الموضوع: .... تجــربتى مع الدايهاتســـو ميـــرا موديــل 2000 و مركزصيانة م/سيد الفراش ....

بداية أحب اقول إن السيارة دى غريبة و حيرتنى معاه لمدة عام كامل و دا إللى حتشوفوا تفاصيله فى الموضوع دا

أولا ححكى ما هو سبب شراء هذه السيارة
منذ عام تقريبا كانت اختى بدأت تتعلم السواقة علشان إشتغلت و ووالدى كان مقرر يجيب لها سيارة صغيرة تكون اتوماتيك فى حدود 30 - 35 الف

طبعا بعد ما إتعلمت السواقة قعدت أدور فى السوق إيه هى سيارة يكون فيها اتوماتيك و تكييف و هاتشباك و تكون فى حدود المبلغ دا مالقتش غير الدايهاتسو ميرا و إللى شجعنى على كده صدبق لى و جارى فى نفس الوقت السيارة كانت مع مراته و بيشكر فيها لما كنت بشوفه

لما دورت لمدة أسبوعين فى السوق وقتها 5/2008 مالقتش ميرا كتير للبيع و كان السعر بيتراوح مابين 37 الف إلى 40 الف لحد ما بالصدفة قلت أكلم جارى مش عايزين تبيعوا الميرا و كانت المفأجاة إنه بيقولى إنهم لسه إمبارح مقررين إنهم يبيعوها لإن ربنا رزقه بمولوده و شنطة الميرا صغيرة جدا و مراته مابقتش عارفة تحد سيارة البيبى فين .

نيجى بقى للسعر و حالة السيارة
السيارة كانت عاملة 112 الف تقريبا لونها كحلى و رشها بره كلها ماعدا السقف للنظافة و لحداثة خفيفة من الأمام و قد تم تغيير فتيس السيارة بواحد إستيراد و كانت المساحة الخلفية مكسورة و طارة الدريكسيون فيه جزء مفكوك
الأوبشن إللى فيها :
1- اتوماتيك
2- تكييف
3- باور
4- سنتر لوك بريموت
طبعا أوبشن هايل بالنسبة لسيارة فى فئتها

المهم هو كان طالب فيها 34.500 الف و لما إتكلمت معاه وصلنا لـ 32.500 الف نهائى

طبعا انا كنت عارف تاريخ السيارة كله من حكم معرفتى له بس قلتله نطلع برضه نكشف عليها ميكانيكا علشان نشوف محتاجة إيه و مكنش عند مانع طبعا

كلمت واحد صاحبى أعرفه مشارك عرفة جابر بتاع قطع غيار تويوتا إللى شارع دمشق فى مركز صيانة (تويوتا - لكزس) فى بنزين التعاون إللى فى المطار و إتفقت معاه يكشف عليها و يشوف محتاجة إيه

سحب الميرا
خدت السيارة و رحت له وانا سايق بصراحة عليها تجميع غريب السيارة جابت 140 كم/ساعة بسهولة جدا (عدادها 160كم/ساعة) !!

الكشف قبل الشراء
المهم رحت كشفت الميرا عنده و قالى السيارة فله طبعا توكل على الله و الحمد لله تمت البيعة .

صياتة الميرا
رحت لصاحبى صاحب المركز بعد كده علشان أغير بقى السيور و الفلاترو الزيوت علشان أبدأ على نظافة

فتم تغيير الزيت بشل هيليكس إللى بيقعد 5 الاف و تم تغيير فلتر البنزين و فلتر الزيت و فلتر الهواء و سير الكاتينة و الدينامو و التكييف و أخيرا البوجيهات و كانت التكلفة النهائية بالمصنعية 900 جنيه

جت بعد ما إنتهى الشغل حسيت إن السيارة صوتها عالى شوية (الصوت دا كان موجود من قبل شرائها ) فلما سألت صاحبى قالى دا طبيعى فى سيارات الـ 3 سلندر قلت ماشى

التفكير فى الذهاب إلى التوكيل
بس بصراحة ماكنش عاجبنى الصوت دا قلت أطلع على التوكيل يعملى برده مراجعة عليها و بالمرة نعرف الصوت دا طبيعى و لا لأ و أجيب طارة دريكسيون جديدة

مساعدة أخى معاذ
كلمت أخى العزيز معاذ الشرباصى و قلتله محتاج أروح التوكيل علشان أشوف الصوت دا إيه قالى حكلكمك م/ احمد عبد الوهاب و أخليه يشوفها بنفسه و خدت نمرته علشان اتابع معاه الميعاد

الذهاب إلى التوكيل
كلمت م/ أحمد و إتقفت معاه إنى أجيله تانى يوم الساعة 9 صباحا علشان يشوفها و فعلا روحت له فى نفس الميعاد لكن هو أتأخر شوية و جيه على الساعة 9:30 تقريبا

الكشف على الميرا قى التوكيل
سلمت عليه و عرفته بنفسى و إنى من نايل موتروز فرحب بيها وقلتله على موضوع الصوت دا فا قالى شغل السيارة و بعد كده قالى دا صوت طبيعى علشان هى 3 سلندر و بعد كده الصوت بدأ يعلى شويه فقالى ممكن تكون محتاجة قواعد موتور أو ظبط TPS و قالى ندخلها الورشة و نشوف محتاجة إيه قلتله ماشى بس التكلفة كام

التكلفة المبدئية
قالى لو قواعد حتبقى فى حدود 1000 جنية من غير مصنعية لو تظبيط stp فقط حتبقى فى حدود 400 جم
المهم قالى حتسيبها اليوم كله و تيجى تأخدها فى أخر اليوم قلت ماشى المهم تتظبط

التكلفة التهائية
كلمته أخر اليوم قالى خلصت و تعلى خدها رحت التوكيل و قابلته قالى كانت محتاجة ظبط TPS و عملتك خصم و التكلفة بقت 200 جم فقط
المهم طبعا جربت السيارة لقيت الصوت خف شوية لكن برضه لسه عالى و فلما قولتله قالى هو دا أخرها ا

سعر طارة الدريكسيون
قلت بالمره اروح اسأل على الطارة بكام لقيتها بـ 1500 جم و طبعا مش موجودة و بيتيجى خلال شهر بعد دفع الفلوس
طبعا طنشت الطارة و قلت بالمرة أسأل على توافر قطع الغيار ليها فى التوكيل قالولوى ما بنجبهاش غير بالطلب فلما سألت أجيب حاجاتها منين قالولى من الحرفيين !


خدت السيارة و إديتها لأختى بعد كده و قلتلها هو نظام الميرا كده صوتها عالى شوية علشان 3 سلندر

تغيير الدينامو
بعد 3 شهور تقريبا من إستعمال الميرا لقيت أختى بتقولى فى يوم إنها و هى بتمشى بتلاقى لمبة البطارية بتنور قلتلها طيب خليها لأخر الأسبوع و ابقى اشوفها

تانى يوم لقيتها بتكلمنى و تقولى السيارة مابدورش نهائى قمت رايح لها و وديتها لكهربائى قالى دا سليكونات الدينامو عايز تتغير قلتلته ماشى غيرها قالى الميرا دى قطغ غيارها مش متوافره نصيحة هات دينامو إستيراد كامل و ريح دماغك قالته مموافق بس نخلص من الهم دا قالى حسألك عليه و اقولك و بعد كده قالى حيتكلف 250 جنيه بالمصنعية و تم تغيير و بقت تمام

تنظيف الريداتير
لقيتها بعد فترة لقيتها بتقوله السيارة بدأت تسخن منها و بقى الميه بتنقص قمت وديها لميكانيى أعرفه قالى ننظف الريداتير و نحط لها ميه خضراء و فعلا بعدها قدعت شهر تقريبا تمام

ظبط التكيهات
و بعد كده بدأت تسخن تانى و الميه تقل و فى نفس الوقت الصوت بدأ يعلى أكتر !

قولت اوديها لميكانيكى قالى دى محتاجة ظبط تاكيهات قلتله ماشى ظبطها قالى تاكيهاتها مقرفة و صعب إنها تتظبط قلت له و الحل إيه ؟ قالى إحنا نحط لها زيت تقيل قلت له قورا شكرا و خدت السيارة

و طلعت على بنزين شل قلت أغير الزيت لغنه بقاله فيها 3 الاف كم رحت البنزين لقيت العامل بيقولى إيه هو صوت السيارة على قوى كده ليه هى مافيهاش زيت !!
قلت له شوف كده شاف الزيت لاقها كويس و قالى مش محتاجة تغير زيت أصلا قلت له طب أعمل إيه فى الصوت العالى دى قالى حوديك لميكانيكى معرفة حيظبطهالك

بداية معرفة مركز م/ سيد الفراش
و رحت للميكانيكى بتاعه و و بعد الكشف قالى مبدئيا دى محتاجة ظبط تاكيهات و سربنتية التكييف فيها حاجة جوا بتشخلل قلتله ماشى قالى هاتها بكرة الصبح حنفك السربنتية نديها لواحد بتاع تكييفات يشوفها و حشتغل انا فى التاكيهات قال بس قبل ما اشتغل إسال على الكوستبانات بتاعات التاكيهات موجودة ولا لأ علشان دى إللى محتاجة تتغير قلتلته ماشى

قمت فاتح النت و داخت على المنتدى و لقيت الموضوع بتاع اسماء محلات قطع الغيار و جبت نمرة محل اوشين و سألتهم عليها قالولى معندناش لكن موجود عن م/سيد الفراش خدت نمرته و كلمته قالى موجودة الواحدة بـ 20 جنيه و هما 12 واحدة يعنى 240 جنيه و لقيته بيقولى إنت متأكد إنك محتاج تغير الكوستبنات قلت له الميكانيكى بتاعى قالى كده قالى أصلها نادرا لما بتتغير و قالى طب ما تجيبها أشوفها الاول و مش حاخد منك حاجة
حسبتها فى دماغى طالما دا إللى عند قطع غيارها و فى نفس الوقت بيفهم فيها طب ليه أفضل رايح جى بين الاتنين ما اوديهاله و خلاص فقلتله ماشى أجيلك بكره قالى انا مش موجود بكره لكن الصنايعى موجودة روح و كلمنى من هناك

بداية التعامل مع م/ سيد الفراش
و فعلا روحت تانى يوم الساعة 9 الصبح و قبلت صنايعى عنده إسمه أحمد و قلت له الشكاوى بتاعتى عن السيارة قالى ماشى بعد ما كشف قالى حنظبط التاكيهات و قاعدة التكييف محتاجة تتغير قلت له ماشى قالى بس ر لما مش حنشتغل غير لما أكلم م/سيد

قلم مكلمه و قالوا محتاجة ظبط تاكيهات و قاعدة تكييف قال ماشى إشتغل

المهم بعد ما خلصنا و لأول مرة منذ عام أحس إن صوت الموتور بقى طبيعى !

أخيرا السيارة بقت طبيعية و صوتها بقى حلو قلت بالمرة أسأله عن طارة الدريكسون قالى موجودة طبعا و فتح لى دولاب فيه نقريبا 8 و قالى نقى إللى عاوزه و نقيت واحدة و قلتله على إهتزاز السيارة و هى واقفة على n قالى إحتمال دى قواعد موتور و كلم المهندس قالى إستنى لما أجى بكره و أشوفها بنفسى

تكلفة ظبط التكيهات
المهم الحساب كله طلع
ظبط تاكيهات 150 جنيه
بوجيهات 40 جنيه
طارة دريكسيون 150 جم
يعنى الحساب كله 340 جم

تغيير قواعد الموتور
و تانى يوم بعد الشغل عديت على م/ سيد الفراش وأول لما شوفته قلت له دا أنا كنت مقرر خلاص أبيع الميرا و أرتاح من الهم دا و الحمد لله بعد تصليحها فكرتى إتغيرت عنها قالى الميرا دى سيارة محترمة جدا بس محتاجة إللى بيفهم فيها وخليته يشوف السيارة قالى السيارة زى الفل مافيهاش حاجة و محتاجة قواعد موتور و عندى موجودة حنشوف محتاجة التلاتة و لا كام واحدة وإتفقت معاه أعدى عليه فى البيت (شيراتون هليوبليس) عشان عندى محاضرات الماستر بتاعتى فى الأكاديمية البحرية و يروحنى للبيت و يروح هو بيها الورشة و لما يخلصها يروح بيها و أقابله عند بيته لما أخلص أخدها منه (على فركة هو معاه شاريد سيدان و مراته معاه سيريون 2002 و بنته معاه ميرا 2000 يعنى دايهاتسواى بجد) وفعلا عديت عليها الساعة 9 الصبح و وودانى على البيت بعد كده و طلع هو على الورشة و رحت مع واحد صاحبى على الاكاديمية و بعد كده بين الحاضرات كلمته قالى خلصت خلاص بس مش حينفع يرجع بيه لإنه بعت جاب سيارته لإنه عنده مشاوير فقلتله خلاص حاجيلك دلوقتى أخدها

تكلفة تغيير قواعد الموتور
خدت واحد صاحبى و رحنا خدناها و فعلا الصوت راح و قالى غيرنا قاعدتين فقط و التالتة كانت سليمة و طلعت تكلفة الحوار دا بالمصنعية 400 جنيه
و الحمد لله الوصت أختفى نهائى و بقت السيارة زى الفل

نصيحة لوجه الله
من الاخر أنصح اى واحد معاه ميرا يتعامل مع م/ سيد الفراش لإنه راجل مجترم جدا و بيفهم فى السيارات دى كويس جدا و فى نفس الوقت عنده قطع غيارها

مميزات و عيوب الميرا
خلاصة الكلام بعد تجربة عام للميرا:
المميزات :
1- سحبها ممتاز
2- أقتصادية فى البنزين
3- سعر ممتاز بالنسبة لكماليتها
4- تكييف قوى رغم إنها 1000 سى سى

العيوب:
1- عدم توافر قطع الغيار
2- عدم توافر الصنايعية إللى بيفهموا فيها كويس
3- ارتفاع اسعار قطع الغيار بالنسبة لفئتها

شكرا يا احمد على الموضوع الرائع
يا ترى سيد الفراش بيشتغل فى ديهاتسو الجديد ؟؟؟