ما هو رأيك فى ذكر اماكن الرادار و دفع رشاوى ؟

تقريبا معظم المواضيع هنا المكتوبة بتحذر الناس من رادار ولا كمين ولا غلطات معينة


وكل واحد بيذكر بسهولة جدا انه دفع رشوة كذا علشان يمشي حاله ولا عشان رخصته متتسحبش

للدرجة دي بقينا نستهون بالرشوة..دا الراشي والمرتشي ملعون ياجماعة

ملعون مبيدخلش في رحمه ربنا..اللي متساويهاش الف رخصه ولا الف عربيه

تفتكروا دا مبرر اننا نقع في اثم كبير زي دا وكل يوم؟

هنقول لربنا إيه؟

معلش كانت رخصتنا هتتسحب؟


في ناس بتموت مالجوع ومبتلجأش لرشوة...

يعني سوري يعني حجة مش مقبولة


هتقولوا خلاص الناس خدت علي كدا؟


عمر مكانت المعصية هي الوضع الطبيعي

هتقوولوا اكمناء الشرطة والظباط والعساكر هماللي بيطلبوا؟


طب مهم دول كمان مننا

ابوك واخوك وخالك وعمك

دا غير كمان ان احنا اللي بندفع

مفكرتش لو كل حد مننا خد موقف محترم وامتنع عن دفع رشوة ممكن يغير إيه؟

اللي بيرمي ميه ومتين جنيه لواحد مفكرش ان اللي جي وراه موظف غلبان

مش هيقدر يدفع زي مهو دفع وبالتالي بقي مغضوب عليه

ياريت ياجماعة بجد نراجع نفسنا في الموضوع دا ومنمرش عليه مرور الكرام


اللي اشد من المعصية هي الاستهوان بيها...وتكررارها

وخصوصا ان ملهاش حل غير اننا نيجي علي نفسنا شوية


ايه يعني هيحصل لما نلتزم بالسرعة المحددة ولا بالحزام ولا بشوية قوانين بيخة


بس اكيد المشقة اللي هنعيشها متجيش نقطة في بحر المعصية اللي كل يوم بنتمادي فيها


وربنا يستر علينا جميعا

طيب الكلام حلو و جميل
لكن ارض الواقع حاجه تانيه
لازم الدوله تتدخل
الدوله مش احنا
مش هما دايما بيقولو اننا مندخلش في السياسه
يحلوها هما بقي بقوانينهم

والدولة دي اللي هيا مين يفندم

حكومة وافراد


واذا اتكلمنا بالمنطق


الحكومة جزء من الافراد وليس العكس


لو الدولة جت في يوم وقالتلك ان حلال مراتك تتزوج مرة اخري

هتسمح بدا وتقول اصل الدولة والحكومة؟؟؟

reality check
الدوله هي الحكومه و الحكومه هي الدوله
الافراد دول لدفع الضرائب و السخره
اما بالنسبه لباقي كلامك فواضح انك محتاجه تحتكي بالواقع
و دي مش اهانه او تقليل من شأنك بس فعلا الاوضاع في مصر غير اي مكان تاني في الدنيا
تقدري تقولي رواسب خنوع و جهل من ايام الفراعنه
و حتي الفراعنه زمان كان في لغه ليهم و لغه اخري لعامه الشعب!!
و ارتبطت طاعه الحكام بطاعه الالهه
ده غير حاجات تانيه كتير

انا معاكي طبعا في جزئيه ان الرشوه حرام
لكن تغيير المجتمع محتاج تدخل الدوله
عن طريق التعليم و التلفزيون و الافلام و البرامج الحواريه الجاده
عن طريق القوانين و تطبيقها علي الجميع

تفتكري مثلا انا مش نفسي افتخر اني مصري في يوم من الايام؟
افتخر ازاي بكده و كلمه مصري تعتبر اهانه
غش و نصب و جهل و بلطجه تدين شكلي و انحدار رهيب في الاخلاق حتي الدنيويه منها
و كفايه كده

اقتباس:

---

المشاركة الأصلية كتبت بواسطة iceheartedgirl

والدولة دي اللي هيا مين يفندم

حكومة وافراد


واذا اتكلمنا بالمنطق


الحكومة جزء من الافراد وليس العكس


لو الدولة جت في يوم وقالتلك ان حلال مراتك تتزوج مرة اخري

هتسمح بدا وتقول اصل الدولة والحكومة؟؟؟

---

فكرتيني بالمسرحية .. مرسي تعرف ايه عن المنطق ؟ هههه
مع احترامي لوجهه نظرك بس كدة في حاجة مش فهمها ايه جزئية لو الدولة جت في يوم وقالتلك ان حلال مراتك تتزوج مرة اخري !! عشان انا لو مطلقها وانتهت عدتها شرعا حقها تتزوج مرة اخرى، ولو تقصدي انها تتزوج أكثر من واحد في نفس الوقت دى قصة ثانية خالص، عشان القوانين دى قوانين وضعية من تشريع البشر ودى شريعة سماوية من الله سبحانة وتعالي.

اقتباس:

---

المشاركة الأصلية كتبت بواسطة M_Nabil

مع احترامي لوجهه نظرك بس كدة في حاجة مش فهمها ايه جزئية لو الدولة جت في يوم وقالتلك ان حلال مراتك تتزوج مرة اخري !! عشان انا لو مطلقها وانتهت عدتها شرعا حقها تتزوج مرة اخرى، ولو تقصدي انها تتزوج أكثر من واحد في نفس الوقت دى قصة ثانية خالص، عشان القوانين دى قوانين وضعية من تشريع البشر ودى شريعة سماوية من الله سبحانة وتعالي.

---

انا مرضتش اعلق لها علي النقطه دي لأنها واضح انها بتخلط الاوراق لاستثاره النخوه فينا
و الموضوع ده منتهي قبل ان يفتح
في خطوط حمراء بالنسبه لأي بني ادم

يا جماعة ثنية واحدة .. انا كاتب موضوع اللينك بتاعوا في التوقيع بتاعي .. ياريت تتفضلوا وتشفوه وتقولوا رأيكم ..
بس انا هعلق علي حاجة واحدة هنا .. بس بأمانة بأمانة .. انتوا حسين ان اللي بتعملوه دا صح ؟
يعني شايفين ان الرشوة دي هي الصح؟ متوافقة مع الاخلاق؟
مش معني ان الرشوة بقيت السمة الاساسية في العصر ان معني كدا انها الصح..
وحكومة ايه اللي بنكلم عليها ..
هو العسكري والامين والضابط والوكيل والوزير والرئيس .. هما مين مش من الشعب .. حد منينا.. ..
لما احنا نكون متربين علي الرشوة .. حكومتنا هتطلع ايه .. شيوخ في جوامع .. والا قساوسة في كنائس...رمزهم الاخلاق والفضيلة ...
للأسف ... وصلنا لدرجة عدم الاحساس بالخطأ والمعصية ..
انا مش عايز حد يرد .. عايز كل واحد يحاسب نفسه بين وبين نفسه..
تخيل ربنا شيفك بتعصيه ..
هل وصلت الدرجة لأن احنا بقينا بنفضل ود وحب العباد علي حب الله -سبحانه وتعالى-
لا حول ولا قوة الا بالله .. ربنا يهدينا ويهدي المؤمنين جميعا


اسف علي الاطالة .. ولو ان حد يشوف اني بتفلسف..

بصراحة الموضوع معقد ويتعدى مجرد الرشوة

في تسلسل منطقي اعتقد ان الرشوه دي احدى بنات الفساد زي المحسوبية والواسطة وعدم مراعاة الضمير، والفساد ده له عدة مصادر منها الجهل والتجاهل وعدم وجود قانون ملزم لكافه الاطراف بأداء الواجبات للحصول على الحقوق وان كل شيء له تقدير مادي وان الفكر والمعنويات ليس لهم قيمة.

يعني ممكن ادفع رشوة وانا عارف انها حرام بس اعتقادي ده ليس له قيمة عند الطرف الاخر لانه بيحسبها بالجنيه وليس بالحلال والحرام وبالتالي عشان احصل على حقي اللي هو حقي لازم امشي اموري مع الطرف الآخر وأظبطه عشان يظبطني. اي يجب ان يكون هناك لغة حوار مشتركة وهي الجنيه في هذه الحالة.

ومن غير كده سيجد الانسان نفسه مهمل غير قادر على الحصول على ابسط حقوقه والأدهى انه يكون الشخص دفع القيمة المطلوبة لاداء خدمة ما ولازم يدفع رشوه كمان عشان اموره تمشي.

وعلى فكره الموضوع مالهوش دعوه بضعف الدخل المادي ويمكن يكون المرتشي ده ذات دخل عالي بالفعل بس ماشي بمبدأ ليه اكسب اقل لما ممكن اكسب اكتر.

وعلى هذا المنوال ستجد كل شيء في بلدنا إلا من رحم ربي قله مش عارفه تسايس امورها.

والرشوة ليست ظاهرة مصرية بل موجودة في كل الدنيا ولكن عندنا متفاقمة بسبب ضياع الحقوق والواجبات في غوغاء من الفوضى والتسيب والابتعاد عن الدين والبحث عن الامور الدنيوية.

لو عايزين نعالج الموضوع ده لازم نغير ثقافتنا وثقافتنا مش هتتغير ابدا الا اذا بدأنا ببيوتنا وأولادنا وده موضوع قدامه مئة سنة مع الرأفة ويجب ان يكون له جوانب مساعده مثل تثقيف الانسان المصري بواجباته وحقوقه وما هو الطريق السليم للحصول على هذه الحقوق دون اللجوء للرشوة وعدم إهمال الشكاوى ووجود قانون رادع لكل من تسول نفسه الرشوة او التراشي، والتعليم اللي بجد مش حشو المخ اللي يعلم ويعلي شأن الانسان مش يفضل عشرين سنة يموت في نفوخة بعلم لا ينفع ولا يسمن من جوع.

وربنا يستر علينا في الايام اللي جاية.

اقتباس:

---

المشاركة الأصلية كتبت بواسطة samoevil911

بس انا هعلق علي حاجة واحدة هنا .. بس بأمانة بأمانة .. انتوا حسين ان اللي بتعملوه دا صح ؟
يعني شايفين ان الرشوة دي هي الصح؟ متوافقة مع الاخلاق؟

---

الرشوه الحرام معروفه للجميع
لكن انك تدفع فلوس علشان امر من امورك الحلال يمشي متبقاش رشوه
و بعدين يا اخي كلامنا واضح جدا و الله
احنا مش مع الرشاوي ابدا
لكنك بتعيش في مجتمع متفسخ
و لو عايز تجرب و تنزل الشارع و تحتك بالناس و السلطه و المصالح الحكوميه هتعرف كويس قوي ان التغيير ليس بيد فرد
التغيير بيد الحكومه و من قبلها الله سبحانه و تعالي
و ربنا يرحمنا بقي من اللي احنا فيه
فهمتني؟

أكيد كلنا ضد الرشوة بس الموضوع كدة هيخش فيه الدين والسياسة لارتبطهم بالموضوع ودة هيخالف القواعد الخاصة بالمنتدي بس نكمل ونشوف وجهات النظر ايه

اول حاجة .. انا والا اتكلمت عن الدين ولا قلت الدين دا افضل والا بكلم اصلا عن العقائد..
ثاني حاجة ولا الحكومة والسياسة..

ثالثا يا استاذ امير..
الرشوة بجتماع جميع الفقهاء حرام مهما كانت مبرراتها .. وغلط .. بدليل انك لو اتظبط بعد الشر بدتفع رشوة .. هتبقي قضية ..

وموضوع انزل الشارع واشوف الناس مشيه ازاي .. مانا بنزل زشايف الناس .. بس حضرتك ليه مردتش علي سؤالي ..
1- العساكر والضباط دول مين ؟؟ مش احنا من الشعب؟ واحنا اللي مربينهم مفروض؟
2- انت من جزاك في قرارت نفسك حاسس ان دا صح؟ حكم ضميرك كدا..

اقتباس:

---

المشاركة الأصلية كتبت بواسطة samoevil911

بس حضرتك ليه مردتش علي سؤالي ..
1- العساكر والضباط دول مين ؟؟ مش احنا من الشعب؟ واحنا اللي مربينهم مفروض؟
2- انت من جزاك في قرارت نفسك حاسس ان دا صح؟ حكم ضميرك كدا..

---

1- الظباط دول اسياد البلد و ربنا يرحم محمد نجيب لو كان قدر يعمل اللي كان عايز يعمله مكنش ده بقي حالنا
2- انا مش بحاول ابرر الرشاوي
بس انك تدفع فلوس علشان تمشي امر من امورك الحلال اللي من غير دفعك للفلوس دي يتعطل ده مش رشوه و حلال و اسئل فيها اي شيخ من الشيوخ

و بعدين يا اخي الفاضل انت شايف ان كلامي و كلامك هيغيرو حاجه؟
بلاش الموضوع يتاخد بالحساسيه دي خصوصا ان الوضع لن يتغير

د.امير المثال اللي ذكرته مكنش يفندم لاستثارة النخوة ولا شئ من هذا القبيل


دا كان مثال لا جدال فيه لانه بتشريع سماوي

زيه زي الرشوة

انا لما بقول الرشوة غلط مبقلش عشان عيب ولا ميصحش ولا ضد القانون

لا

انا بقول انها حرام

وبتشريع سماوي بردوا


وبعدين الحكومة اللي هتبدأ بالتغيير دي

ممكن يكون ابنك فرد فيها...ابنك اللي بيشوفك بتدفع رشوة للظابط في العربية


واللي ممكن يشوفك بردوا بتجفعله رشوة عشان يدخل الشرطة

مش بعيد يستسهل انه الرشوة دي بعد كدا هواللي يخدها من اصحاب العربيات

ويبقي كدا باستهتارنا خلقنا دايرة مغلقة مش هتنتهي ابدا


وكلام حضرتك بخصوص اني محتكتش مالواقع كتير غير صحيح

يعلم ربنا اد اي المشكلة دي بتوقعني في ازمات

بس الله المستعان


فقط اصبر واحتسب

انا مش بقول الكلام دا ومستنية رد

بس فعلا كل واحد مننا محتاج يواجه نفسه بالمسأله دي بينه وبين نفسه

لا تنظر لصغر المعصيه,,,ولكن انظر لعظمة من عصيت

اولا مافيش جدال على ان الرشوه حرام
بس احنا مش عاوزين نجادل فى معتقدات دينيه
بس بمنتهى الصراحه كل واحد بيتعرض للموقف ده هو مش بيدفعيعنى وهو مبسوط بالعكس بيكون مضطر طبعا ومجبر
واحيانا اللى بياخد الرشوه نفسه هو اللى بيخلق اى مشكله او اى سبب علشان ياخد

طب مثلا اللي عايز يدخل ابنه شرطه وابنه كويس ويصلح وكله تمام بس لازم يدفع فلوس(رشوه) عشان يتقبل ده يعمل ايه ؟؟
واللي بيشتغل محامي وانتو عارفين انهم مينفعش يعمل اي اجراء بيتطلبه مهنته غير لما يدفع (اكراميه) تخيلو دول عشان يصور ورقه ولا يكتب كام محضر لازم يدفع طب دول يعملو ايه
والامثله كتير اوي في البلد لا حصر لها
انا بستحرم الرشوه طبعا وبحاول اني مديش لحد حاجه غير لما يخلص لي الخدمه كمكافأه او اكراميه وبحاول اتجنب انها تبقى رشوه على قد مقدر (بس طبعا لازم اقول ملناش بركه الا انت والكلمتين دول ) اعمل ايه طيب

يا جماعة .. هقولها من الاخر...
انا بكلم علي الصح والغلط .. مش بكلم علي اللي بنعملوا ومبنعملهوش..


الرشوة حراااااام شرعا بأجماع جميع الائمة ... سواء لأمور حلال ولأ.. ولو حضرتك بتدفع رشوة عشان تخلي عبد من عباد ربنا يمشيلك حاجة .. وبتعصي اللي خلق العبد دا .. واللي يقدر يمشيلك حالك غصب عن اي حد.. (هو احنا في الطبيعي .. بنطيع الاقوي والا الأضعف) .. نسينا ان في رب في السماء قادر يمشيلنا كل شيئ..
غير انها بجميع المقايس عمل غير متماشي مع الاخلاق..
ومحمد نجيب ايه اللي جابوا في الموضوع .. دا راجل كان ظابط جيش.. وكان فيه مخطط للجيش من الول رسمين خريطة لكيفية الوصول للحكم .. (ملحوظة: الجيش دا مصري .. مننينا .. مربينوا احنا )

احنا اللي بنصنع مستقيلنا ..
كان في عضو هنا في موضوع كان بيحكي .. ان هو رفض يدفع رشوة لللأمين علي مخالفة انوا ماشي عكسي.. 1400 جنية يعني.. والامين قالوا هات 100 جنية واعديك.. رفض .. ولما راح للواء .. اللواء بحترام عتبوا وقالوا ياريت متكررهاش تاني عشان المرة الجاية هدفعك ومشاه .. بكل احترام وكان بيهزر معاه كمان... انا اقصد ان الراجل زي معمل شيئ كويس ومرضاش يعمل حاجة غلط .. ربنا سهله اموره..

الحكومة دي احنا .. لو حضريتك ربيت ابنك ان الرشوة دي غلط.. لو في يوم منالايام بقي ليه منصب مهم.. عمره مهيقبل الرشوة .. وهكذا .. لو كل اب و ام ربوا عيالهم علي الاخلاق و الفضيلة .. عمر مكان بلدنا بقي حالها كدا (بؤس والناس مبقتش بتحب بعض.. همجية.. شوارع بيظا.. غش في التعامل.. الاخوات بيسرقوا بعض.. بقي في غلظة في التعامل .. دا نادر تلاقي حد مبتسم فس وشك.. الاخلاق ربنا يرحمنا بقيت في الاض.. المخدرات في السوبر ماركت.. عقوق والدين...الخ)

بأمانة كدا ... عايز بلدنا يبقي شكلها ازاي.. عايز الحكومة شكلها ازاي.. مهم ابنائنا ... الابن اللي مترباش علي الفضيلة .. لما يمسك منصب مهم .. هيجيب الفضيلة منين وهو اصلا مسمعش ان في فضيلة...

لو ربنا اطلع علي نفوسنا . ووجد انها كويسة .. هيغير حياتنا كلها .. بس احنا وبكل امانة منستهلش... وحلال فينا اللي بيحصل ..
عايزين نكون بعاد عن الاخلاق والقيم ودينا والله سبحان وتعالي.. وفي نفس الوقت ربنا معانا وبينصرنا وحالنا كويس...

اسف علي الاطالة ... لعلم حضرتك انا ولا داعية ولا رجل سياسة .. انا شب عندي 18 ولا ملتحس ولا متشدد .. وعايش حياتي عادي زي الناس .. عشان محدش يقول بيكلم في السياسة والدين .. دي وجهة نظر ... قابلة تكون صح او غلط..
وشكرا

يا جماعة اولا مع احترامي لكل الاراء الي موجودة هنا

ثانيا بقي الكلام عن الرشوة
طبعا مافيش اتنين يختلفو علي انها حرام
وهي حرام حتي لو انت بتدفع علشان تاخد حقك
يعني ناس كانت فاكرة ان تعريف الرشوة
هي دفع مبلغ مقابل حق غير مكتسب بس هي سواء مكتسب او غير مكتسب

طالما ان المبلغ دا مش من حق المرتشي
تمام

ثالثا بقي انا رايء مختلف مع ناس كتير بس انا مع قانون المرور الجديد بكل غباءه
:)
ومع ان السجن يوصل لشهور لمجرد مخالفة بسيطة

معلش يعني ان شاء الله قالك انا ظالم ومفتري والي هيمشي مخالف متر واحد هيقتل رميا بالرصاص في ميدان عام

وانت جاي تمشي مخالف

مانت عارف
خلاص ماحدش ليه حجه طالما هو عارف ان القانون بينص علي كده
عاوز تغامروتعمل مخالفة
بس تشيلها انت

بجد انا مع القوانين الصارمة اوي في البلد دي
لانها مش هتتعدل الا بكده

و سوري لو رائي هيزعل حد
بس دا رائي الي شايفه من وجهة نظري صح

أنا ليا تعليق على مفهوم الرشوة من واقع كلام سمعته لأحد الشيوخ الكبار وأعتقد سمعته كمان فى حديث للشيخ الشعرواى ، قال إن الرشوة طبعاً حرام طالما بتاخد بيها حق مش حقك وبتحرم شخص تانى من الحق ده ، زى إن فى طابور طويل وإنت تدفع للراجل وتخلص مصلحتك قبل اللى واقف قبلك ، إنت كدة أخدت حقه ، وزى إنك تدخل حد كلية معينة مثلاً برشوة يبقا إنت كدة أخدت حق حد غيرك كان ممكن هو يكون أولى بالحاجة دى لولا فلوسك حسمت الموقف والأمثلة على كدة كتير ، فيه حجز مثلاً لدفعة عربيات والناس مقدمة طلبات تقوم إنت بفلوسك تستلم بدرى وده طبعاً على حساب واحد كان مقدم قبلك . كل اللى فات ده حرام على الراشى والمرتشى والواسطة اللى بينهم لو فيه

قال لو موظف بقا فى مصلحة بيعطلك مصالحك اللى هى حقوقك مش حقوق حد تانى ، عشان ياخد منك فلوس ، يبقا يجوزلك إنك تديله والإثم عليه هو ومش عليك إنت ، بس بشرط إن ده يبقا حقك وإنك مش بتنتزع حد حق ولا بتعطل مصالحه

أنا عايز أوضح بس تعريف الرشوة لأن فى أعضاء قالوا إن الرشوة هى الفلوس اللى بتدفعها عشان تاخد حتى حقك ، يعنى لو المثال السابق بتاع الموظف اللى معطلك وبياخد منك الفلوس دى عشان هو فى موقع قوة ومصلحتك فى إيده يبقا هنا الفلوس دى مش رشوة أصلاً بس بشرط تانى مرة إنك مش بتاخد حق حد ولا دوره ولا وقته

بالنسبة لمخالفة المرور والفلوس اللى بتتدفع عشان تتجنب المخالفات أنا محتار فيها جداً ومش قادر أوصل فيها لحاجة ومش قصد كلامى إنى أقول حرام وحلال ، بس بنقلكم اللى أعرفه عن معنى الرشوة

اقتباس:

---

المشاركة الأصلية كتبت بواسطة abdo_general

بجد انا مع القوانين الصارمة اوي في البلد دي
لانها مش هتتعدل الا بكده

---

هيه مش القوانين الصارمة اللى بتصلح حال الامم انما بيتصلح حالها بشعبها واكيد لو كانت زى بلدنا العزيزة اللى بتستثنى تطبيقها على بعض الفئات، واكيد انت مش مع القوانين دى ولا انت رأيك ايه ؟

وفي ظل مرتبات الحكومة الزهيدة ماذا تتوقع ان يكون حال الموظفين العمومين فيها ؟ يعنى لو سئلت موظف انت بتاخد رشوة ليه هيقولك عشان اعرف اعيش ان وعيالى في الزمن ده، عشان المرتب اللى باخده يدوب بيكفينى 5 ايام في الشهر يعنى لو الحكومة موافره للموظفين مرتبات تكفيهم سعتها اكيد هتلقى نسبة بسيطة اللى بتاخد رشوة ودول هيكون عندهم فساد اخلاقي و جشع وطمع.

لاء اسمحلي يا استاذ نبيل
القوانين الصارمة هي الي تصلح بلد زي بتاعتنا دي
وخصوصا لو عاوز تشوف منظر حضاري في الشارع والعربيات ماشية

هو انا كان قصدي علي قانين المرور

صدقني احنا شعب صعب يمشي علي الصح لوحده لازم يكون غصب عنه

اما بالنسبة للموظفين بص هي عبارة عن دايرة من الحكومة والموظفين والاتنين عليهم نفس المسؤلية
الموظف عارف انه كده كده لو اشتغل او ما اشتغلش هياخد مرتب ثابت فا مش يشتغل لبضمير وبالتالي الانتاج صفر وخسارة فا اكيد مش هتلاقي تديله
وفي نفس الوقت هي مش بتدي فا هو مش عنده حافز يشغله
بس لو نص الدايرة اشتغل صح احتمال الديرة كلها تدور صح

اما بالنسبة للرشوة في المخالفات
اعتقد في قانون صريح بالمخالفات
فكون اي شخص يرتكب مخالفة فا المفروض يدفع قيمتها سواء ماليا او حبس

اما كونه يدفع رشوة كده بياخد حق غير حقه وطبعا دي حرام
من غير كلام

وعلي فكرة انا رائي العقلي مع الناس الي بتقول ان انا ادفع مقابل حق ليا اصلا دي مش مندرج تحت اطار الرشوة

والحالة دي مش مندرجة تحت قانون المرور
او اي قانون

اعتقد ان الشوة مش فى الرادار بس فى كل مصلحة حكومية ولو امتنعنا كلنا عنها مش هيبقالها وجود

اقتباس:

---

المشاركة الأصلية كتبت بواسطة amir

1 ربنا يرحم محمد نجيب لو كان قدر يعمل اللي كان عايز يعمله مكنش ده بقي حالنا
2- انا مش بحاول ابرر الرشاوي
بس انك تدفع فلوس علشان تمشي امر من امورك الحلال اللي من غير دفعك للفلوس دي يتعطل ده مش رشوه و حلال و اسئل فيها اي شيخ من الشيوخ

---

اقتباس:

---

المشاركة الأصلية كتبت بواسطة samoevil911

ومحمد نجيب ايه اللي جابوا في الموضوع .. دا راجل كان ظابط جيش.. وكان فيه مخطط للجيش من الول رسمين خريطة لكيفية الوصول للحكم .. (ملحوظة: الجيش دا مصري .. مننينا .. مربينوا احنا )

احنا اللي بنصنع مستقيلنا ..
ا

---

محمد نجيب كان ناوي انه بمجرد تمكن الجيش من البلد كان ناوي يسلم السلطه للمؤسسات الدستوريه لغايه ما الشعب ينتخب رئيس
بمعني كنا هنبقي دوله مؤسسات بجد
طبعا البكباشي جمال عبد الناصر مسمحش بكده و اخضع محمد نجيب للاقامه الجبريه في منزله الي ان توفاه الله وحيدا
الفاتحه علي روحه و روح كل مصري قلبه علي البلد دي بجد
و سبب ذكري لمحمد نجيب انه لو كان عمل ده كان زماننا في بلد مؤسسات و دستور و قانون
و بالنسبه لكون الجيش المصري مننا و مربينو احنا فبكره تدخل الجيش (لا قدر الله) و هتعرف كويس الجيش ده مين اللي مربيه!!

اقتباس:

---

المشاركة الأصلية كتبت بواسطة Sameh

قال لو موظف بقا فى مصلحة بيعطلك مصالحك اللى هى حقوقك مش حقوق حد تانى ، عشان ياخد منك فلوس ، يبقا يجوزلك إنك تديله والإثم عليه هو ومش عليك إنت ، بس بشرط إن ده يبقا حقك وإنك مش بتنتزع حد حق ولا بتعطل مصالحه

أنا عايز أوضح بس تعريف الرشوة لأن فى أعضاء قالوا إن الرشوة هى الفلوس اللى بتدفعها عشان تاخد حتى حقك ، يعنى لو المثال السابق بتاع الموظف اللى معطلك وبياخد منك الفلوس دى عشان هو فى موقع قوة ومصلحتك فى إيده يبقا هنا الفلوس دى مش رشوة أصلاً بس بشرط تانى مرة إنك مش بتاخد حق حد ولا دوره ولا وقته

---

و ادي عضو بيأكد نفس كلامي
و بالنسبه للقوانين الصارمه هي اللي هتصلح حال البلد
فأمحولي اعلق تعليق بسيط
ليه دايما بنربط القانون الواجب احترامه بمدي صرامته؟!!
الهدف اساسا من اي قانون تنظيم امور الناس بما يحفظ الحقوق
ليه منتكلمش عن قانون عادل
قانون يتحط لاحقاق الحق
قانون يطبق علي الجميع
مثال بسيط
الفيميه ممنوع ليه يا عمي قالك بيحجب الرؤيه
طيب و العربيات اللي بتنزل بيه قالك لأمسموح طيب نركب فيميه قالك لأ قلنا الشمس و السرطانات و الحروق و بلدنا بقت لا تطاق في الصيف قالك برضو لأ
مع ان اغمق درجات الفيميه بتسمح بالرؤيه برضو و ممكن ببساطه يسمح للدرجات المتوسطه انها تتركب لكن ازاي و هو بقانون زي ده بيلم مخالفات زي الفل
طيب هل ده بيطبق علي عربيات وكلاء النيابه و ظباط الجيش و الشرطه؟!!
هيهات
طب ليه مش ده برضو فيميه من اللي ممنوع لينا بحجه اعاقه الرؤيه؟!!
ولا هما نظرهم زرقاء اليمامه

معلش يا دكتور امير اسمحلي

احنا شعب مش بيمشي الا بناظام سياسة " الحديد والنار "

يعني عمر ما هنعمل حاجة الا لو جاية غصب عنك وفي قرشك

انا مش عاوز حد يفهمني غلط انا مش بوجه طبعا كلامي لحد
طبعا مع احترامي للجميع

انا بتكلم بصفة عامة

اي قانون اتحط وقالك عقوبته وانت عارفها
وجيت تخالف القانون
ماتجيش تزعل لما تدفع العقوبة باي طرق الدفع سواء مادية معنوية

اما بالنسبة للتفيم
ملحوظة بس علشان برضه ماحدش يفهمني غلط
انا ولا مع الحكومة بتعتنا طبعا
دا لو بايدي ....
بغض النظر
ولا ضد التفييم للزجاج

هما منعو فاميه الزجاج لانه بيسهل ممارسة الاعمال المخلة للاداب

ومايقدروش يمنعو العربيات الي نازلة بيه
لان كده هيسببو لنفسهم مشاكل كتير

انا نفسي نفسي افيم العربية والله
بس اعمل ايه بقي
:(

هي حجج منهم
ومش مقنعة
لان حتي مش سمحو بالدرجات الفاتحة

بس الفكرة الي انا بقولها

علي مخالفات السير العكسي
وتجاوز السرعة
والخ

دي اتحددت عقوبتها حتي لو بالسجن مدي الحياة

يعني اثناء ارتكابها
انا عارف العقوبة

ما اجيش ازعل بقي

ومعلش دا الفرق بينا وبين الي بره

وعلشان كده المصري لما بيطلع بره بيمشي زي الالف

علشان خايف من القانون

ايطاليا
ليك في رخصتك سبع مخالفات
لو اتعملو تتمنع من القيادة فترة توصل لثلاث سنين

دا غير عقوبات المخالفات دي

علشان كده مافيش اي وجه مقارنة بينا وبينهم
:(

يا استانا الفاضل .. انا عارف موضوع محمد نجيب.. بس انا مش عايز اكلم في السياسة .. فقلت مالوا في موضوعنا . وان دي خطة كانت معمولة .. ومش هنكلم في الياسة ..
الحاجة التانية العضو الفاضل اللي بيكلم عن ان الرشوة تبقي حلال لما يكون حد بيعطل مصالحك بدون سبب ومفيش حل غير الرشوة .. (احنا مش بنكلم هنا علي الموضوع دا .. احنا بنكلم علي الرشوة اللي ملهاش مبرر)
هو اللي بيعدي السرعة المقررة ويدفع رشوة عشان يعدي .. والا اللي بيفيم عربيتوا . هو دا حقه..(ملناش دعوة القانون صح او غلط في الموضوع دا ... كل اللي لينا ان القانون اتحط ولازم نمشي عليه .. طاعة والي الامر واجبة) ..


وعموما .. كل اللي عايز اقوله ان الرشوة شيئ يتنافي مع الاخلاق والدين.. كون بنعملها ومطرين ليها او لأ .. في دي حاجة ترجع لكل شخص فينا..
لو كلنا اتعلمنا نكون كويسين مع بعض.. اعتقد كل المشاكل دي هتنتهي..

اقتباس:

---

المشاركة الأصلية كتبت بواسطة abdo_general

هما منعو فاميه الزجاج لانه بيسهل ممارسة الاعمال المخلة للاداب

---

اكيد طبعا اسمحلك و غصب عني كمان مادام الاسلوب راقي في النقاش و ادينا بنستفيد بالاراء
بس موضوع ان الدوله تمنع الفيميه علشان الاعمال المخله بالاداب فمن باب اولي يصدر قانون بمنع بناء او سكن الشقق و الفنادق و ما ادراك ما الفنادق في المحروسه!!

خيبه كبيره قوي انه ده يبقي السبب زي اللي بيجرم اقتناء السكين!!!!

يا استاذ امير .. والله هو دا السبب بجد .. انا قريبي لواء في المرور.. بسألو ليه الفيميه ممنوع .. قالي من الي=بلاوي اللي بتحصل في العربيات ... قعدت اضحك.. قلتلوا من كتر الاخلاق .. مالطرق تلت تربعها ضلمة .. واللي عايز حاجة هيعملها .. قالي مهو مش سبب مقنع .. بس دي الاوامر ..

مش الرشوة بس اللي بنعملها و حاسين إنها صح .

بس انا بشوف كلام كتير عالمنتدي لا أحب الإشارة إليه عشان محدش يزعل من كلامي، بس كتير أقرأ جملة "انا كنت ماشي علي 170"، "انا كنت ماشي علي 190" .. و عادي جداَ أكنه شئ عادي ! و بعدين نرجع نقول الحوادث و السرعة و ندعي ربنا ينجينا منها، طب ما إحنا بنحول كدة الدعاء لدعاء أجوف خالي من المعني .. منين بتعدي ربنا ينجيك و تنزل تمشي بسرعة إنتحارية علي الطريق !؟.

و موضوع تجريب العربية ده !!! مش فاهم يعني إيه واحد يجرب العربية مع عربية تانية هتسد معاها ولا لأ، ولا يشوف أقصي سرعة توصلها العربية مع إنها مكتوبة في الكتالوج .. و إظاهر إن البلد كلها بتجرب العربية و كله فاتح و ماشي !

نرجع برضه نقول أما حد يخدشلنا العربية ولا يحصل حادث لا قدر الله نقول إنت متعرفش العربية دي جاية إزاي و ده لسة بدفع أقساطها، مع إن و الله يا جماعة إحنا لو سارقين عربياتنا مش هنسوقها كدة! ولو ضامنين حياتنا برضه مش هنسوق بالشكل الإنتحاري ده .

أتمني كلامي ميزعلش حد .

ياجماعة icegirl عندها حق انا عن نفسى عمرى ماديت حد رشوة وكنت مرة بتكلم فى الموبايل بس ايام الجامعة مش دلوقتى ووقفونى وامين الشرطة جالى عشان لائما يسحبلى الرخصة لائما اديلى المعلوم عشان يديهانى والله قولتلة (خدها خليهالك اشبع بيها)بنفس اللفظ كدة وكانت عندى بعديها باربع ايام انا اصلا ضد ان الواحد يدفع اى حاجة لاى حد عشان كمان دة اسمة استغلال وانا مابحبش حد يستغلنى ويانا ياهما بتوع المرور..............

أنا شخصيا عمري ما دفعت رشوة لحد لأنها حرام وأنا كدة بأشجعه عليها ولو لي باقي فلوس عند حد ومطنش بأتنح لحد ما آخذ فلوسي على داير مليم -رجاء الإطلاع على موضوعي ( لا لعبارة مفيش فكة ) لأنني بأعتبر ده فردة أو إتاوة ، واللي بيحصل في اللجان وغيرها هو فردة أو إتاوة من العساكر وغيرهم موش رشوة ، أما التحذير من أماكن اللجان والرادار فأنا بأعتبره - ومتزعلوش مني - واجب علي تجاه أبناء وطني علشان أنقذهم من عملية فرض الإتاوات دي اللي هي نوع من البلطجة وملهاش اسم تاني ، وده كلام أقصد بيه الناس العاديين يعني رب أسرة ماشي على الصحراوي ممكن ميكونش خد باله إنه تجاوز ، أو عايز يعدي عربية نقل تسد عليه الطريق أو في منزل مثلا لكن لا أقصد به شخص متهور أو شباب يتسابق أو عربية نقل ماشية بالعكس ... دول مش يستاهلوا فرض إتاوات دول يستحقوا الإعدام لأنهم بيعرضوا حياة أبرياء للخطر-ده رأيي المتواضع مع احترامي لكافة الآراء الأخرى

هو موضوع الرادار دا .. اللي بتقوله ممكن يكون صح.. لأن احنا مبنطبقش القانون صح. يعني العضو اللي دفع 150 عشان 7 كيلو زيادة .. دا لو بيعدي عربية .. او رجلوا زادت علي الدواسة شوية .. هيجبهم ..لكن تقول ايه علي الدماغ..
اما لو شباب عندهم رعونة .. فأعتقد دول يستهلوا

أنا مع الرأي القائل أن التغيير من داخلنا
لأن " .. إن الله لا يغير ما بقوم حتى يغيرو ما بأنفسهم .. "
وأنا أيضا مع صاحبة الموضوع في أننا بداية لأبد من إلتزامنا بالقوانين حتى ولو كان في البداية صعب لأن المعتاد على مخالفة المجتمع ولو حتى في صغائر الأمور سيكون صعب عليه التتغيير والتقيد بالقوانين ..
ولكن هناك بعد آخر وهو من يقع تحت طائلة القانون ولو في شيء صغير لأبد وأن يتحمل تبعية مخالفته و هنا بداية النهاية للرشاوي والمحسوبيات .

سؤال جانبي
أي لا يتعلق بالموضوع

أود أن أطمئن على صاحبة الموضوع الأخت iceheartedgirl وأسألها :ـ
عملتي إيه في العربية وإيه أخبار أخوكي !! ؟؟

بس يا جماعة فى نقطة غايبة عنكم مع احترامى للكل الرشوة موجودة فى كل دول العالم وفى كل العصور والازمنة والامكنة
لكن حد فيكم سال نفسة
يعنى ايه رشوة ؟

الرشوة بمنتهى البراءة وكما قال الزمخشرى هى الحصول شى ليس من حقوقك فى نظير مبلغ من المال او التلاعب لتغير واقع اى شى
يجى بعض الاخوان المتعلمين يجلى عتجول ايه عاد
عجولك

يعنى مثلا يوم الفحص بتاع المرور عربيك حالتها نكد الفرامل بتقلك ارحمنى من العذاب صوت متورك ولا وابور السكة الحديد و الشكمان بطلع فحم مش هباب والعربية بترقص من بعضة من الاخر لو خدة المطب الى اول الشارع هتبقى بواقى عربية تقوم انت غامز البشمهندس الامور بـ 100 حلوة جملية يقوم عملك تقرير ولا كانك معاك audi r8 زيرور دى اسمها رشوة

لكن

لما اروح اطلع رخصة واقعد مستنى والشباك اصلا فاضى ومفيش حد والموظف حاطط الورق جمبة ومش عايز يشتغل و ما اشتغلش غير لما اتزيت دة يبى اسمة ايه لما اروح ادفع فلوس فى الخزنة علشان ولاد الحلال كتبولى فى الرخصة انى اجنبى مع انى مصرى حتى النخاع والاقى موظف الخزنة بيقلى خلاص قفلنا الخزنة طيب لما انت قفلت الخزنة قاعد بتعمل ايه بس الحمد لله كان معايا والدى وقالة الجملة ( ملناش بركة الا انت ) طبعا الـ 15 جنية رسوم تغير الرخصة ادفعوا 50 جنية دة يبقى اسمة ايه






الخلاصة ان الرشوة دى لما اكون عايز اعمل حاجة غلط او مش من حقى لكن لما ادفع علشان اخد اقل حقوقى ممكن
نسمى دة ايه ؟؟؟؟؟؟؟؟؟؟؟؟؟؟؟؟؟؟؟؟

اقسملك بالله حصل معايا موقف مستحيل انساه في حياتي
لا موقفين الاول
انا كنت ماشي بعربية رخصتها منتهية الكلام ده بعد القانون الجديد الله يخرب بيته
الامين واقف بعيد عن الظابط اللي بتجيله الرخص و يسحبها
المهم الامين قالي رخص اديتهاله قالي دي منتهية قلتله انا رايح اجددها دلوقتي انا رايح عالمرور
واقفين قبل المرور ب 200 متر
قالي ماليش فيه فتح مخك بديله عشرين جنيه معجبتوش راح رامي الرخصة للعسكري ادها للظابط وسحبوها
والله لو كان معايا 50 كنت اديتهالو وعديت((( الاول كانت الخمسة ولا العشرة جنيه بيطيرو بيها)))

التاني نفس الموقف لما الوصل خلص ومعدي من اشارة الكيت كات
بمنتهى الوقاحة الامين قالي هات عشرين جنيه عشان اديك الرخصة والبطاقة
كانه مدايني و عليا وصل امانة
اديتهوملو وانا في منتهى الزعل والضيق
لكني مضطر عشان امشي لاني لو وقفت
هيتلككولي على كل حاجة و هيضيعو وقت وفلوس انا في امس الحاجاة ليها وقتها
والله بدفع غصب عني لاني كده كده بدفع للحكومة واللي شغالين فيها كمان
ولا البلد تاخد واللي ممشينها مايخدوش

وموضوع الردار ده سداح مداح ولازم كل الناس تعرف مكانه
لانه اساسا معمول عشان العربيات النقل و الاوتوبيس بجميع احجامهم
اللي هما اساسا عارفين مكانه بالسنتي احسن من الجي بي اس
ومظبطين الامنا اللي مشغلينها وكله ماشي
لكن المفتري اللي راكب ملاكي اللي يجو يوقفوه 102 والسرعة مية
يقولو ادفع 150 جنيه فوري او 300 في المرور او نسحب الرخص
يا جدعان يهديكوي يرضيكو العداد عندي مش ديجتال بيقولي انت ماشي 100 وشرطة
مفيش والميكروباصات والنقل يعدو جنبي زي الحلاوةوهما اساسا نافخين الطريق
وانا واقف بتهزق من واحد فعلا مقلعوش من رجلي

التغير هيجي فعلا من ان وزارة الداخلية تسيب المرور لانها بقت شربة

عفوا يعني حضراتكم بتقولوا مببرات ما انزل الله بها من سلطان


يعني افهم ان خلاص ناس بيموتوا واحد علشان يعمل حاجة غصب عنه فيعملها وهو قلبه راففضها مرة وربنا يسامحه

انما واحد يصحي الصبح يروح يطلع رخصة يدفع رشوة....ويقول من جوايا مضايق


وبعد الضهر يقابله امين فلشارع عاوز يسحب رخصة فيدفعله رشوة برده ..ويقول قلبي مش مرتاح


وتلاقي نفس الشخص مثلا عاوز يدخل ابنه مدرسة وسنه غير قانوني يقوم دافع رشوة للمدرسة تحت اسم منحة..ويقول انا مضطر


انا مش بتكلم عن حد معين..[س اعذروني شخص بالطريقة دي معتقدش ان قلبه هيفضل حي بالشكل دا مع تكرار نفس المعصية

انا عارفة ان مفيش حد مننا بالمواصفات الخيالية دي


بس اقدر جدا شخص يغلط ويعترف بغلطه مش مجرد يدي مبررات لتحليل ما حرم الله

الرشوة حرام بالنص والإجماع، وهي: ما يبذل للحاكم وغيره ليميل عن الحق ويحكم لصاحبها بما يوافق هواه، وقد صح عن النبي صلى الله عليه وسلم أنه لعن الراشي والمرتشي، وروي عنه صلى الله عليه وسلم أنه لعن الرائش أيضاً، وهو الواسطة بينهما.

وقد قال سبحانه: {وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَانِ وَاتَّقُواْ اللّهَ إِنَّ اللّهَ شَدِيدُ الْعِقَابِ}[1].

عارفة كمان ان لو كل حد حط المبدأ دا قدامه هتعب كتير ويغرم كتير...بس هو مين قال ان الالتزام بالدين والقيم والاخلاق سهل؟


طب محنا عارفين انه صعب واننا ي زمن المتمسك فيه بدينه كلقابض علي جمر نار

ملحوظة اخيرة انا مش بتكلم عن الرشوة كحكر علي افراد معينين انما هي قاعدة مذمومة وممنوعة في كل الديانات وفي قيمنا

وعاداتنا وتقاليدنا كمان...عشان بس محدش يخصص الكلام فلجزئية دي

ممكن اسالك سؤال
بزمتك ودينك كام مرة دقعت رشوة او شاي او حلاوة في حياتك
واخر مرة امتى
يا باشا الكلام بأه عيني عينك والمثل دلوقتي بيقول و متعلق في اي مصلحة حكومية
ابرز تنجز

اقتباس:

---

المشاركة الأصلية كتبت بواسطة Mosmafa

ممكن اسالك سؤال
بزمتك ودينك كام مرة دقعت رشوة او شاي او حلاوة في حياتك
واخر مرة امتى
يا باشا الكلام بأه عيني عينك والمثل دلوقتي بيقول و متعلق في اي مصلحة حكومية
ابرز تنجز

---

بغض النظر عن اعجابي بالمثل:verygood:


بس فعلا الحمدلله لسه متعرضتش لموقف زي دا وربنا يستر:36_7_4[1]: