العربيه واطيه اوى يا جماعه...اية الحل؟؟؟

ازيكم يا منتدانا العزيز واعضائة الكرام
اللانسر الكريستاله واطيه جدا جدا وخصوصا انى ساكن فى منطقة شعبيه مطباتها الله لا يوريكو
المطبات مش بتحك فى العربيه من تحت بس
لا
دى بتعصر العربيه عصر من تحت

انا عندى سؤالين
لما يكون الحك او الفعص جامد كدة بيأثر على اية اكتر حاجة؟؟؟
انا نزلت تحت العربيه و حسيت انى بيطبق فى فردتين الشاسيه
خصوصا ان فى مطبات المطب بيحك معايا من بعد ما العجل القدمانى يعدى المطب لغاية لما العجل الورانى يطلع تانى

يعنى بجد بتقطع قلبى معاها :_Alshmokh11:

تانى سؤال
يا ترى حد جرب موضوع تعلية العربيه؟
انا عارف انه اكيد انه هيفرق فى اتزان العربيه
لكن لو فى حد جربه يا ريت يقولنا خبرته و يقول الثبات ضاع من سرعه كام
بجد الموضوع مهم يا جماعه لانى لو ملقتش حل هضطر للاسف اسفا انى اغير العربيه مع انهاا مبالهاش معايا شهرين

بس الحقها دلوقتى احسن ما تبقى معيوبه بعد كدة

الف شكر ليكم

بقولك ايه
انفخ الكاوتش كويس واى مطب تعدى عليه اقعد ادعى على اللى عمله
نكلم جد بقى
انا لما كان معايا اللانوس انا كنت معليها علشان المطبات ودى عن طريق علايات كاوتش تركب مع اليايات وافضل علايات بتاعه البيجو 504 القديم بس خد بالك انها بتاثر على ثبات العربيه فلو عملت الكلام ده اجرى بالمعقول

شفت المساعدين الاول كويسين ولا لأ ؟؟ لان كان نفس المشكله دي عندي في الفيكترا وكان طقم المساعدين قدام وورا بايظ

تاني حاجه مش لازم تاخد المطب صح، خدو بزاويه 45 درجه عشان العربيه متحكش فيه يعني اطلعه بميل وانزل منو براحه جدا ورجلك عالفرامل وبميل برده... وسيبك من اي حد وراك يكلكسلك اهم حاجه ميحكش تاني عشان الشكمان والشاسيه

بص يا باشا انا كان عندي نفس مشكلتك حتي وانا بقراء رسالتك جالي احساس انه انا اللي كاتبها، انا عندي لانسر كريستالة 98 وجيبها من ثلاثة أشهر تقريباً، ومكنش فيه مطب الا لما تحك فيه، رحت لواحد بتاع عفشة وميكانيكا، قال لي ان العفشة بعفية شوية فقام بتغيير الأربعة مساعدين والسوستتين الاماميين، والحمد الله العربية انضبطت وبقت كويسة وعاليه،علي فكرة السوست ممكن تكون سليمة بس انضغطت مع الاستعمال فلابد من تغيرها.

نصيحة خلي واحد بتاع عفشة كويس يبصلك عليها والموضوع سهل إن شاء الله

اقتباس:

---

المشاركة الأصلية كتبت بواسطة ashraffathy75

بص يا باشا انا كان عندي نفس مشكلتك حتي وانا بقراء رسالتك جالي احساس انه انا اللي كاتبها، انا عندي لانسر كريستالة 98 وجيبها من ثلاثة أشهر تقريباً، ومكنش فيه مطب الا لما تحك فيه، رحت لواحد بتاع عفشة وميكانيكا، قال لي ان العفشة بعفية شوية فقام بتغيير الأربعة مساعدين والسوستتين الاماميين، والحمد الله العربية انضبطت وبقت كويسة وعاليه،علي فكرة السوست ممكن تكون سليمة بس انضغطت مع الاستعمال فلابد من تغيرها.

نصيحة خلي واحد بتاع عفشة كويس يبصلك عليها والموضوع سهل إن شاء الله

---

شكرا على الردود الجميله
بس عندى سؤال
غيرتلها سوست بتاعة لانسر بردة ولا سوست عربيه عاليه؟

لان العفشة عندى كويسة جدا و العفشة قدام كلها جديدة
بس الفكرة فى ان المطبات العادية لما بنزل بيها المعادى ومدينة نصر مبتحكش ولا حاجة
لكن مطبات الحدايق الله لا يوريك
انا بقول كدة لان كان معايا ريجاتا و كانت عاليه و مع ذلك كانت بتحك فى المطبات دى
بس اهو
فى ناس بتعمل المطبات بغباء
ربنا يسامحهم

ركب جنط 14 وكله هيبقا تمام بأذن الله