الموضوع: إنا لله وإنا إيه راجعون العربية إتخبطت

حمدلله على سلامتك وابقى طمنا بعد ومترشها :) وترجع أحسن من الأول انشاءالله :)

المماطله دى شئ طبيعى بس مش مبشر!
مقصدش اقلقك بس من خلال تجربتى لمواقف مماثله الشخص الاخر بيكون وقت الحادثه غير بعدها !!
يعنى الاول والموقف سخن وهو غلطان وانت مستعد تخنقه بإيدك بيبقى محترم ويقوللك انا غلطان واللى فيها انا هتكفل بيه ونعمللك العربيه كلها والكلام ده ..بس بعد ما تمشوا من مكان الحادثه بيبقى شخص تانى وتبدأالمماطله :-
اولا يرفض الشخص اللى انت بتتعامل معاه عشان متبقوش متفقين عليه
ثانيا يبدأ يفاصل معاك فى نسبه التحمل مع انك مش ملزم بيها اساسا بحجه انه كان محترم وقللك انه مستعد يصلحهالك ومسبكش ومشى وقلك اعمل محضر واخبط راسك فى الحيط.
ثالثا يقوللك انا اصلى معيش فلوس دلوقتى عشان مكنتش عامل حسابى
رابعا يبدأ يتشاغل عنك واصل جدتى ماتت وخاله مراتى بتولد وعمه اللى جابت ابوه فى المستشفى وبنلملها لغايه ما تزهق وتروح انت تصلحها يا اما تتخانق معاه وبرضه انت اللى هتصلحها بعد ما يحرق دمك.
والنوع التانى من الاشخاص بيطلع حالا على السمكرى وبيحاسبه قدامك وتتحمل انت الدوكو لو محتاجه او بتعملها على البارد لو حاجه بسيطه
النوع التالت وده نادر جدا
بعد ما كنت خلاص طلعت مفتاح العجل وهكسرله فوانيس عربيته والناس حاشونى ودانى معاه لواحد ميكانيكى معرفته جنبى عشان يبقى زى ضامن انه هيعمللى الخبطه اللى فى العربيه وقال لو فلان معملهاش تعلالى وانا اعملهالك.طبعا انا استعوضت ربنا وقلت انا لا هروح ولا اجى وموضوع اعمله محضر والكلام ده زى قلته عن تجربه!
بس المفاجأه انه اتصل بيا تانى يوم وعرفنى بنفسه وانه منتظرنى فى المكان الفلانى عند السمكرى الفلانى ولما روحت خلصولى العربيه وانا قاعد واتعرفنا على بعض وما زلت محتفظ بنمرته على تليفونى لغايه دلوقتى ممسحتهاش.
وعندى ملحوظه بس انه بيقولك هيجيب ونش وينقل العربيه ده كلام مش هيحصل لان الونش بياخد حوالى 200 جنيه وهو بيقول معهوش فلوس! .دا ممكن يشيل العربيه ومتشوفهاش غير لما ترجع الرخصه!
اسف للإطاله بس دى تجربه ورأى شخصى!