مقارنه هامه: تشترى خليجى ولا وكيل?
السلام عليكم
اعتقد دى مقارنه هامه جدا نظرا لتميز الخليجى فى زياده الكماليات مقابل السعر اما الشراء من التوكيل فميزته الضمان وملاءمه العربيه للطرق المصريه.
يعنى مثلا انا قدامى اوكتافيا A5 2009 شكل قديم ب 165 فيها جنوط 16 و Cd/mp3 ودى وكيل ضمانها سنتين دون حد اقصى للكيلومتر.
فى المقابل قدامى الخليجى بس موديل 2008 وفيها الاتى زياده عن الوكيل: حساسات ركن - فرش جلد مع قماش - طاره ملتى فنكشن - زجاج فيميه خلفى - دركسيون جلد طبيعى. دي عليها ضمان سنه او 20.000 كم بس مش فى ورشه معتمده.
انا سالت بتاع الخليجى قاللى الخليجى احسن قلتلو ليه - ده كان الرد:
١- الطلاء معالج لتحمل الحراره العاليه فى الخليج
2- بقول سربنتينه التكييف اطول عشان تزود كفاءه المكيف.
٣- عيوب الصناعه ان وجدت بتبان فى اول شهرين تقريبا وهوا مدينى سنه ضمان.
٤-معاك كماليات اكتر و انت الكسبان.
نيجى للوكيل, طبعا رده مختلف:
1- مش هتقدر تعمل صيانه فى الوكيل لو معاك خليجى و الورش التانيه لا ترقى لكفاءه التوكل وحرام تدفع 165000 و تعمل صيانه بره التوكيل.
2- العربيه مصفحه بالكامل من تحت ومعاها عفشه تناسب مصر كمان هى اعلى عن الخليجى.
3- طلمبه البنزين الخليجى بتبوظ من البنزين المصرى لانها مجهزه لبنزين 95 او حاجه اعلى مش فاكر اللى قاله :)
4- قاللى ضمان الوكيل يشمل ٥ سنوات ضمان لجير بوكس و ١٣ سنه ضمان ضد الصدا (ممكن حد يتاكدلنا من المعلومه دى???)
لحد هنا انتهى الكلام انا لفيت ورحت ارتوك اوتو و المصريه و فى الخليجى قعدت مع مدير مبيعات ناشيونال موتورز ساعه بحالها والرجل كان فى منتهى التعاون. هوا كمان قاللى الورش دلوقتى فيها اجهزه زى الوكيل و التوكيلات بتحاول تشويه صوره الخليجى لتاثيره على مبيعاتهم.
فيا ريت يا جماعه الكل يشارك عشان نعرف من واقع تجارب الاعضاء ايه افضل. ويا ريت تنصحونى فى حالتى اجيب الخليجى ولا الوكيل?