كيف نعتني بالبوجيهات ؟

**roky** · 16-04-2009 11:23 AM

من فترة اتعطلت عربيتي و لما تكون سخنة و تبطل ماتدورش تاني ... و طلع العيب من البوجيهات ...

فهل يا تري أزاي نعتني بالوبيجهات و ننظفها... وهل ممكن أغيرها بنفسي ...؟ و ازاي

شكرا

**hosar** · 16-04-2009 11:31 AM

ممكن بسي الاول لازم تجيب مفتاح بوجيهات و تحل البوجيه القديم
لو لقيت عليه زيت يبقى الموتور خفيف و لازم عمره أو على الاقل تغيره بطقم بوجيهات سن قصير
اما لو لقيته مكربن (مهبب بس) ممكن تجيب فرشه سلك و تنضفه و بعدين تركبه تانى
انا شخصيا مركب بوجيهات 3 شمعه ممتازه جدا جدا ممكن تستعملها و حتحس بالفرق

**Sameh** · 16-04-2009 11:50 AM

غيرها دايماً فى ميعادها صح ، عادة بتقى كل 20 الف كيلو ، وبلاش موضوع تطلعها وتحرقها على البوتاجاز وتسنفرها والكلام ده ، أصلا البوجيهات مش غالية أوى وبتغيرها تقريباً مرة كل سنة

**roky** · 16-04-2009 12:32 PM

المشاركة الأصلية كتبت بواسطة Sameh

غيرها دايماً فى ميعادها صح ، عادة بتقى كل 20 الف كيلو ، وبلاش موضوع تطلعها وتحرقها على البوتاجاز وتسنفرها والكلام ده ، أصلا البوجيهات مش غالية أوى وبتغيرها تقريباً مرة كل سنة

انا معاك و الموضوع مش استخسار ... بس هل يلزم ان اعمل صيانة للبوجيهات كل فترة علي مدار السنة ... ولا ده مش لازم ... ؟!

**AHMEDCAR** · 16-04-2009 01:19 PM

البوجيها يا بايظه يا شغاله ما فيش ليها صيانه الكلام اللى بتقولوه عليه ده بتاع سواقيين التكاسى (معلش ) و هما بيعملوا كده علشان يوفروا و فى نفس الوقت ال 20 الف دول هما بيعملوهم فى شهريين ثلاثه بالكتير

**Sameh** · 16-04-2009 03:14 PM

المشاركة الأصلية كتبت بواسطة roky

انا معاك و الموضوع مش استخسار ... بس هل يلزم ان اعمل صيانة للبوجيهات كل فترة علي مدار السنة ... ولا ده مش لازم ... ؟!

أستاذ روكى - لو الموتور سليم يبقا مش هتحتاج تعمل أى حاجة للبوجيهات طول فترة تشغيلها ، بمعنى تانى لو مافيش زيت بيدخل غرفة الحريق ، يعنى الزيت مش بينقص ومافيش دخان غريب من الشكمان ، يبقا البوجيه مش هيكون طبقة زيت تعمل عازل وتمنع الشرارة ، ولا هيلحق يكون كربون طالما بتغيره كل 20 الف

**mahmmoud1980** · 17-04-2009 08:47 AM

انا عندي البوجيهات عليها زيت ممكن كده تبقى عايزه عمره للماتور وهتكلف قد ايه ولا ممكن احضر بوجيهات سن قصير وماشي حالي

**Sameh** · 17-04-2009 08:44 PM

المشاركة الأصلية كتبت بواسطة mahmmoud1980

انا عندي البوجيهات عليها زيت ممكن كده تبقى عايزه عمره للماتور وهتكلف قد ايه ولا ممكن احضر بوجيهات سن قصير وماشي حالي

غالباً نص عمرة ، لازم ميكانيكى يشوفها

**ابو حسين** · 20-04-2009 08:39 PM

الله ينور عليكم

**agwaa** · 21-04-2009 04:33 PM

المشاركة الأصلية كتبت بواسطة mahmmoud1980

انا عندي البوجيهات عليها زيت ممكن كده تبقى عايزه عمره للماتور وهتكلف قد ايه ولا ممكن احضر بوجيهات سن قصير وماشي حالي

ممكن تبدأ تستخدم بوجيهات سن قصير ويفضل نوع جيد( ياباني مثلاً ) أنا شخصيا بأفضل NGK في كل الحالات الكلام دة لو العربية بتاكل زيت بشكل بسيط( نص كيلو أثناء فترة تغيير الزيت ) وده ممكن تعرفه لما تقيس الزيت
لاحظ أن قياس الزيت يكون بصفة دورية و قبل دوران المحرك بفترة مناسبة ( المحرك لأبد أن يكون بارد تماماً ) ويفضل في الصباح قبل تشغيل المحرك وبصفة يومية
أما إذ اكان إستهلاك الزيت بمعدل أكبر ففي هذه الحالة يحتاج المحرك إلى تغيير طقم الشنابر ( طقم شنبر ) أو ما يطلق عليه نصف عمرة ..
هذا مع ثبات العوامل الأخرى يعني بالبلدي لا يوجد بالموتور ( المحرك ) عيوب أخري تضطرك إلى عمل عمرة كاملة

م / أحمد يوسف