الموضوع: رجال المرور .. هل هم فعلاَ بهذا السوء ؟

الله ينور عليك يا محمود

كلام جميل جدا جدا جدا و من زمااااان ماشوفتش حد بيفكر بطريقة إيجابية و واقعية زيك كدا و فعلا بيحاسب نفسة قبل مايرمي الغلط على غيرة

و فعلا لو كل الناس اعادت نظر في كل اللي حواليها بنفس المنطق اللي اتكلمت بيه دا اكيد الحياة هتختلف تماما

تقبلنا تحياتك و لك منا اجمل منها

فى مثل بيقول ابعد عن الشر وغني له .

مادام انت فى السليم خلاص .

اخر غرامة دفعتها كانت الاستيكرات الوهمية اللى على العربية و من ساعتها معنديش استعداد اناهد واتعب فى نفسي مع ظابط ولا عسكرى .

المشاركة الأصلية كتبت بواسطة MoToRiZeR

خلونا نحط نجاربنا الشخصية السيئة علي جنب و نبص للصورة كاملة و لأداء إدارة المرور و إدارات تخطيط الطرق مؤخراَ .

أولاَ لنبص للطرق اللي تم تجديدها و خاصة المحور .. هذا الطريق كان طريق الموت بمعني الكلمة .. و ما زال .. و لكن لما تم تجديده لم يتم تجديده كأسفلت فقط .. تم إضافة رادارات كثيرة علي الناحيتين للحد من السرعة .. و تم إضافة لافتات لتحديد مكان الرادار بالضبط، أعتقد حركة زي دي بها من الشفافية ما يلغي أي نية إنه لابدلك في الذرة لحد ما تجري و يقفشك ! الراجل بيقولك السرعة بتاعة الطريق أهيه و الرادار أهوه .. و اللي يخالف بقي يستاهل اللي يجراله ! طب هو ما زال طريق الموت ليه ؟ لأن الــــنــــــاس بتعدي الرادار و تقوم مسقطة غيار و تجري لحد الرادار اللي بعده !! يبقي العيب علي مين؟

نبص لحاجة من قانون المرور الجديد .. حبس المخالفين للسير عكس الإتجاه .. مبدئياَ الشرطة هتستفيد إيه اما تحبسك ؟ لو الغرض النهب كان يبقي الغرامة المالية الفورية فقط .. يعني يوقف المخالف و يقوله ألف جنيه .. و مش هيهتم بحبسه .. قضية إن فيه ناس متعودة تمشي عكس و إتفاجأت إنها بتتحبس دي مشكلتهم هما .. لأن الموضوع أشبه بأنك تقول انا متعود أنشل الناس في المنطقة دي هما ليه وقفوا شرطة هناك ! لأن السير عكس الإتجاه "نشل" لحق السائرين في الإتجاه الصحيح .. و تغليظ العقوبة بهذا الشكل و بشكل معنوي و ليس مادي دليل علي نية في الإصلاح .

طيب مخالفات الزينون و الفيميه ؟ ما الزينون فعلاَ مؤذي و بيعميك بشكل لحظي و إنت ماشي و ممكن يسببلك حوادث .. و الفيميه طبعاَ أي زائر للمعمورة أو المنتزه في إسكندرية أو بعض المناطق في المقطم و 6 أكتوبر في القاهرة عارف مفعوله كويس .

حوادث إصطدام السائرين بالسيارات في 6 أكتوبر تم معالجتها بعمل مطبات صناعية ملونة و عمل أربع لافتات تحذيرية قبل كل مطب .

طب نبص للإحتكاك مع رجال الشرطة في المرور .. كثير منهم يتسم بإنه " إتم " و رخم و كثير منهم مرتشي .. و لكن كثير منهم برضه محترم و الدليل موقف شخصي لما طلعت أجري ورا واحد خبط واحد و جري و كنت بجري وراه علي 140 و 150 عشان ألحقه .. بعد ما بلغت و مسكوه الضابط من نفسه أخد رخصتي و قاللي إستني هشيللك صور عربيتك من علي الرادار .. و تجربة أستاذ "سندباد" في المنتدي هنا اما سحبوا رخصته و قالهم انه عمل المخالفة لأن بنته تعبانة في العربية .. وقفوله الطريق عشان يعدي و رجعوله الرخص ! و انا عن نفسي في موقف خاص سابق كنت صعدت أحد المواضيع لأحد القيادات الأمنية الكبيرة في 6 أكتوبر و إستغربت لإهتمامه الغير عادي .. و فوجئت إنه بيقولي إنه فقد أولاده و زوجته و أخوه في حادث سيارة علي طريقة "إخبط و إجري" برضه بعدما قلبتهم سيارة أخري ثم إحترقت سيارتهم .. لذلك فرجال المرور زينا زيهم بالضبط فيه منهم الصالح و فيه منهم المرتشي .. فيه المحترم و فيه قليل الأدب .. و بيفقدوا أحبائهم في الحوادث زينا زيهم بالضبط .

انا كتبت الموضوع فقط لأن بلاحظ في المنتدي أو في مجتمع أصدقائي حد يقول "دفعت غرامة عشان كانوا حاطين رادار و انا كنت ماشي 180 حسبي الله و نعم الوكيل!!" طب بتحسبن علي إيه يا أخي انا لو مكانهم و الله ما أمشيك غير و إنت دافع الغرامة و لو ينفع أسحب منك الرخصة كمان هسحبها .. 180 يا مفتري هو إحنا فين !! و اللي يقولي سحبوا رخصة العربية عشان رخصتي مكنتش معايا .. طب ما طبيعي يعني !! هوا إيه المطلوب من المرور بالضبط ؟ يسيبونا نعمي بعض و نموت بعض عالطريق و اللي عايز يعمل حاجة يعملها ؟ طب ماهو ده الوضع حالياَ .. و لكن فيه نية في الإصلاح لمستها مؤخراَ و ربنا يسهل .. يبقي منزعلش إن القانون بيتطبق علينا عشان إحنا ناس محترمة و المفروض نتعامل أحسن من كدة .. و المثل بيقولك إمشي عدل يحتار عدوك فيك .

صحيح فيه غياب للعدل و فيه ناس مش بيتطبق عليهم القانون و ساعات بعض رجال المرور بيستعبطوا إنما مفيش نظام في الدنيا صالح بنسبة 100% و المفروض إحنا نتشعبط في حبة الصلاح اللي عندنا مش نتلزق في الجزء الفاسد و نقول أصل مفيش عدل .

و لكم تحياتي مقدماَ .

سيدي أحييك على كلامك المنطقي الصحيح و فعلا احنا شعب يخاف و لا يختشيش و لو ثبتنا عوامل الأداء السئ للشرطة و عدم كفائة بل و فساد العديد منهم سنجد بعد ذلك ان الناس لا تتقبل النظام و عاوزين يعيشوا كدة تماما مثل التعبير القرئاني "كالحمر المستنفرة, فرت من قسورة"
خاصة قيما يتعلق بجريمة السير عكس الإتجاه و التي كانت عنوانا لأحد مواضيعي السابقة على هذا المنتدى و التي طالبت فيه بأن تكون عقوبة السير عكس الإتجاه هي الإعدام شنقا في ميدان عام لأنني أعتبرها من وجهة نظري جريمة قتل تعبر عن الجهل و الأنانية و الهمجية.
للأسف يا سيدي تمارس هذه الجريمة يوميا و في كل مكان من أرض المحروسة و بطريقة سافرة و مستفزة و إذا جرؤت و عبرت عن إستيائك ربما ضربك أو شتمك مرتكب تلك الجريمة و أجبرك على أن تعود بسيارتك الى الخلف مع أنك صاحب الإتجاه الشرعي فهو همجي و غير متحضر.
إذا فلا مبالغة اذا طالبنا بتغليظ العقوبة لذلك الجرم الكريه.
سيدي العزيز مفيش فايدة!!

رغم صرامة قانون المرور الجديد، الا انى احس ان هذا هو السبيل الوحيد لردع المستهترين و غير الملتزمين..... فى ناس كتير جدا يستعملون السيارة و الطريق فى ما جعلا له اى الوصول من مكان لمكان بسلام- مرة اخرى بسلام- وهذا هو كل ما يهمهم..... ذنب الناس دى ايه لما تتأذى بسبب شاب مستهتر بتاع شد و جذب و غرز و عمل مشكلة هم مش طرف فيها لكنها اثرت عليهم؟
ذنب الناس دى ايه يتم ارهابها و ترويعها فى الشارع و هى ملتزمة بالسرعة القانونية و تعليمات القيادة الصحيحة و قانون المرور؟
هل انقلبت الاية و اصبح الذى يمشى صح هو المخطئ لذلك يتعدى عليه المستهترون بهذا الشكل؟

لذلك اعتقد ان قانون الجديد، رغم شكاوى الناس منه غالبا لعدم التعود على النظام الصحيح، الا انه خطوة جادة لعودة الامور لنصابها الصحيح..... التى تصب فى مصلحة الالتزام و الملتزمين.....

في الدول المحترمة .. قانون المرور عندهم شيء صارم جداً جداً

مفيهوش الإستهتار اللي عندنا هنا .. وفي الأخر إحنا بنهاجم الحكومة ونقعد نسب في البلد وخلاص

تعالو نشوف الطرق السريعة زي الدائري تلاقي الطريق شبه مقفول والعربيات ماشية ملزقه في بعض

وتلاقي واح معندهوش دم عمال يرعشلك من وراك ويعدي ويغرز و شوية يمين وشوية شمال لحد ما يلبس في حد ويدمر الدنيا

وبعدين نزعل لما نلاقي رادار ولا لجنة ...

أعتقد المشكله مش في المرور ورجال الأمن وخلاص المشكلة الأكبر فينا إحنا

لازم نحترم بعضنا الأول .. ونبطل إستهتار