الموضوع: الحمد لله .. استلمت النترا 2009 ... باركولي

السلام عليكم
الحمد لله استلمت النترا 2009 من اسبوعين بس اعذروني كنت مشغول شوية فمعرفتش ادخل على المنتدى الا النهاردة
المواصفات : مانوال .. اللون فيراني
السعر : 93000
مشيت بيها لحد دلوقتي حوالي 400 كم
تقييمي ليها لحد دلوقتي :
بسم الله ما شاء الله عربية اكتر من ممتازة , نعومة عالية جدا على الطريق , باور رائع بجد و تحكم ممتاز في العربية , شكل تحفة طبعا و فخامة عالية جدا
بجد انا سعيد اوي اني اشتريتها و بجد هيونداي عملت تحفة اسمها النترا .. و حتى خالي عنده لانسر الشكل القديم لما ركب النترا قال فعلا فيه فرق بينها و بين لانسر لصالح النترا في الاداء و النعومة و كل حاجة و ما صدقش ان التكنولوجيا الكورية عرفت تقرب جدا من التكنولوجيا اليابانية

عيبها الوحيد في وجهة نظري انها رغم علوها لو الكنبة الخلفية محملة تلاتة لازم اخد المطبات بالعرض عشان بتحك بس يمكن عشان المطبات عندي هنا جبال بمعنى كلمة جبال
اكتر حاجة مضايقاني (بس من غبور مش من العربية نفسها) انه شايل مسند السائق حاجة تنرفز بجد لأن علبة المسند متركبة و كل حاجة ناقص بس الغطاء بتاع المسند هيخسروا ايه لو حطوه

استفسارات بقى ياريت تجاوبوني عليها
1/ انا جديد في السواقة زي ما قولت و النترا هي اول عربية جديدة اركبها كنت بتدرب على عربيات قديمة .. و فجأة لقيت صاحب المعرض بيديني المفاتيح و بيقولي اتفضل يا بشمهندس و العربية مركونة برة فطبعا كنت مخضوض منها اوي لدرجة اني نسيت فرامل اليد مرفوعة حوالي نصف كيلومتر .. فهل ده ممكن يكون اثر على العربية في حاجة ؟ لاني قلقان جدا من الحكاية ديه

2/ انا الحمد لله اتعودت بسرعة على ابعادها و بقيت بسوقها بسهولة جدا ما عدا حتة بتكسفني لو قدام حد .. اني لسة مش متعود على طلعة البداية و مش متعود على دواسة البنزين الناعمة اوي ديه فساعات بتقف مني او صوتها يعلى .. لو الحكاية ديه اتكررت لحد ما اتعود ممكن تسبب اي مشاكل ؟
و ممكن اتخلص منها ازاي ؟

3/ هل طبيعي ان صوتها يبقى عالى شوية اثناء ما انا بسخنها ؟

4/ مرة او مرتين بس زاد عداد ال rpm عن 3 اثناء التليين .. هل ده ممكن يكون سبب اي مشكلة ؟

5/ اول لما جت ما كانش فيها بنزين كتير و كنت عايز احطلها بنزين 92 دايما بس لسوء الحظ ما كنش فيه غير بنزين 90 ساعتها و عشان اروح بنزينة بعيدة ما كنش فيه بنزين كفاية فاضطريت احطلها 90 فأعمل ايه عشان احط 92 المرة الجاية ؟ المفروض اخلص التانك كله الاول و لا اعمل ايه ؟

6/ بالنسبة لتنظيف العربية انا جبتلها فوطة صفراء كده و ذراع تانية كده فيها خيوط بتنظف التراب بس لو فيه اي اوساخ مش بتنضف و لو حتى بالفوطة الصفراء فالمفروض اعمل حاجة في الفوطة ديه قبل ما استخدمها مباشرة كده ؟ و هل فيه طريقة احسن لتنظيف العربية من جوة و برة ؟

7/ انا عايز اركبلها فوجات بس سمعت ان ثمنها في التوكيل خوالي 600 جنيه او اكتر .. لو ركبتهم برة فيها مشكلة ؟ و سعرهم كام برة ؟

8/ انا سمعت ان اداءها بيبقى احسن كتير بعد التليين .. هل ده صحيح ؟ مع اني مش متوقع اداء اروع من كده بصراحة

9/ ممكن اركبلها لمبة استوب خلفية و لا لأ في التوكيل ؟ و بكام ؟

10/ ممكن اغير لوحة العربية اثناء فترة الترخيص و لا لأ ؟ لانه للأسف مفيش لوحات ارقام جديدة في المرور هنا و انا عايز اركب لوحة جديدة


اسف جدا على الاطالة بس انا حبيت اجيب كل حاجة عايز استفسر عنها عشان ما اواجهش اي مشاكل ان شاء الله في المستقبل .. و اتمنى فعلا ما تكونوش اتضايقتو من اشئلتي الكتيرة ديه بس انا عشمي فيكو كل خير ...
في انتظار الردود

الف شكر ليكو يا جماعة و ربنا يكفيني شرها و يديني خيرها
ياريت اشوف اكتر من رد بخصوص استفساراتي عشان اطمن
و فعلا اكتر حاجة مضايقاني اني ساعات بنسى فرامل اليد و كمان الطلعة بتاعتها مش متعود عليها
ارجو المساعدة في كل استفسار على حده
و شكرا لكل شخص حاول يساعدني في بعض الاستفسارات و اعذروني مش عارف اشكر كل واحد لوحده لأني داخل نت من الموبايل