الموضوع: اخيرا الزجاج اتغير بعد طول انتظار

السلام عليكم ورحمة الله و بركاته

اخيرا و الحمد لله غيرت زجاج الراكب الامامي او زجاج الباب الايمن الامامي بعد فترة انتظار حوالي شهرين والحكايه هي:

في يوم جمعه نزلت للصلاه و بصيت علي العربيه وكانت الامور كلها تمام و الحمد لله و بعد الصلاه لقيت زجاج باب الراكب الامامي مكسور و محاوله واضحه لفك التسجيل و فك حليات الابواب و باب التابلوه مفتوح و كل الحاجات اللي فيه مسروقه ما عدا المصحف و سيديهات القرأن الحمد لله و اللي اتسرق جهاز ام بي ثري اف ام بتاع العربيه اللي بيركب مكان الطفايه و شوية تعليقات فضه عليهم ايات و نضاره و قلم بس الحمد لله علي كل شئ وطبعا للاسف ان الحرامي استغل فترة الصلاه و ان الحارس بيصلي وسرق و كسر و ربنا يسامحه.

طبعا كل اللي عملته اني غطيت العربيه و تاني يوم الصبح رحت علي التوكيل وكانت المفاجئه المحزنه ان الزجاج غير متوفر لان كالعاده قطع الغيار غير متوفره و محبوسه في الجمارك عشان مش عايزين يدفعو رشوه.

طبعا بعد شوية حوارات و نقاشات و نرفزه و زهق و بدون فائده واحد ابن حلال مكنتش اعرف هو مين قالي في واحد اسمه الثلاثيه في الحرفيين ممكن تلاقي عنده.

طبعا جريت علي الراجل و الحمد لله لقيت الزجاج عنده و دفعت فيه 200 جنيه بعد فصال و او اصطباحه و الكلام اللي انتو عارفينه بس كنت حاسس انه مش عاجبني بس مفيش اختيارات.

طبعا لاني محترم و مؤدب خفت اركبه بره و رحت التوكيل و اتحيلت علي الناس لحد ما ركبوه علي اسا انه حل مؤقت و دفعت تركيب في حدود 70 جنيه.

طبعا تاني الزجاج لما ركب جاي بنزله راح ساقط و سمعت صوت طرقعه و حاجات بتتكسر قمت مطلعه بايدي للاخر و شغلت الزرار لحد ما قفلت عليه و من ساعتها مش بستعمله و بقيت فاقد للباب ده ولما احب اكلم حد لازم افتح الباب حتي لما احب اعدل المرايه او افتحها لازم اقف وانزل و افتحها و اركب تاني.

فضلت كل اسبوع اتصل اسئل و لا حياة لمن تنادي.

الحقيقه اتعرضت لمواقف كتير محرجه و نظرات مش تمام من الناس اللي بتركب معايا و في يوم قولت ما اخذ بالقوه يسترد بالقوه و فضلت اتصل بالتوكيل لحد ما كلمت المهندس احمد عبد الوهاب و قولتله اني متصل اتخانق معاه عشان انا زهقت جدا من الموضوع وبعد حوار علي التليفون و الراجل كان قمه الادب و التعاون و الاحترام قالي هشوف و اكلمك و اعتقد انه بيهديني و خلاص.

اتصلو بيا في التوكيل تاني يوم و قالولي تعالي ركبه و رحت انهارده الصبح عشان اركبه بس المهندس احمد مكنش لسه موجود و لا الانسه اللي اتصلت بيا لانها سافرت العمره و قعدت مع مهندس من بتوع الاستقبال و اتصل بقطع الغيار و قالوله مفيش غير واحد بس وفي مخزن ابو رواش وانا ابتدي الدخان يطلع من دماغي وطبعا ابتدت نبرة صوتي تتغير و جه مهندس اسمه مصطفي بتاع السمكره و الدوكو و كنت اتعاملت معاه كذا مره كده وبرده محترم و ميتخيرش عن مهندس احمد و قالي ايه المشكله قولتله و انا مخنوق اخر حاجه قاللي ثواني و رجع و قالي عندي واحد كنت هركبه لعربيه فيها شغل سمكره ركبه انت وانا هتصرف.

ودخلت العربيه و عرفت ان المهندس احمد وصل و طلعتله و حكيتله و لقيت الراجل بكل احترام بيقولي انا كنت شايلهولك عند مصطفي لحد ما تيجي و طبعا محدش يعرف انه انت اللي متشال ليك الزجاج.

طبعا بعد حكايتي الممله الطويله دي الزجاج ركب و الحمد لله و دفعت عليه 575 جنيه تركيب شامله الضريبه و التركيب و الزجاج و الحمد لله.

بس عايز اقول حاجه مهمه جدا : 1
- بسبب عدم توفر الزجاج في التوكيل سعره وقف عليا بحوالي 1000 جنيه لاني دفعت تمنه مرتين طبعا واحد مضروب و بعدين الاصلي.
2- هل لو انا مكنتش قدرت اوصل للمهندس احمد كنت هفضل من غير زجاج الي ما لا نهايه.
3- هل لو مكنش الناس اللي بتشتغل ناس زوق و بتعرف تتعامل مع الزباين كان التوكيل بقي حاله ايه و الحقيقه ان بعيب علي التوكيل و ابتديت ازهق و امل منه جدا و اندم اني اشتريت منهم عربيه و لكن بشكر و بعتز بالناس اللي شغاله فيه جدا جدا جدا.

توكيلات السيارات لا تنجح بالزوق و الاخلاق مع كامل التقدير للحاجات دي انما فين قطع الغيار و مراكز الصيانه و المتابعه و قطع الغيار الاصليه المتوفره

المشاركة الأصلية كتبت بواسطة msh2179

شكرا لكل الزملاء الاعزاء و الاخوه الافاضل علي اهتمامهم و ردهم علي الموضوع.

في نقطه مهمه جدا عايز اقولها و هيا ان مش معني كلامنا ده ان العربيه وحشه او حتي التوكيل سئ ولكن في كل توكيلات مصر يوجد عيوب و انا قريت شكاوي كتير من عربيات تانيه في موضوعات متعدده و اذا كنا بننقد فالقصد هو النقد البناء و ليس الهدام بمعن نقد لتلافي العيوب و ليس للتأثير علي مبيعات التوكيل او تشويه سمعته.

ارجو ان تكون هذه النقطه واضحه لديكم جميعا حتي لا يحاسبنا الله علي كلمه تسبب ضررا لاحد بدون قصد

اتفق مع حضرتك تماما.

هناك غرضين اساسيين لسرد التجارب هنا فى الموقع.

1- نقل تجارب حقيقة لملاك السيارات الدايهاتسو للناس اللى بتبحث عن معلومات عن سيارة معينة و وكيلها, و كافة النقاط اللى بتؤثر على قراره فى شراء السيارة الجديدة.

2- عرض التجارب ده, بيبرز محاسن التوكيل, وفى نفس الوقت بيوضح لو فى اى قصور او ملاحظات على الاداء بحيث يتم تنبيهم لها, حتى يتم تداركها ... و ابلغ دليل على كده نجاح مجموعة ملاك الدايهاتسو فى الوصول لحل بخصوص العيب فى دركسيون السريون و الماتريا , ده بالاضافة الى استجابة التوكيل لموضوع مياه التبريد.... و ده يدل على انهم ناس محترمة و بتاخد بالنقد البناء و بستعى للارتقاء بالخدمة.