الطريق من المنصورة إلى مطار القاهرة

**motorsuser** · 17-04-2009 03:03 PM

أنا مرحتش المطار من زمان و مش فاكر السكة كويس
أنا دايما باخد طريق سندوب وان شاء الله مفيش مشكلة إني أوصل لغاية بعد كبري بنها انما مش فاكر فين المخرج بتاع المطار و بعدين مش عارف ازاي أوصل في القاهرة نفسها
يا ريت اللي يقدر يقوللي

**drahmd** · 18-04-2009 02:47 AM

قبل كوبري بنها هتلاقي دخله يمين ادخلها هتمسك طريق مصر اسكندريه الزراعي هتفضل ماشي لحد قليوب عند قليوب هتمشي شويه هتلاقي يافطه بتقول لك دخلة محور 26 يوليو سيبها بعد ماتعدي دخلة المحور هتلاقي كوبري بعد الكوبري هتلاقي دخله يمين بتقول لك مدينة نصر ومصر الجديده والمطار هتدخل وهتمسك الطريق الدايري تقريبا 20 كيلو لحد ماتلاقي مخرج مصر الجديده والمطار تاخده وهتفضل ماشي يمين هتلاقي كوبري اطلعه وافضل ماشي علطول لحد ماتلاقي السندباد على يمينك وتلاقي شريط ترماي تاخد شمال من على شريط الترماي وتفضل ماشي هتلاقي كوبري انزل من تحته واول u Turn بعد الكوبري خدها وارجع بص فوق قدامك هتلاقي يافطه طويله عريضه بتشاور على طريق بتقول مطار القاهره الدولي امسك الطريق هتبقى دخلت المطار ها في اي استفسار؟

**motorsuser** · 18-04-2009 02:57 PM

لا مفيش أي استفسار تاني ألف ألف شكر
أنا فعلا الحتة اللي عند الترماي كنت ناسيها خالص
شكرا ياباشا

**Hossam_Hassan** · 18-04-2009 03:17 PM

المشاركة الأصلية كتبت بواسطة drahmd

قبل كوبري بنها هتلاقي دخله يمين ادخلها هتمسك طريق مصر اسكندريه الزراعي هتفضل ماشي لحد قليوب عند قليوب هتمشي شويه هتلاقي يافطه بتقول لك دخلة محور 26 يوليو سيبها بعد ماتعدي دخلة المحور هتلاقي كوبري بعد الكوبري هتلاقي دخله يمين بتقول لك مدينة نصر ومصر الجديده والمطار هتدخل وهتمسك الطريق الدايري تقريبا 20 كيلو لحد ماتلاقي مخرج مصر الجديده والمطار تاخده وهتفضل ماشي يمين هتلاقي كوبري اطلعه وافضل ماشي علطول لحد ماتلاقي السندباد على يمينك وتلاقي شريط ترماي تاخد شمال من على شريط الترماي وتفضل ماشي هتلاقي كوبري انزل من تحته واول u Turn بعد الكوبري خدها وارجع بص فوق قدامك هتلاقي يافطه طويله عريضه بتشاور على طريق بتقول مطار القاهره الدولي امسك الطريق هتبقى دخلت المطار ها في اي استفسار؟

فى طريق جديد و اسهل، انت ما تنزلش من مخرج مصر الجديدة و تكمل فى الدائرى، بعد حوالى 6 كم هتلاقى مدخل يمين مكتوب عليه مطار القاهرة، ده على المطار عدل.

**motorsuser** · 18-04-2009 03:43 PM

و الله دا شكله أريح و هيبعدني عن الحتة بتاعت السندباد دي اللي كنت ناسيها بس أنا دايما بروح من مخرج مصر الجديدة و متعود عليه و بعد الوصف افتكرته و سهل بس برضه برا برا من عالديري هيبقى أريح أوي برضه...
مش عارف و الله بس عموما كدا ألف شكر أنا كدا افتكرت و كله بقى تمام ألف شكر يا جماعة...

**pro_samir** · 18-04-2009 06:45 PM

جديدة الدخلة المباشرة من الدائرى دى
وأكيد هتبقى احسن علشان الزحمة على الأقل

**wesam_salom** · 21-04-2009 10:03 PM

المشاركة الأصلية كتبت بواسطة Hossam_Hassan

فى طريق جديد و اسهل، انت ما تنزلش من مخرج مصر الجديدة و تكمل فى الدائرى، بعد حوالى 6 كم هتلاقى مدخل يمين مكتوب عليه مطار القاهرة، ده على المطار عدل.

انا مرحتش من الطريق ده بس رجعت منه اخر مره

فعلا طريق جميل

هتفضل ماشى فيه لحد ما تلاقى مطلع الدائرى

طلعت ونزلت من اول منزل بتاع السويس ولفيت علشان ابقى فى اتجاه الزراعى

اسهل بكتير واكيد فيه طلعه تانيه اسهل فى اتجاه الزراعى على طول