عربية فلشيا 2001 لقطة بثلاثة وتسعون الف جنيه .. يالا من قال اشترى

لما الاقى واحد عربيتة 132 موديل فى السبعينات ب 42 الف واشوف واحد ثانى عارض سوزوكى سويفت فاضية موديل 1993 على 39 الف ونص (شوف الدقة ونص!!! ) وواحد الذ عارض بيجو 504 موديل 1978 على 35 الف وواحد عارض اونو 1993 ب 35 الف وفاضية برضة ... الخ

يبقى العربية بتعتى الى ربتلى احلى عضلات (حد دلوقتى يستجرى يقرب منى ) من كتر مزقتها او مشيت ادور على قطع غيار لها ... وربيت بيها صدقات واسعة جدا مع الميكانيكية والكهربائية لدرجة انى اشتريت موبيل جديد خصصته للميكانيكية كما انا عربيتى تمتاز بانها عربية بيتى متحبش تسافر برة القاهرة ... والفايدة الاكبر انها عرفتى الصديق من غيرة لما بطلب النجدة مثلا من على كوبرى 6 اكتوبر الساعة 3 مساءا فى اغسطس ويرفض يجيلى بعرف علطوا ان ده مش صديق وميستحقش انى اجعله صديقى .. كما ان العربية بتجعل جيوبك ديما نضيفة من الفلوس وعلشان كدة تركب اى مواصلات عامة فى مصر وانت مطمن حيسرقو ايه يعنى .. واهم ميزة فى العربية دى انها علمتنى الصبر لاتقلى صيد ولا تقلى يوجا عربيتى هى المنصورة

شوفتو العربية دى حلوة الزاى مين عايز يشتريها بثلثة وتسعون الف .. قابل للتفوض فى حدود المعقول 300 جنية يعنى

ربنا يسهلك بيعها ^^

انا كان عندى فليشيا مو96 وربنا فرج كربتى وبعتها من كام سنه

معقولة العربيات الاسكودا دى كلها مشاكل كدة

السلام عليكم
ممكن رقم الموبيل

هى مشكلتها الوحيدة انها انجكشن وطبعا محدش بيفهم فيها خالص وكل حاجة روح التوكيل وكع يامواطن

ياخونا فليشيا موديل 2001 هو الى وقع فليشيا فى السكودا ومن بعدها معدوش بيعملو فليشيا


على فكرة انا كتبت الموضوع داه مش شتيمة فى الفليشيا ولا حاجه لان فى موديلات فى الفليشا حلوه جدا مع اخو مراتى واحدة منها وانا لما جبت عربيتى جبتها على حس عربية اخو مراتى

انا كتبت الموضوع داة بعد مقريت الوسيط ودخلت على كام سايت علشان انا عايز اشترى عربية لمراتى ولقيت الاسعار (الهبل) الى بقلوكم عليها وانا بالفعل تخلصت من عربيتى وجبت بدلها بيجو 504 موديل 1979 ومستمتع بيها جدا مع انها عملة زى العربيات التاكسى وكل الى عرف ان حبدل عربيتى الفليشيا موديل 2001 بعربية ببجو 504 موديل 1979 كان بيفكرنى مجنون بس الحمد لله (الف حمد وشكر ) طلع تفكيرى صح عربيتى الجديدة جامدة واتوبيس تشيل خمسة مستريح وشنطتها ملعب وقطرت بيها عربية هونداى النترا لمسافة 50 كليو على الطريق الزراعى والا اشتكت ربنا يديمها عليا نعمة يارب

:b4_007:

يعني قصدك إن الموديلات الكربراتير أفضل من الإنجكشن ولا هي كلها وحشة على الإطلاق ؟

ال96 كانت كاربراتير

ايه رأيك يا أخي...أنا مستعد للشراء وأمري لله. بس هتدفع لي كام؟!. اوعى تزعل ده هزار بس صعيدي. Lol...lol

حرام عليك يا راجل انت حسستني انك راكب -لا سمح الله - سيات 133 .
دي الفليشيا بنت حلال وانا معايا سكودا فيفوريت هايلة وكنت عاوز اجيب فليشيا وش اوكتافيا بدالها علشان تكون انجكشن فقط .
بس كدة هراجع نفسي وعربيتي معايا والحمد لله طلعت كويسة واصيلة فمافيش داعي للمغامرات بقى .:10d5c8~1107:

والله انت راجل 10 / 10
الكلام اللى بتقوله صح من ال الموضوع لحااااااد دلوقتى