عرض للطباعة
يا جماعة أنا قالولي في معرض جابر عبد الشهيد إن el-jetta ١٫٤ TSI إللي في السوق دي مواصفات اروبي مش خليجي، و طبعاً دي تعتبر مشكلة، و بعدين أنا رحت عند معرض تاني عندو ال -TSI و شفت على العتب ملإتش ولا كلمة بتقول انها خليجي ؟ ، في حد عندو معلومات عن الموضوع دة؟
أنا معرفش ، بس هو إنت ايلي أكدلك الموضوع دة علشان لات الكتالوج (ElManual) بتاعها يعني بلالماني بس ؟
بص يا سيدي أنا كل إلي أعرفو إن ال-TSI منزلش الخليج و الكلام دة مؤكد عن طريق الوبسايت بتاع VW فا غليبن كدة كلام جابر عبدالشهيد صح بالذات انك ملإتش كلمة إن العربية دي مصنوعة مطابقة لل مواصفات الخليجية عالأيم إلي جانب باب السواء لكن باءة هل دي مشكلة والله لأ دي حاجة مش هنعرفهة إلا إذا كلمنا حد ركبها و برد خلي بالك إن ال-TSI في منه كذا كاتجري و إن ال-١٢٠ حصان دي بطيئة أبل ٢٥٠٠ لافال فالدقيقة
i was tring to help as much as i can, as i am waiting for the golf 6 to be announced in egypt with a TSI engine but i don't know if i will go for the 120 hp or not it have turbo vhargeer only and no super charger fa ma3na keda is that car have to make good revs before screaming on the tarmach and kiking some buts, we dah mesh lazzez.
اقتباس:
المشاركة الأصلية كتبت بواسطة abdallah79
ممكن ترجمة لو سمحت.....طريقة الكتابة صعبة ياريت نلتزم بقواعد المنتدى...
يا عزيزي واحدة واحدة من فضل حضرتك
في ثقافة سائدة في المجتمع اللطيف بتاعنا وهي إن شركات العربيات بتنزل عربيات مصنعة خصيصاً لسوق معين وفي الحالة بتاعتنا الناس بتدعي إن فولكس مصنعة عربيات خصيصاً للشرق الأوسط (منطقة الخليج)
طيب لمعلومات لحضرتك هذه المعلومة عارية تماماً من الصحة ومش ممكن يحصل كده أبداً لأن تكلفة إنتاج موتور وإجراء اختبارات عليه لمنطقة معينة باهظة بشكل مخيف وتيجي بقى المفاجأة اللطيفة إن ممكن العربية متعملش مبيعات أصلا في السوق ده تبقى شركة العربيات لبسة في الحيط...
يبقى منطقياً مفيش حاجة اسمها مواصفات خليجي...
طيب الناس بتقول كده ليه؟؟
أقول لحضرتك.
فولكس مثلاً لما بتنزل عربياتها في اليابان بتنزل بكماليات غريبة ممكن أصلاً متكنش موجودة في الكماليات بتاعة العربيات الي بتطرحها في أوروبا وده لأن اليابان من الدول المنتجة للسيارات وفولكس بتحاول يكون يها تواجد قوي هناك..فمنطقي جداً تلاقي الحرب دي.. على سبيل المثال في البولو مثلاً حتلاقي كل العربيات البولو بتاعة اليابان بتزل بمريات جانبية بتضم (لحد سنة 2004) مع إن الأوبشن ده مش موجود في أوروبا أصلاً ولو بصيت على صورة الضفيرة بتاعة العربية مش حتلاقي أي وجود للكمالية دي...
نفس الفكر فولكس بتعمله بالنسبة للخليج، بس عن طريق سحب اكبر كمية من الفلوس بطرح عربيات بكماليات عالية ومواتير لحد ما معقولة..
انت كده كده مش حيفرق معاك العربية دي جاية منين لأن في الآخر فولكس هي الي مصنعاها ومصنع الجيتا معروف إنه في المكسيك وده الي مخلي العربية سعرها معقول لأن جمرك الجيتا بيدفع بالدولار مش باليورو ولو كانت العربية جاية من أوروبا كنت حتلاقي تمنها يزيد عن كده وده نتيجة اختلاف سعر العملة..
السؤال المهم هنا والي بيطرح نفسه، ليه توكيل فولكس في مصر مبيجبش العربيات دي؟
والإجابة واضحة وصريحة علشان النهب مش أكتر!!!
يعني بمنتهى البساطة كريم النجار صاحب شركة أوتوموتيف يقدر بمنتهى البساطة زي معمل صفقة عربيات الإسعاف يعمل صفقة مع فولكس تنزل عربيات بكماليات زي بتاعة الخليج عندنا في مصر ويكون سعرها أقل كمان من سعر الخليج، لكن هو يعمل كده ليه؟ أهم حاجة النهب وبيعتمد على إن إحنا بلد بتروج للإشاعات وفي الأخر الناس بتشتري العربيات الخليجي وهو يدفعهم الصيانة 200%
واللطيف في الموضوع إن العربيات الجديدة مينفعش مثلا تقول أنا حجبها من غير فوجات واركبلها فوجات بعد كده برة أو زينون
لأنها مبنية على تكنولوجيا مختلفة عن العربيات السابقة وتركيب الحاجات الإضافية دي ممكن يدمر حاجات تانية
يعني الي يقولك خدها من غير فوج وانا اركبلك فوج إعرف انه حيعك في العربية
والي يقولك خدها وحطلها رافع أوكتان اعرف ان مكانه الأصلي جنينة الحيوانات لأن رافع الأوكتان ملوش تأثير إلا على البنوين الفقير زي البنزين 80
والي يقولك انه حالياً بيعملوا تجارب علشان يغيروا السوفت وير بتاع الكنترول علشان العربية تمشي ببنزين 92 برضو مكانه جنينة الحيوانات لأن العبرة بتصميم المحرك مش بالكنترول.
آخر حاجة اقولها بقى، إن العربيات الخليجي هي هي نفس العربيات الي بتنزل في أمريكا
نفس الكماليات بس على القايم التعليمات العربي
في أمريكا التعليمات مش موجودة والمواتير بتاعة العربية 5 سلندر 2500 سي سي
أتمنى اكون وضحت أي حاجة
مافيش فايدة فيك يا أسامة موسى هاتفضل أستاذ و رئيس قسم الفولكس في المنتدى بس نصيحة صغيرة من أخوك حتى لا يتم اصطياد أخطاء عليك بلاش حكاية جنينة الحيوانات دي لأني عارف انك بتحترم الآراء الأخرى دايما حتى لو صاحبها بيفتي.
خالص احترامي.
محمد
علم وجاري التنفيذ
أللهم ارحمني لأني داخل نفسي قصدت الإساءة ولكني استخدمت طريقة غير مباشرة ولكنك أعلم بما داخلي
+++++++1:thumbsup:اقتباس:
المشاركة الأصلية كتبت بواسطة mohamed_hamdi
اقتباس:
المشاركة الأصلية كتبت بواسطة umoussa
شكراً للتوضيح، يعني مل أخر الواحد يشتري طالما عليها علامة ال-vw ،الموضع كلو فل options
المواصفات مش شرط معناها موتور جديد . في تصفيح أسفل العربيه وفي تكيف أقوى عشان الحر الزياده و فيه إن العربيه تكون أعلى عن الأرض عشان المطبات .
وبالتالي في عربيات بتنزل في بلد زي مصر مختلفة شويه عن اللي بتنزل في الخليج . وده يبان في عربيات كتير زي الكورولا والأكتافيا .
اسمحلي برضو أوضح لحضرتك حاجة تانية
المصفحة الي حضرتك بتقول عليها من الكماليات، لأن لو حضرتك شوفت أي عربية مفيهاش مصفحة حتلاقي أماكن تثبيت المصفحة موجودة فيها.
النقطة التانية في موضوع المصفحة، هي إن فولكس عادة بتحط المصفحة لما بتكون كرتيرة الزيت ألومنيوم وده علشان حمايتها ولو بصيت على العربيات الي من غير مصفحة حتلاقي غالبيتها بكرتيرة زيت من الحديد.
نيجي لنقطة العربية الأعلى..
طيب إيه الي حيرفع العربية من على الأرض؟ مش المساعدين والسوست؟
طيب أنا حسألك سؤال علشان تقتنع
انت دلوقتي ماشي على رجليك رحت أنا رافعك لفوق شوية فأصبحت رجليك ملمسة الأرض، بتعرف تمشي أه بس اتزانك صفر، مش برضو كلامي صح؟ طيب علشان رجليك تنزل الأرض حتعمل إيه، لازم تتقل نفسك شوية صح؟
نفس الفكرة في العربيات
الموتور لما بيكبر لازم يغير العفشة (مساعدين وسوست)
العربيات الباسات مثلاً الـ Fsi الموتور أثقل فالعفشة مختلفة.
نفس الفكرة في الجيتا
الأوكتافيا المساعدين بتوعها هما أه بتوع الجيتا بس تصنيع شركة تانية وعلشان كده انت ممكن تلاحظ ارتفاع بسيط في الجيتا عن الأرض.
يبقى خلاصة القول إن الموضوع برضو في الأول والآخر كماليات
ولو الموتور اختلف يبقى طبيعي جداً يكون في تغيير في العفشة
أتمنى أكون وضحت الفكرة
نسيت أقول لحضرتك حاجة تانية
في فولكس، التكييف ثابت حسب عدد الاسطوانات
يعني العربية 1400 سي سي 4 سلندر الكمبرسور بتاعها هو هو بتاع عربية 2000 سي سي 4 سلندر
لكن 5 سلندر الكمبرسور بيختلف
6 سلندر برضو بيختلف
وبما إن العربيات الي جاية من الخليج كلها 4 سلندر، يبقى برضو نقطة التكييف مش محل مناقشة
وبعدين النقطة الي غايبة عن الناس إن العربيات الخليجي دي أصلاً جاية من الخليج من موزعين (يعني بالبلدي كده أجنس عربيات) لكنها مش جاية من توكيل فولكس في الخليج... يعني انت بتشتري من موزع والموزع ده جايبها برضو من موزع.
والمنطق يقول إن الموزع ميقدرش يعمل صفقة مع فولكس الأم بمواصفات معينة بالعكس هو بياخد زي ما فولكس بتديله
طبعاً واضح مدي احترامك لمن يختلف معك في الرأي . أنا مش حرد علي هذا الإحترام .اقتباس:
المشاركة الأصلية كتبت بواسطة umoussa
أنا هرد على وجهة النظر . أحب أقولك أني دكتور في كلية هندسه وأن الكلام بطريقة الوصف بتعتك (من وجهة نظر هندسيه ) لا أقدر أن أعلق عليه برده فهو واضح.
هو أنا غلط في حضرتك أو قولت حاجة غلط لا سمح الله
أنا بحاول أوضح الفكرة بأبسط طريقة ممكن بالنسبة لحضرتك الفكرة ساذجة جداً وحضرتك حتفهمها بمنتهى البساطة لكن في ناس تانية غير حضرتك مش حيستوعبوا الفكرة غير بالتبسيط
وبعدين أنا مقلتش أي كلمة وضيعة أو خارجة حضرتك فهمت غير كده تبقى مشكلتك
أنا هدفي أشرح الفكرة بمنتهى البساطة مش أدخل في نقاشات جانبية تطلع الناس من جوهر الموضوع
وبعدين أصلاً إحنا اختلفنا مع بعض في إيه؟ حضرتك قولت اقتراحاتك بالنسبة للعربية وأنا رديت عليك بالمنطق وبخبرة عملية وعن تجارب شخصية كتيرة جداً كمان.
حضرتك إلي مش عايز تناقش ودي برضو مشكلتك
ولو انت شايف إني غلطت فيك - قولي غلط فيك في إيه وانا اعتذرلك أدام الناس يا سيدي
اقتباس:
المشاركة الأصلية كتبت بواسطة umoussa
اقتباس:
المشاركة الأصلية كتبت بواسطة Anxs111
اهلا يادكتور ربنا يفيد الطلبة بعلمك......بس اسمحلى رد حضرتك على الاخ صاحب الرد فى حده واضحه ......مش عارف لية ..الراجل لم يخطئ فى الحوار ..اسلوبه محترم فعلا وارى ان حضرتك واخد الموضوع بحساسية مش مفهومه...كل واحد هنا من حقه يقول رأيه ويرد فى اطار من الاحترام المتبادل وبدون انتقاص من قدر الاخرين.
وشكرا سلفا لحضرتك على تقبلك ردى
شكرا ليك يا أخ معتز .
معتقدش إن واحد يقولي "رحت أنا رافعك لفوق شوية فأصبحت رجليك ملمسة الأرض، بتعرف تمشي أه بس اتزانك صفر"
كان ممكن يكون ده مثال عام أو يتكلم عن نفسه إن حد رفعه لفوق شويه لكن إشمعنه عليه أنا .
طبعاً أنا مقلتش أني دكتور في الجامعه عشان أعيش على الشباب في الدور وكده
أنا حبيت أوضح إن كلامي مبني عن فهم وعن خبرة وللعلم أنا خبرتي العمليه كبيره وتدربت في مرسيدس في ألمانيا في مصانعها ٤ شهور كاملة ده غير أني غاوي عربيات .
الكلام بتاع الاخ اللي بيديني مثال إنه هيرفعني لفوق شويه كله مش سليم من ناحية المنطق وإسلوب عرض الافكار حتى بس مفيش شك إنه عنده خبرة .
ماينفعش تقارن عربيه جيتا بعربيه اوكتافيا في مسئلة العلو وتقول أصل ديه تقيله و ديي خفيفة ودي مساعدها مختلف .
لما تيجي تقارن بين خليجي ومصري تتكلم في نفس المركه عشان تقارن صح ويودحلك الفرق في ما أنت تقارن . يعني تقارن اوكتافيا باوكتافيا . وكل الناس عارفه إن الخليجي أوطى بحوالي 3 cm .
طب ليه عربيات زي vw طوارق تقدر تغير ارتفعها بالرغم من أنها نفس العربيه . كلام umoussa إن كل عربيه ارتفعها حسب وزنها وبرده بيقرن جيتا ب-passat . طب لو على كده ليه نفس العربيه بيتعير ارتفعها . وده في landrover في bmw الفئه السابعه ، يا تري هل بيذودوا وزنها .
وبعدين مين اللي قال إن المواصفات المختلفة معناها مواتير مختلفة زي م umoussa بدا كلامه في أول مشاركه هنا . ومواتير يجرابوهة ويختبروهة. ومصنع واحد في المكسيك . يعني هو المصنع الواحد مش بيطلع غير عربيه وحده بس .
وبعدين كمان هل حد سمع إن التصفيح أسفل الكرتيرا ده كماليات. طب ليه في اوكتافيا جاية من الخليج من غير تصفيح وفيه اوكتافيا المصري بتصفيح . لو ده مش عشان المواصفات مختلفة هيكون ليه . ياريت متأليش إن في كرتيره المنيوم وكرتيره حديد . ليه أصلاً الكرتيرة مش وحده .
هل التصفيح فقط لحماية الكرتيره .
أنا ممكن يكون كلامي مش معسول لكن أنا مغلتش في حد وحابب أفيد واستفيد . أرجو إن يكون المجهود بتاعي أضاف معلومه للي يقرا . أنا لو عايز، في أماكن تانية إستعمل فيها ذكائي ومعلوماتي مش هنا ولا في المدرج على الطلبه اللي أهليه شقين عشان ولدهم يتعلموا . عندي الابحاث اللي أرجو منها إن رب العالمين يحوطها في ميزان حسناتي
الراجل ميقصدش أى عدم أحترام ليك هو كل الموضوع أنو فعلا بيحاول يبسط المعلومه للناس ومش شايف داعى للتنشنه كده يابشمهندس ولو أنا أوحد من الأعضاء شافو غلط فيك مش هيدافع عنه دا غير أن أداره المنتدى مابتسبش مشاركه فى أهانات لحد غير لما بتحذفها هو بس سؤ تفاهم انت فهمتو غلط واهلا بيك فى المنتدى معانا وروق كدا يارجل
تمام كده ...........وبدون اى حساسيه......وحكاية يرفعك انت ده مجرد طريقة للتعبير الواحد ممكن بيقصدها لما يكون بيكلم واحد قريب منه او بيحبه........ابدا عمرها ما كانت ضدك وضد شخصك الكريم.............يا سيدى الفاضل سلامة ذكائك وابحاثك واحنا نحب نشوف الذكاء المصرى هنا برضه ، مش فى الابحاث وبس عشان نستفاد من سيادتك يادكتور............وربنا يبارك فيك وفى الجميع ويديم المحبة بين المصريين فى الخارج والداخلاقتباس:
المشاركة الأصلية كتبت بواسطة Anxs111
واضح ان الموضوع خرج برة إطار المناقشة الحيادية ولذلك مش حطول وحرد عليك على طول...
شوف يا دكتورنا أنا لو عايز أغلط فيك حغلط فيك ومحدش حيمسك لساني... بس السؤال هنا بيطرح نفسه أغلط فيك ليه أصلاً؟؟؟ أولاً لا تربيتي ولا ديني ولا أخلاقي تسمحلي إني أعمل كده...
إنت بقى شايف إني بغلط فيك دي حاجة ترجعلك....
الموقف ده بيفكرني بفيلم بخيت وعديلة بتاع أمريكا وفعلا تأثير الثقافة الغربية السلبية على تراثنا وحضارتنا...
طبيعي جداً في وطنا العربي العظيم لما راجل يبوس راجل مفيهاش حاجة ولكن عند الغرب أصبح شاذاً..............
شوف يا دكتورنا:
تدريب 4 شهور في مرسيدس، جاجوار بي إن دبليو ولا ليه أي مدلول بالنسبة لي، أنا راجل شغال من أكتر من 9 سنين بإيدي واعرف كويس إلي أنا بقول إيه وشوفت حالات وحاجات ملهاش حصر....
بالمناسبة مش تنطيط - انت بتكلم مهندس مش بياع فجل!!!
أنا مقلتش إن العربيات على حسب وزنها بتكون أعلى أو أوطى، إرجع للكلام واقراه كويس حتعرف اني بتكلم على المواتير وإن لما الموتور بيكبر لازم المساعد يقوى والسوست كمان وده بيأثر على ارتفاع العربية...
العربيات الأوتوماتيك معروف انها أعلى من العربيات المانيول بسبب المساعدين والسوست لتوفير قد أكبر من الحماية لناقل الحركة...
طلع التوارج برة الموضوع دي عربية بمواصفات مختلفة عن العربيات موضوع المناقشة...وكمان التكنولوجيا بتاعتها مختلفة هي ونظام التعليق... لوعايز بقى تتكلم بالتفاصيل معنديش مانع لأن الحاجات دي كلها أنا أعرفها كويس جداً..
يا دكتورنا لو المصفحة مش كمالية من كماليات العربية وكانت حاجة أساسية كانت اتوجدت في كل العربيات..ولكنها من الكماليات
وعادة بتكون موجودة في العربيات الي الكرتيرة بتاعتها ألومنيوم
ولمعلوماتك برضو في مصفحة حديد وفيه مصفحة فبر....
والمصفحة كمالية من كماليات العربيات ولو مش موجودة في العربيت الي بتنزل مصر ده نتيجة إن المستورد أو الوكيل هنا في مصر بيحاول يشيل حاجات من العربية لخفض قيمتها وتقليل سعرها...أو زي ما بيحصل بيفكوها من العربية ويرجعوا يبعوها للزبون تاني.. وبعدين أنا مش شايف أصلاً نقطة اعتراض على إن المصفحة حماية لكرتيرة الزيت مهي لو مش كده حتكون حماية لمين؟ للسواق مثلاً (ياريت كلامي يتفهم صح، لأن دي مش تريقة ولا لعب بالكلامات)
وبرضو لو أنا كلامي غلط رد انت على السؤال ده:
العربية الجولف 4 والبورا نفس الشاسية
واحدة هاتشباك والتانية سيدان، بس النقطة بقى إن الجولف برغم من إنها هاتشباك أتقل من السيدان...عند تعليق على الموضوع ده؟ تعرف ليه؟ طب يا ترى فرق الوزن ده ليه تأثير على الارتفاع... بالمناسبة فرق الوزن حوالي 120 كيلوغرام
ويا دكتورنا في نهاية الكلام ربنا يديم عليك نعمة العلم ويكتر أبحاثك ويثقل ميزان حساناتك وينفعك بما تطرحه من أفكار على الآخرين...
كلمة أخيرة:
أنا مغلطش فيك، ولا في أي حقد داخلي ناحيتك وربنا يعلم الي في نيتي وأصلاً أنا معرفش حضرتك وحتى لو أعرفك تربيتي وديني وأخلاقي يمنعوني إني أغلط فيك، أتمنى إنك تراجع نفسك شوية....
وبما إني مغلطش فيك...فعديلك ربنا يهديك وتعرف ولاد البلد الي جذورك منها بيتكلموا أزاي ومحدش بيفهمهم غلط لأن نيتهم خالصة لله عز وجل.
معلم كبير يا أسامة و الله. هو كده الرد الصح يكون بالمعلومات و الخبرة مش بالكلام. و حياة والدك يا شيخ ماعندكش حل نزود بيه الخلوص الأرضي للجيتا شوية مش لازم زي التوارج يعني احسن الدكتور بتاعنا يزعل مني و يخبط فيا أنا كمان :I_angr1[1]: هيا فيها مصفحة فيبر.
تحياتي و احترامي الشديد ليك يا أوزأوز و شد حيلك شوية في اللي بالي بالك.
محمد
أيه ياجماعه أنتو كبرتو الموضوع كده ليه صلو بينا على النبى كدا ووحدو الله
لا اله الا الله.............ياواش ياواش يا جماعة
يا جماعة ربنا سبحانه وتعالى يعلم إني لا أقصد أي إهانة أو تقليل من شأن أي حد
كل الموضوع ان كل الأعضاء هنا بيتكلموا والبساط أحمدي لكن لو مفروض أمسك الشوكة والسكينة وألبس الفوطة حوالين رقبتي علشان اتكلم يبقى الله الغني
وبعدين مالو البساط الأحمدي؟ هو لما أقول أرفعك يبقى أنا قصدي كلمة غلط أو مصطلح غلط أو بقلل من شأن الي قدامي أو حتى أقصد توجيه الأهانة أو بلاش كل ده ممكن أكون أقصده هو شخصياً
لما قولت أرفعك مكنتش بوجه كلامي للدكتور في حد ذاته دا كان مجرد توضيح للفكرة
يعني لما أقول لحد متشربش سم علشان حتموت يبقى الكلام موجه ليه هو بس ولا ده كلام عام لأن تأثير السم مميت على الناس كلها
بجد الموضوع خد أكبر من حجمه وبقى دمه تقيل قوي بس برضو أنا عند موقفي ومش حعتذر لأني مغلطش في حد
كل الي أقدر أقوله أني حلتمس ليه الأعذار لأنه ممكن يكون اتصدم من طريقة الكلام (البساط الأحمدي) على أساس انه دكتور وليه بروتوكول معين في الكلام.. بس نصيحة بقى ليك يا دكتورنا من تواضع لله رفعه
ممكن تركب سوست أطول شوية والاستفنس (معامل الصلادة) بتاعها أعلى شوية بس في الحالة دي العربية حتدب جامد في المطبات وخاصة لو بتحط نيتروجين في العجلاقتباس:
المشاركة الأصلية كتبت بواسطة mohamed_hamdi
بص يا هندسة، خد المطب بسرعة منخفض وعمودي مش بزاوية
وخلي بالك علشان الكتاليزر غالي أوي (بتاع 6000 جنيه) وأي خبطة غلط حتزعل منه جداً
ربنا يحميهالك ويكفيك شرها وشر عين الحاسدين وشر الي بيفتوا أمثالي
اقتباس:
المشاركة الأصلية كتبت بواسطة umoussa
هو كل حاجه لزم يكون فيها إثبات إن حضرتك أذكى واحد فالدنيا وأنك فاهم كل الناس وعارف العربيات وفهمت إن أنا عايش بره و طريقة تفكيري ازاي والله شيء عظيم .
خليني أنا أزودلك ، أنا دكتور اتكلمت معاك بأدب ورديت عليك بوجهة نظر مختلفة عن خبرة التسع سنين . فأنت ثبتني مرتين مره عشان أنت إذكى إنسان في الدنيا ومره عشان أنا قلت أني دكتور . وبعد كده إدتني درس في أخلاق ولاد البلد اللي أنت وأنت الوحيد اللي إستنتج أني جلدي أتغير عشان أنا طلعت من جدوري. وكمان هتدعيلي .
ماشي يا سيدي كتر خيرك . وربنا يزيد من معجبيك من أمثال mohamed_hamdi
شكراً جزيلاً وتقديري للأخوة momomero و- معتز . أنا تشرفت فعلاً بمعرفتكم وأرجو نتعرف أكتر على الخاص وأرجو نتقابل لما أنزل مصر . وده هو غرضي من المنتدى استفيد وأفيد طالما أقدر وأتعرف على ناس زيكم. والله سعيد جداً إن طلعت من الموضوع بأشخاص زيكم . مش مشكلة أني مطلعتش بطل ولي مشجعين .
اقتباس:
المشاركة الأصلية كتبت بواسطة umoussa
دي شهادة اعتز بيها
ونصيحة برضو ليك بلاش تدخل أطراف تانية في الموضوع لأن كل الي انت ذكرت أسمأهم مش مشجعيين ليا ولا حاجة وبالمناسبة أعرف منهم 2
والناس اتكلمت بحيادية
شوف يا عزيزي، حتجيب معلومة فنية سليمة تفيد بيها نفسك قبل متفيد غيرك تبقى فعلاً عملت خير وساعدت نفسك وغيرك
لكن حنطرح خواطر ملهاش علاقة بالجانب الفني يبقى ممكن نتكلم للصبح
بص يافندم، أنا مبتكلمش من فراغ ومبحبش أفتي إطلاقاً
أنا تحت إيدي كل البرامج الخاصة بكل عربيات فولكس والبرامج دي هي البرامج الصادرة عن فولكس (الشركة الأم) وبتديها للوكلاء المعتمدين ومراكز الصيانة الكبيرة والمعتمدة... والمعلومة دي هدفها إني أقولك أني مفتيش ولو أي حد سألني في أي حاجة معنديش خلفية أو خبرة سابقة فيها بروح زي الشاطر أفتح البرامج واشوف تصميم الجزء بتاع الموضوع متصمم أزاي وطريقة صيانته وارجع أرد.. بمعنى أصح بتكلم من مخ فولكس مش من مخي ولا من بقي
يعني لو كلامي غلط يبقى أنت تروح تكلم فولكس، لأني مجرد رسول ناقل للمعلومات
وصلت الفكرة
وترجع بلدك بالسلامة
حضرتك كسبت والله كسبت . كل اللي شاف عرف أنك معلوماتك لا أخر لها . تمام هي الدنيا كده لزم تمسح اللي أدامك عشان أنت أكتر واحد فاهمها . اسمحلي أكون أول المهنئين .اقتباس:
المشاركة الأصلية كتبت بواسطة umoussa
بص أنا بصراحة وقتي مش كبير قوي علشان اضيعه في مهاترات
راجع الموضوع من الأول كده واحدة واحدة وشوف مين الي مش قابل الرأي الآخر ولما اتناقش انسحب وبيقول كلام ملوش وصف بصراحة
موضوع كسبت وخسرت ده مش في دماغي أصلاً لأني مش في حرب
بس عايز برضو أقولك إني لو حطيته في دماغي فعلاً حكسب وأنا واثق من كده
موضوع بقى مسح الي قدامك....ملوش تعليق عندي لأن دي حاجة مرتبطة بثقافة معينة - لا أملك القدرة على تغييرها
وربنا يهدينا جميعاً
اقتباس:
المشاركة الأصلية كتبت بواسطة umoussa
اقتباس:
المشاركة الأصلية كتبت بواسطة umoussa
أدي اللي لقيته في أول الموضوع .اقتباس:
المشاركة الأصلية كتبت بواسطة umoussa
ممكن توضح الثقافة المعينه لو سمحت
ياريت أسامة موسى يتوقف فورا عن الاستمرار في المهاترات مع الدكتور ابو ثقافة بتاع كندا اللي كل شوية ماعندوش غير كلمة أنا دكتور أنا دكتور. طيب ما أنا مهندس و أسامة مهندس و غيرنا كتير من الأعضاء مؤهلات عليا و محدش بيدعي الثقافة عمال على بطال كده. للعلم أسامة أكتر عضو في منتدى فولكس بيساعد الأعضاء و فاهم فولكس كويس جدا و مشترك في المنتدى بنية افادة الناس و عن علم و دراية بالسوق المصري و ده غير الاشتراك في المنتدى بنية المنظرة ولا مؤاخذة. :I_angr1[1]:
يا جماعة أنا بضم صوتي لصوت محمد حمدي، أنا بجد ندمت اني سألت و فتحت الموضوع من أساسه بسبب إلي بيقال ده ، أنا مش عارف ليه في ناس عندها حساسية و بتاخد الكلام على صدرها ،رغم إن الأمور أبسط من كدة بكتير، شكراً لكل إلي ساهم في إضافة معلومة ،لإني فعلاً استفدت و عرفت حاجة مكنتش أعرفها . شكراًاقتباس:
المشاركة الأصلية كتبت بواسطة mohamed_hamdi
يا عزيزي أحمد صادق
أنا مجتهد وبحاول عمل إلي أقدر عليه علشان أوصل معلومة أنا عرفها ومتأكد منها وكمان علشان أنبه إخواني لجشع التجار وقطع الغيار المضروبة والصنايعية الكويسيين
ومعتقدش إن في حد جوة المنتدى ده بيبخل على حد بأي معلومة صحيحة
المنتدى دا كله إيد واحدة لصالح الجميع
وأعتقد إن التعاون المثمر بين الأعضاء سيء جميع وخاصة إني كل يوم بتعلم حاجة جديدة من الأعضاء
ربنا يديمها نعمة علينا كلنا إن إحنا نتعلم من بعضنا
اقتباس:
المشاركة الأصلية كتبت بواسطة umoussa
شكراً يا باشا و ياريت تكون دي الروح إلي بنا علطول
------------------------------------------------
تم غلق الموضوع لمخالفة القاعدة رقم (13) و خروجه عن هدفه الأساسى
يرجى من الأعضاء الكرام ضبط النفس و مراجعة قواعد و قوانين المنتدى
مشرف القسم
-------------------------------------------------