الموضوع: نجدت من الموت الماكد .. سبحان الله ..!

بسم الله الرحمن الرحيم .

اولا انا لغاية الان بحمد ربنا و فى قمة اندهاشي الفظيع من اللى حصل ده ..

امبارح بالليل صاحبي كان لسه شاري ريجاتا و بعد ما اشتراها على طول رحنا مشوار العجوزة و اخدنا مطلع 15 مايو .

كنا ماشيين على 65 / 70 تقريبا و كان قدامنا ميكروباص و فجاة تاكسي وقف على اليمين بدون سابق انذار و الميكروباص اتحدف شماااال والغبي هدا سرعته جمب التاكسي .

وطبعا احنا وراه فقدامنا خيارات .
ياأما نخبط فى التاكسي او الميكروباص او فرامـــــــل للاخر .

طبعا صاحبي داس فرامل على الاخر و حدف شمال شوية علشان نبقي ورا الميكروباص ومنخبطش فى التاكسي .

و فجاة مرة واحدة راحت العربية لفت بينا 90 درجة يمين و 90 درجة شمال تلات مرات وفى الاخر زحفت الى السور .

والعربية بتلف بينا يا جماعة انا مكنتش خايف او مخضوض ولكن لما اقتربنا من الصور وخلاص العربية هتاخد الصور فى طريقها .

جالى احساس رهيب محستش بيه قبل كدا .
عجزت عن الكلام بجد وبقيت فى قمة زهولى من المنظر .

سبحان الله . سبحان الله . سبحان الله بجد .

العربية وقفت عند العمود بتاع النور اللى فوق الرصيف بصدفة غريبة وكانت لامسة السور .

نزلنا من العربية الحمد لله اصابات خفيفة جدا .
ولكن العربية اتدمرت وفيها شغل كتير جداااااااا جدااا ..

كانت الساعة 2 وشوية وطبعا مش عايزين نقلق حد من النوم وقلنا نتصرف بقي .

صاحبي كانت اعصابه منهارة ومش عارفين نعمل ايه .

وكان فى سواق ميكروباص وقف معانا ( ربنا يكرمه ) .

شوية كده بعد ما اعصابي هديت نوعا ما .
اتصلت ب 122 و ردوا عليا بعد خمس دقايق .
رد عليا واحد اهبل كده ومش فاهم اى حاجة وقعدت افهم فيه ساعة .
واقوله يا عم ابعت لنا ونش يشيل العربية . يقولى طب قولى ايه تفاصيل الحادثة حرق دمى بجد وكان جمبه واحد عمال يهزر معاه وقمة الاستهتار اللى فى الدنيا .

ومبعتش حاجة الغبي . وبالصدفة كانت عربية بوليس معدية الناحية التانية رحت موقفهم وقلت للظابط ابعت ونش . قالى طيب وطار .

جه الونش بعد 10 دقايق و طبعا الناس عمالة تتفرج على العربية كانها قطعة من ابو الهول او تراث مصرى قديم .

وفى واحدة اجنبية صورت وهى ماشية و كان فى ناس محترمة نزلت علشان تساعد و قلنا لهم شكرا جزيلا وكان فى شباب عايزة الحرق كانوا بيقولوا تعليقات فظيعة .

الونش قعد يرفع فى العربية 12 دقيقة تقريبا والكوبري توقف تمااااماااااا وكان فى اكتر من 350 عربية واقفة بتتفرج على عملية الرفع التاريخية ..

بعد ما الونش نزلنا قدام مبنى الاذاعة والتليفزيون . كان لازم نركن العربية فى جراج عبد المنعم رياض وكان لازم نزقها طبعا ..

ببص كده على النيل على اليمين لاقيت ما يقرب من 30 بنت بتتحب والساعة كانت 3 الفجر وطبعا كل شاب يقولك انا اسيب خطيبتى علشان ازق معاكم ( يا عم بلا وجع دماغ ) .

شفت ندالة من الناس بطريقة بشعة خلتنى عمرى ما هفكر اساعد حد ابدا :(

الحمد لله عدت على خير .. بس انا مش عارف انسي اللى حصل ده و مش عارف اتكلم حتى من المنظر ..

انا مردتش احكى حاجات حصلت معانا علشان هى مش ناقصة بصراحة .

ربنا يستر طريق الكل ..

المشاركة الأصلية كتبت بواسطة harmadan

الاخ العزيز مصطفى
الف حمد لله على سلامتك حضرتك وقدر الله وماشاء فعل
ان شاء المولى الكريم يعوض حضرتك بكل خير ويعوض صاحب السياره بكل خير عنها.
تجربه مريره وخصوصا فى ان تتوقع عكس ماحدث معك فى هذه المحنه ولكن اجدنى مضطر لان اقول لحضرتك فلتاخذ عبره مما حدث وكن انت الافضل. دينيا اولا وانسانيا ثانيا ستجد حضرتك (بفضل ايمانك بالله) تهرع للمساعده بصرف النظر عما حدث معك .
لاتجعل هذا الموقف المشين يغير من اخلاقك او طبيعتك او شخصيتك بل بالعكس اجعله سببا لكى ترضى ربك اولا ثم ترضى نفسك ثانيا وتثبت لنفسك - على الاقل- ان الانسان الطيب المتعاون بصدق لازال موجودا رغم مانعانيه الان -وما احوجنا لذلك.
مره اخرى حمدا للمولى عز وجل على سلامتك وسلامه صاحبك.

بشكرك جدا على مشاركة حضرتك ..

المشكلة بس ممكن تكون فى ان دمى محروق شوية من اللى الواحد شافه .

و لكن ان شاء الله مهما حصل اخلاقى مش هتتغير ..:)