تعديلات مرورية فى المعادى الجديدة !!
النهارده الصبح كنت فى المعادة الجديدة, و فوجئت بتعديلات غريبة جدا:
لو انت جاى من اتجاه مدينة نصر, و هتدخل المعادى من على الاتوستراد , المدخل اللى بعد بنزينة شل
ساء كملت فى شارع النصر (الحارة الشمال)او مشيت فى الشارع الموازى له (الحارة اليمين) بعد المدخل , فأصبح الاتجاه اجبارى يمين, فى الشارع المؤدى الى صقر قريش.
تم اغلاق اول U-turn فى الشارع ده اللى كانت عند موقف الاتوبيس, و اول U-turn متاحة اصبحت عند مرور المعادى.
يعنى لو عاوز تدخل المعادى الجديدة و ليس صقر قريس, كمل فى الحارة الشمال بعد دخولك من مدخل المعادى.
الطريق المتاح, هو انك بتمشى فى الطريق خلف بنزينة موبيل اللى فى ميدان فلسطين.
شارع اللاسلكى ابتداء من بنزينة موبيل دى و حتى مطعم مؤمن... اصبح اتجاه واحد فقط للحارتين فى اتجاه مؤمن.
اما شارع النصر, فأصبح اتجاه واحد للاتجاهين فى اتجاه طريق الخروج من المعادى ابتداء من مؤمن و حتى بنزينة كالتكس.
فى لخبطة جامدة جدا جدا ... و فى اوناش كتير و بيشيلوا العربيات اللى راكنة فى ميدان فلسطين و شارع اللاسلكى, و ده كان مسبب مشاكل كتير جدا مع الملاك هناك, لأن معظم العمارات مفهاش جراج, و لو فيها مش مكفى طبعا.
خلى بالكم يا جماعة ... اليومين دول شادين حيلهم جامد جدا فى المعادى الجديدة, و رتب كبيرة و قلق جامد.
