-
حاجة غريبة
اولا ياجماعة انا نفسى حد يجاوبى على الاستفسار المحير دة
اولا لما اجى ادور العربية ساعات تدور وبعد اقل من دقيقة تبطل وساعات مش بتبطل وفى كلتا الحالتين بسمع صوت نحرة فى بداية الدوارة لمدة ثانية وساعات لا اسمعها وبعد كدة الاقى العربية بتترج جامد لحد ما تسخن ياريت حد يفدنى العربية ابيزا 98
-
-
-
شوف يا أستاذ محمد
هو مافيش حد رد عليك عشان مشكلتك غريبة شوية بس انا هقلك تعمل ايه وربنا يسهلها ونقدر نوصل للحل
أولا انت غيرت طقم كهرباء من فترة قد ايه
ثانيا بتستخدم بنزين ايه 90 ولا 92 وغيرت فلتر البنزين اخر مرة امتا
ثالثا ايه أخبار مؤشر الحرارة عندك مظبوط ولا ؟ يعني العربية بتسخن بشكل طبيعي والمؤشر بيوصل النصف ولا لا
جاوب علي الأسئلة دي وبعدين ابدأ بالأتي :
لو ما غيرتش طقم كهرباء من زمان غيره يعني من أكثر من 20 الف غيره وكذلك فلتر البنزين وضروري جدا لأن لو بتستخدم بنزين 90 هتلاقي الإثنين دول خلاص انتهي عمرهم
وشوف لو المشكلة اتحلت خلاص لو ما اتحلتش قول ايه النظام بعد تغيير دول
صوت النحرة اللي في اول الدوارة ده موجود عند معظم الناس وعندي لكن مش عامل مشكلة وما تحطهوش في دماغك وأعتقد انه مالهوش علاقة بموضوع الدوارة والرجرجة ده
واحنا معاك والله المستعان وأكيد الأخوة الكبار هيردو هما كمان عليك ان شاء الله
-
بأختصار شديد وتشخيص سريع غير حساس الحراره ودا بناء على تجربه وممكن تعملو بنفسك وهحاول أجيبلك الصوره بتاعته
http://i211.photobucket.com/albums/b...3/DSC_0065.jpg
-
منور يا محمد باشا
انا حبيت يبدأ بالأسهل واللي كده كده هغيره وبعدين يغير الحساس لو اللي قلته ما حلش المشكلة
-
ياباشا كلامك على العين والراس ومظبوط 100 *100 الى خالانى أجزم الموضوع على طول هو ان العربيه بتبطل منو والدليل على أنها مش بوجيهات وسلوك أنها لما تسخن بينتهى الكلام هقلك على تجربه عمليه أعملها وشوف النتيجه وان شاء الله مفيش منها ضرر شيل فيشه الحساس ودور العربيه شوف هتعمل معاك أيه هتلاقيه بالظبط زى ماهو بيقول بس طبعا هو الحساس بتاعه فى أخر ساعات عمره الى ميعرفوش غير الله
وطبعا بردو البوجيهات والسلوك ممكن تعمل كده
-
يا محمد باشا انت رأيك هو الصح لكن انا عايزه يشيل اي حاجه ممكن توصل للمشكلة غير الحساس وبعد كده نغيره لأنه هو الأغلي وربنا ييسرله ويوصل للحل ان شاء الله كنت عايز اسألك يا محمد هو انت جيبت مفتاح بوجيهات خاص ولا لقمة بتركب زي لقم المفاتيح عشان عايز أجيب واحد بس عايز أعرف ايه اللي متوفر عشان اجيبه علطول وجزاك الله خيرا
-
أنا جبت مفتاح بوجيهات عادى مش لقمه والمفتاح رقمو يأما 21 يأما 22 مش فاكر بالظبط ولو أنت عندك عدة الؤم يبقى أستخدم لقمه نفس الماقسين الى فوق ولو أن المفتاح بيبقى أفضل لأنو بيبقى فيها جوه جلبه كوتش بتزنق البوجيه وتخليه يطلع فى المفتاح بدل ما تمد ايديك وبعد الشر عليك تتلسع لو العربيه سخنه وطبعا كلامك ياباشا مظبوط جدا وأوفر طبعا لو المشكله فيهم يبقى الحمد لله وفر ثمن الحساس بس أنا بوصى بلأصلى لأنى جربت دا وجربت دا فى فرق كبير
فى العمر والأداء
-
عموما هى مشكله حساسات من الدرجه الاولى بس حساس ايه الله اعلم الخبراء هم اللى يعرفو لان معظم المشاكل الغير مفهومه فى العربيات دى من الحساسلت و مش من السهل اى ميكانيكى يعرف يشخصها و اسال مجرب روح لاى حد بتاع فولكس و هو يفهملها و اسمع ان فى واحد اسمو محمد سمير عند حديقه بدر دا كويس و حتى لو غيرلك الحساس و مكنش العيب منو يبقى انتا مخسرتش حاجه حيجرب كام حاجه من عندو لحد اما العربيه تظبط معاك و حيقلك انا غيرت كذا و حسابو كذا غير لما تروح لميكانيكى و يقعد يخمن و انتا تروح و تشترى و يجرب فيك كام حاجه لحد اما العربيه تظبط تكون غيرت نص الماتور على اما يلاقى الحاجه اللى بايظه
-
ألف شكر علي ردك يا محمد هنزل اشوف اللي هلاقيه هشتريه انا عندي عدة لقم بالطقم كامل لكن البوجيهات محتاجه لقمه 22 بس فيها فراغ طويل داخلي عشان تحتوي البوجيه بداخلها وانت بتفكه وجزاك الله خيرا علي ردك
-
بصراحة يا ياجماعة انا مش عارف اقول اية لان انا فرحان ان حد رد عليا وانا متشكر ليكم خالص وبالنسبة لاسئلتك يا استاذ ايهاب انا لسة مغير طقم كهرباء كامل مع فلتر بنزين وهواء مكملوش 5 شهور وبحط بنزين 92 على طول ,وعلى فكرة مؤشر الحرارة عندى ثابت فى المنتصف وعمر ما العربية سخنت منى الامن فترة كبيرة وكانت المشكلة فى ثرموستات الحرارة وغيرتها واتحلت المشكلة وبردة نسيت اقول ان انا غيرت حساس الحرارة من قريب ومفيش فايدة
-
شوف يا استاذ محمد ممكن تفك البوجيهات او تخلي ميكانيكي يبصلك عليها برده لأن ممكن يكون حاجه فيهم فيها مشكلة ماهو الفترة دي معناها ان ممكن يكون حاجه منهم باظت بسبب انك مونت بنزين مش نظيف مرة أو اي حاجه جرب بس وربك يسهلها وكمان شيك علي سلوك البوجيهات والوصلة اللي من الموبينة الي الإسبراتير وكمان فك الإسبراتير وبص عليه وعلي الشاكوش كل دي اختبارات فقط ما تغيرش حاجه دلوقتي غير لما تشور الناس عشان ما تدخلش في متاهات وتكلفة في الفاضي والله المستعان
-
لو الحساس مش أصلى بيضرب بسرعه وبردو ممكن يكون فى بوجيه من الأربعه تعبان ومجرد ما العربيه بتسخن يظبط معاك وبردو السلوك ممكن يكون فى سلك بيهرب ودا تقدر تعرفه من خلال أنك ترفع سلك سلك وشوفه بيوصل شراره ولا لأ دى حاجه والحاجه التانيه أنك تدور العربيه وتستنط الى الصوت لو فى صوت تكتكه يبقى فى سلك بيهرب طب ملاقيناش حاجه من دول نعمل أيه نفك البوجيهات بوجيه بوجيه ونشوف أنهى واحد ما بيحرقش ونغيره أو نغير الطقم على طول
طب مش الأثنين يبقى الحساس الى حضرتك جبتو مش أصلى وضرب معاك تانى
ويا أخى يأيهاب لو المشكله فى الشكوش يبقى الموضوع ده هيبقى موجود معاه على طول مش الصبح بس
ويارب أقل التكاليف الممكنه لأخينا محمد
-
انا لسة من فترة قريبة جدا مشيك على البوجيهات والميكانيكى قالى ان البوجيهات ممتازة جدا وبعدين سلوك البوجيهات لسة سليمة بس فية جاجة مش عارف هى السبب ولا لا الاكس ال فى الاسبراتير قبل كدة كان فية بوش روحت للخراط عملى جلبة واتظبط بس بعد كدة الميكانيكى اكتشف ان الجلبة التعملت بقت تلف مع الاكس فهل الموضوع دة هوا الممكن يكون عامل المشكلة ولا يكون الرشاشات فيها حاجة؟
-
معتقدش ونخلى أحتمال الرشاشات دا أخر حاجه لأن التعويره فيهم جامده قوى
طب ممكن حضرتك تروح لحد يحط العربيه على الجهاز وهو هيجزم أن شاء الله المشكله فين
-
انا مش عارف اشكر حضرتكم ازاى ربنا يكرمكم
-
لا شكر على واجب أحنا كلنا أخوات فى المنتدى ودى الروح السائده فيه وأهم حاجه نوصل لحل المشكله عندك
Content Relevant URLs by
vBSEO 3.6.0 PL2