الموضوع: ظاهرة الزبالة المتحركة

المشاركة الأصلية كتبت بواسطة elawany13

معاك حق والله
الواحد قرف من الاسكال الوسخة ديه
ياااااااارب حد يسمع صوتنا

نفسي والله إن الموضوع ده يتنفذ .. لإن التلوث السمعي ده بيأثر على أعصاب الناس جامد جدا.
ولو منعوا تركيب الكاسيت في الموتوسيكلات دي هنرتاح كتير.

المشاركة الأصلية كتبت بواسطة me_medoo

ياه يابوحميد كل ما اجي انام والاقي الارض بتزلزل كده بسبب توتوك حقير ولا موتسيكل مزعج. بفتكر موضوعك. يعني انا يا احمد يا حواس بفتكرك كل يوم تلات مرات كل يوم قبل ما انام ده اذا عرفت انام اساساً. هههههههههه بس لازم بجد نلاقي حل للمشكلة دي بجد دي مبقتش حياة على الاقل على الاقل يمنعو التكاتك والموتسيكلات بعد الساعه ١٢ بالليل. علشان الناس تعرف تنام
وانا بفكر اتفق مع جماعة قطاعين طرق عرب واديلهم فلوس واقلهم اي موتسيكل او توتوك يعدي في حتتنا اخطفوه ومش تبعتوه على غزة لا انتو ودوه تل ابيب

ماشي يا سيدي .. يعني متفكرنيش غير لما يعدي توكتوك حقير ولا موتوسيكل مزعج ... ههههههه.
الموضوع ده كنت بحذر منه في 2009 .. يعني من 3 سنين فاتوا.
بس زي مانتا عارف .. إحنا بنكلم نفسنا (بنفضفض)
دلوقتي الموضوع بقى أسوأ 100 مرة ، وعمايلهم بقت لا تُحتَمَل:
1 - كزيادة رهيبة في مُعدَلات الجريمة اللي بتتم بيه من سرقة شنط وتوزيع مخدرات وسطو مسلح
2 - أو تلوث سمعي (الكاسيت والكلاكسات).. وكمان بصري (أيوا بصري) .. شوف أبولينا وصفه ليهم كان إزاي

المشاركة الأصلية كتبت بواسطة abo_lina

الزبالة المتحركة
تعبير عبقري
هم إصطمبة واحدة كده تلاقيه راكب و مأتب و وراه صاحبه راكب و مأتب وراه و مفلفلين شعرهم كده و الواحد منهم يديك إنطباع إنه نقاش أو صبي منجد في أحسن الأحوال ..
هم لو محترمين و بيسوقوا كويس ماحدش هاييجي جنبهم أو يفتكرهم إنما الكلام من صاحب الموضوع و معاه حق بسبب استهتارهم و غبائهم في الطريق و التلوث السمعي اللي بيسببوه ..

3 - الجديد بقى : إن في ناس بتروح تشتريلها 5 موتسيكلات صيني ويأجرله ربع محل كده ويأجر الموتوسيكلات بالساعة لعيال فسافيس كبيرهم أولى ثانوي .. وبيعتبر ده مشروع العمر بالنسباله.
ولو عيل من دول خبط عربيتك .. بتبقى مش عارف تمسكه تموته .. ولا تموت البني آدم اللي بيأجرلهم موتسيكلات .. ولا تعمل إيه بالظبط !!
ده عيل .. مش هقولك معاهوش رخصة .. لأ ده لسة مطلعش بطاقة حتى.
آخرك : بتقول حسبي الله ونعم الوكيل في اللي ماسكين المرور وسايبينها فوضى بالشكل ده.
4 - خد عندك دي بقى :: في ناس دلوقتي بقوا بدل ما يجيبوا لعيالهم عجلة .. بقوا بيجيبولهم موتوسيكل صيني .. مهو رخيص (40 جنيه قسط شهري)


إرحمنا يارب.

العيب مش على سواق الموتوسيكل .. العيب ع اللى سامحله يعمل كده .. لو كل منطقة اتفقت ان لو واحد من السواقين دول عدا وعمل كده فى شارعهم يمسكوه ويرنوه العلقة التمام ويودوه القسم ويعملوله محضر ازعاج للسكان .. كل اصحاب الموتوسيكلات هيخافوا بعد كده
لكن مع الاسف احنا مش بنتفق غير فى وقت الازمات فقط .. لكن غير كده الشعب كله نايم فى العسل

يارب يكون في نية للتنفيذ المرة دي .. يارب.

"وافقت لجنة الشئون الدستورية والتشريعية بمجلس الشعب، اليوم الاثنين، على تعديل قانون المرور رقم 66 لسنة 1973.
ويقضي التعديل بــ''مصادرة الدراجات النارية والمركبات والتوك توك لكل من قاد إحداها دون الحصول على لوحات معدنية ورخصة تسيير، وعلى حائزي الدراجات النارية التقدم بها خلال 45 يوما من تاريخ سريان هذا القانون لإدارات المرور المختصة لتوفيق أوضاعهم القانونية للحصول على التراخيص اللازمة لتسيير أو قيادة هذه المركبات، أما التي لم توفق أوضاعها فيتم عرض أوراقها على المحكمة المختصة للحكم بمصادرتها''.
واستهدف التعديل مقاومة الجرائم التي انتشرت بعد ثورة 25 يناير ومنها ''الجرائم التي ترتكب باستخدام الدراجات النارية وغيرها مثل السرقة والتحرش الجنسي والبلطجة والحوادث المرورية مما يهدد أمن الناس.
وقال اللواء مصطفى راشد مدير إدارة المرور ''لابد من تشديد العقوبات لأننا يجب أن ندرك أن نصف مليون توك توك تم استيرادهم من الخارج وعملوا تكتلات بالخروج على الطريق الرئيسي وارتكبوا جرائم والعقوبات مفاداها تطبيق الغرامة من 300 إلى 1500 جنيه أو الحبس 6 أشهر في حالة السير بالتوك توك في غير الأماكن المحددة. "

نقلاً عن مصراوي

الحمد لله بس يارب يطبق صح ادعوا معايا

موضوع فى محله تمام بجد حاجه تخنق وتقرف