بص يا استاذ خالد..
انا معايا النترا ( عامله في 4 شهور 15 الف كم ) وعشان ماتفتكرش اني متحيز ليها احب اسجل اني شايف ان الاسترا الجديده طبعا اكيد اعلي منها رغم اني ماركبتش الاسترا الجديده..
انا لما جيت اشتري حسبتها حسبه تانيه.. الاسترا الهاي لاين فوق ال 150 الف, الكورولا الهاي لاين فوق ال 160 الف, الشارك (رغم عدم اقتناعي بيها ) كانت الهاي لاين ب 156 الف.. في المقابل كانت الالنترا الهاي لاين 117 الف يعني هوفر اقل واجب 35 الف جنيه وهاخد اللي هياخده صاحب الكورولا وصاحب الاسترا وصاحب الشارك , ولما ازهق منها هبيعها بمنتهي السهوله من غير ماخسر فيه كتير.. فتوكلت علي الله ووفرت ال 35 الف جنيه وجبت الالنترا ..
اللي يقولك "على فكرة الالنترا مش ثابته على الارض " يبقي مجربش سواقه العربيه خااااالص..
الكاوتش بتاع عربيتي سبور مقاسه 15/65/185.. وعن تجربه ( حط 120 خط تحت كلمه عن تجربه دي )سافرت بيها من شهر 12 اللي فات لغايه دلوقتي 4 مرات لشرم الشيخ ( الطريق مش بطال بس مش واووو يعني) وكان معايا مراتي وابني يوسف سنتين ( ده برده عشان محدش يقولك شباب طايش وبياخد الريسك علي نفسه )..المهم , معظم الطريق من 140-160 كم/س و في اخر 200كم من الطريق بمشي علي 160-200 ومفيش اي مشكله ومره كمان كنت بقشر برتقال علي 160 كم/س..
الثبات بتعها كويس جدا جدا جدا في الطوالي والمنحنيات الطبيعيه.. بس في بعض المنحنيات في الطريق لازم تنزل ل 80-100 كم/س.. الحقيقه انا مش عارف اذا كان ال 80-100 كم/س ده قليل ولا لا.. بس انا كنت باخد الملفات دي بالرينو علي 120 تقريبا من غير اي مشاكل بس الرينوالكليو كانت اصغر..
الفرامل جيده جدا".. الباور رائع واللي يقول لك بيلعب منك او مش متحكم فيه علي السرعات العاليه يبقي مستحيل يكون جرب سواقه العربيه...
الموتور قوي جدا في السحب والتجميع ( عربيتي اوتوماتيك) , سهل جدا انك تجيب 160-180 بسرعه رهيبه وعشان الثبات رائع مابتحسش بالسرعه لغايه 140-150..فجاءه بدون مقدمات ماشى عادي جدا وتبص في العداد تلاقيه 150 كم/س.. بس للامانه العزم بتعها ( وبالتالي السحب) بيقل في المطالع الجامده.. بس برده حلها سهل, تنزل غيار ولو العربيه اوتو زق عصايه الفتيس علي "3" زي الاوفر درايف في العربيات التانيه.. الجير "3" ممكن يجمع معاك بسهوله لغايه 140 علي ار بي ام 4.5 او 5 علي ما اعتقد بس طبعا هتسمع صوت الموتور ولو في الطبيعي فالموتور هادي جدا... التكييف تلاجه ( زي كل الكوري والياباني وخاصه الخليجي لان عربيتي خليجي)
العزل رااااااااااااااااااااائع.. اقفل ازازاك وانت مش هتسمع ااااي حاجه بره..
علي القايم مكتوب مقاس الجنوط اللي ممكن تركبها وهي 15/65/185 و 15/55/ 195 او 16/55/205 وبحسبه بسيطه اعتقد ان سهل قوي تركب 16/50/205 ا( لازم تحسبها الاول لان ليها حسبه معينه انا معرفهاش بس في توكيلات الكاوتش الكبيره اكيد عرفينها)..وانا لما اغير الكاوتش هركب برده 205 بس علي 15...
ملحوظه: العربيه الي حد ما واطيه, فلو هتقصر الطول بالكاوتش 1-1.5 سم توقع انك هتاخد كل المطبات بالعرض.
للامانه برده العفشه بتاعتها ناعمه بس بتحل بسرعه.. يعني لازم كل صيانه يربطولك العفشه.. ومن مش عارف اذا كان ده طبيعي ولا لا.. بس الرينو كانت العفشه بتقعد 30 الف من غير ماتتربط من غير اي مشكله...
والله دي الحقيقه بدون اي مبالغات والله علي ما اقول شهيد
اسف علي الاطاله.. ولو عندك اي استفسار انا في الخدمه..
وائل رجب
المفضلات