسف عشان طولت بس المهم بقى ليه احنا بقينا كده الناس شايفة الراجل بيضرب و ساكته و واقفين بيتفرجوا ليه بجد فين شهامة المصرى و رجولته

**MoToRiZeR** · 12-04-2009 11:39 PM

سلبية الناس هي اللي خلت "أسف في اللفظ" كلاب السكك عايزين يبقوا أسود .

يعني الواحد دلوقت بيبقي مطمن إنه حتي لو عمل إييييييه في الشارع محدش هيكلمه .. مشي عكس .. ضرب واحد .. كهربه .. موته .. خبطه و جري .. قلبله عربيته عالطريق و جري .. أي نوع من أنواع الجرائم .. محدش هيقوله بتعمل إيه .. و يعني اللي بينحرر نفسه أوي بيقول "لااااااا حول ولا قوة إلا بالله!!!" أكنه بيشوف الخبر في التليفزيون .

الحل في المواقف اللي زي دي .. إن رجالة الشارع اللي زي حضرتك ما عملت كدة يروحوا يوقفوا البني أدم ده عند حده عشان الراجل يعرف يرفع وشه في وش مراته و ولاده تاني من غير ما تكون عينه مكسورة و يحس إن لسة فيه خير في الدنيا .. و مهما ساء الموقف مش هيكون أسوأ من لو متدخلش حد .. عالأقل لو متدخلتش هتروح بيتك و إنت قلبك مقبوض و بتسأل نفسك يا تري هيحصل إيه اما ييجي عليك الدور و يحصلك إنت الموقف ده.

متسيبش نفسك للسلبية عشان لو حصلك حاجة ربنا يوقفلك اللي يقف جنبك من غير ما يكون يعرفك

و أخيراَ أحييك علي موقفك النبيل .. ربنا يكتر من أمثالك .

**HeMa_LanCeR** · 12-04-2009 11:55 PM

لا حول ولا قوه إلا بالله علي البلد دي
ربنا يجازي ولاد الحلال

**moudy88** · 13-04-2009 01:12 AM

احييك على شجاعتك ونبلك اللي للاسف بنفتقدهم في الزمن ده ...وانا زيك كده جريء وبتمتع بشيء من الشجاعه ولكن للاسف بتبهدل كتير وغالبا ببقى لوحدي والناس كلها ياما عليا ياما بيتفرجوا للاسف تملكهم الجبن ....