أى سؤال ؟.. أى استفسار ؟.. عن ايجار سياره .

**akram2010** · 21-05-2009 10:04 AM

لو اربع سيارات حسب خبرتك واحترمها طبعآ ... بتكون اى سيارات من الفئات المذكورة يعنى كلهم صغار ولا سيارات وسط ولا ايه رايك

وهل h1 بتتاجر بكام وسعرها التقريبى وهل طول العام تؤجر ام فقط مواسم واعرف اتش ون ميكروباص هيونداى على حد علمى

**أبو إياد** · 21-05-2009 12:45 PM

انا ارجح يكون العربيات الموجوده
1- فيرنا مانيوال
1-افيو اوتوماتيك
1-لانسر الشكل القديم 1600اوتوماتيك
1-هيونداى النترا الشكل الجديد اوتوماتيك

بالنسبه للعربيات h1 شغلها كتير اوى ومتنوع
بس لازم يكون عندك اساسيات
سائق برخصه ثالثه ع الاقل عنده درايه بجميع اماكن مصر السياحيه وبالذات شرم الشيخ
ويكون عنده المام بالتعامل مع العربيات الجاز ويكون طبعا راجل كبير ومحترم
والعربيه تكون الشكل القديم ويفضل تكون 2007

زى ما قلتلك ليها شغل كتير اوى ومتنوع بس انا افضل الشغل السياحى سيبك من شغل الدورات ده بيهين العربيه جدا
انت ممكن تشغلها فى شركه وتنساها وهى مطلوبه والشركات هى اللى هاتجرى وراك
وممكن تخليها فى المكتب وده اللى برشحهولك لانها هاتعمل دعايه جامده جدا للمكتب بين المكاتب وبين العملاء
وبيسموها فاكهة المكتب
شغلها السياحى مالوش حل بس بيكون فى مواسم الصيف مع العائلات الخليجيه والعرب وبتطلب من شركات السياحه للافواج السياحيه
موسم تشغيها بيكون فى الصيف ابتداء من شهر 7 الى شهر 10 متوسط دخلها الشهرى لا يقل عن 15000ج شهريا
وأغلب شغلها توصيلات مطار منه واليه ولا يقل اجر التوصيله عن 150ج

بالنسبه لسعرها 2007 مستعمل وتكون مترخصه اتوبيس رحلات سعرها التقريبى بيكون من 80 الى 90 الف جنيه

**akram2010** · 21-05-2009 06:16 PM

اخى محمد انا طولت عليك
ماهى افضل طريقه لدفع الايجار ( هل مقدم او مؤخر ) لانه كثير يقولك ندفع مؤخر... طب لو مقدم معنى ذلك اجرة شهر ام ثلاث شهور ولا ايه افضل طريقه للدفع ..

لو رجعت السيارة بها مشاكل كيف نقدر قيمه للاصلاح سمكرة او عفشع او ميكانيكا او تكييف يعنى ... وهل المفروض دفع مبلغ تآمين كمقدم لمثل هذة الامور

**أبو إياد** · 24-05-2009 05:12 PM

المشاركة الأصلية كتبت بواسطة akram2010

اخى محمد انا طولت عليك
ماهى افضل طريقه لدفع الايجار ( هل مقدم او مؤخر ) لانه كثير يقولك ندفع مؤخر... طب لو مقدم معنى ذلك اجرة شهر ام ثلاث شهور ولا ايه افضل طريقه للدفع ..

لو رجعت السيارة بها مشاكل كيف نقدر قيمه للاصلاح سمكرة او عفشع او ميكانيكا او تكييف يعنى ... وهل المفروض دفع مبلغ تآمين كمقدم لمثل هذة الامور

لازم دفع المده مقدم وساعتها ممكن تتغاضى عن دفع مبلغ تأمين واقصى مبلغ عموما بيكون شهر

بالنسبه لو حصل مشاكل بالسياره من السمكره وكده دى بترجع لتقديرك انت كصاحب مكان خصوصا انك فى المجال وتقدر تقدرها بما يرضى الله
اما الميكانيكا والعفشه اغلبها بيكون استهلاك بمعنى ان العربيه ممكن على طول المدى العفشه حالتها بتسوء عن الاول
ولما ياجرها شخص يحصل عطل مفاجىء . استحاله هو اللى يقوم بتكلفه اصلاحها
انما انت بتتفق معاه ان لقدر الله لو احس ان فى حاجه فى العربيه يبلغك ويرجعلك علشان تعمل مراجعه على السياره من خلالك انت
وعموما العربيه طول فتره تواجدها معاك المفروض انك بتراجع على صيانتها بالكامل
والعربيه بتكون موديل حديث ياعنى صيانتها غير مكلفه بتكون عباره عن تغيير زت وتيل فرامل وتربيط عفشه
وبعد فتره ممكن تغيير جلب وبارات وبيض مقص والحاجات دى مش مكلفه

**أبو إياد** · 25-05-2009 09:10 AM

المشاركة الأصلية كتبت بواسطة akram2010

السلام عليكم يا اخى محمد
بالنسبه لاجراءات تاجير من شخص الى شخص بدون مكتب ... ماهى الضمانات ( يعنى لو طلب شيك ممكن قوى يوقع على شيكات ولكنه ليس له اى رصيد يعنى ورقه وخلاص ) وهل تستطيع اطلاعنا بصورة قانونيه لعقد ايجار سيارات مستوفى الشروط .

عقد ايجار سيارة

كروكى سيارة

اقرار استلام سيارة

كروكى من مكتب الى مكتب

ايصال امانة

**akram2010** · 25-05-2009 04:04 PM

اخى محمد
يعنى لو اتفقنا على ايجار 3000 شهرى ولمدة سنه يدفع لى 36000 مقدم؟ ولا ايه رايك وبعدين هناك ناس يطلبوا سيارات بعقود ثلاث سنوات معنى ذلك اخد منه ( 3*12*3000) مقدم وممكن يتفق معى وبعد ست شهور يرجع لى العربيه ياريت نفهم اللغز دة بخبرتك

**أبو إياد** · 26-05-2009 07:52 AM

صعب جدا تلاقى واحد يدفع 36000ج مقدم ايجار لمده سنه والا كان دفعهم مقدم لعربيه ويقسط الباقى
اى حد فى الدنيا بيدفع شهر واحد بس لو مستاجر
انما لو مكتب هيدفع قيمه الايجار الشهرى مؤخر

انما فكرة انه يدفع سنه ايجار دى انا واحد من الناس كنت باعملها بس كنت باجر اللانسر بـ 20000ج لمده سنه وكاش

وممكن يتفق معى وبعد ست شهور يرجع لى العربيه ياريت نفهم اللغز دة بخبرتك

فعلا فعلا اغلب الناس بيكون ده طريقه تعاملهم وعدم الالتزام بالمده المتفق عليها رغم وجود عقد اتفاق بينكم
وانت هاتضطر تاخد العربيه وده بيكون بسبب سؤ اختيارك للمكتب او الشركه المتفق معها

فالحل الوحيد انك تقوم بعمليه بحث عن مكتب او شركة ايجار يكون صاحبها رجل محترم وملتزم غير كده هو مش مجبر انه يلتزم بمده التعاقد مع صاحب السياره

______________________________________

انت شاكلك كده ناوى على الموضوع ده بص لو عندك عربيه وعاوز تستفيد منها استفيد منها الفتره الحاليه اللى هى مده شهر
6 و 7 و8 و 9 ياعنى اربع شهور لو دخلت على مكتب وعرضت عليه الفتره دى بس هايقبلها بسعر مغرى جدا

خصوصا انها مش هاتكلفه صيانه ومش هاتقف فى الوقت الحالى

انت تعرف ان احنا فى الوقت الحالى يعتبر موسم لان امتحانات الطلبه الكويته شغاله حاليا وهتنتهى فى 17 / 6
وفعلا ساحبين كل العربيات اللى موجوده فى السوق والاسعار بتتزايد وبمجرد انتهاء فترة الامتحانات تبداء فترة اجازات الصيف

واللى هايتضمنها شهر رمضان وبعديه العيد ياعنى انا اتوقع ان شهر رمضان السنه دى هايكون موسم مش زى كل سنه

والله الموفق

**akram2010** · 26-05-2009 10:16 AM

الف شكر اخى محمد على الايضاحات

وبفكر لو نشترى اتش ون ونآجرها لشركه سياحيه واريح دماغى بدل من عربيات صغيرة واشتت نفسى فى مشكله كل عربيه .. رايك ايه فى الفكرة دة وخاصآ الامكانيات اما نشترى كذا عربيه صغيرة او اتش ون واحدة ونخلص
ايهما افضل ؟؟
وعلى كلامك ايجارها 15000 ج هل هذا صحيح وبالسواق ولا بدون

**أبو إياد** · 26-05-2009 10:24 AM

طبعا h 1 افضل واريح خصوصا انها مش هاتشتغل بالخمس والست سنين
انما 15000 ج ده لو انت عندك مكتب وفى الصيف بس هاتحصل على الايراد ده
انما المعدل الطبيعى لاى شركه مش هاتقل عن 6000ج طول العام بالسائق